Read Tedim Chin GALATI 6 Bible Online

GALATI 6 - Tedim Chin bible

GALATI 6

¹Sanggamte aw, mi khatpeuh a gamta khial a om ciangin, Kha Siangtho’ deihna bangin a nungta note in tua a khial pa a manin a gamtatkik theih nadingin thunem zangin na huh un. Note in zong amah bangin ze-etna na tuahkhak loh nadingun na kikem un.

²Thu haksa na tuah uh ciangin khatlekhat na kihuh un. Tua hileh Khrih’ thukham a zui na hi uh hi.

³Mi khatpeuh, bangmah hi lo napi-in amah a kithupi ngaihsut mawkmawk leh amah le amah a kikhem ahi hi.

⁴A kuamah peuh in ama gamtatna ciat entel henla, kisialh nading a om leh ama gamtatna siksanin kisial henla, midangte tawh ki-ettehin kisial kei hen.

⁵Bang hang hiam cih leh a kuamah peuh in i gamtatna bang ciatin a ngah ding ihi hi.

⁶Pasian thu hilhna a za mipa in ama neih na hoihte khempeuh zong, amah a hilh pa tawh zangkhawm tahen.

⁷Pasian a kikhemzo dingin ngaihsunkha kei un. Mi khempeuh in ama vawh nam khaici mah ngahkik ding hi.

⁸Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi.

⁹Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi.

¹⁰Tua ahih ciangin hunhoih i ngah simin midangte tungah a hoihin i gamta ding a, a diakdiakin thu upna sungah i innkuanpihte khempeuh tungah i hoih gamtat ding i phawk ding hi.

¹¹Tu-in keima khut mahmah tawh laimal gol pipi-in lai ka hong gelh na mu uh hi.

¹²Note in na vun uh na at nadingun a hong hahbawl mite in mihoih ahihna uh kilangsak nuamin, a kimuthei nate a kisialhpih mite ahi uh hi. Singlamteh tungah Khrih a sihna thu hangin amaute in bawlsiatna a ngah loh nadingun a tuaci gamtat ahi uh hi.

¹³Vun-atna a zang mite nangawn in Thukham zuinuam tuan lo uh hi. Hih a pualam gamtatna thu note in na zuihna hangun kisialnuam uh ahih manin note in vun-atna na zat ding uh a hong deih uh ahi hi.

¹⁴Ahi zongin keimah in ahihleh, singlamteh tungah i Topa Jesuh a sihna thu bek ka kisialhpih ding hi. Bang hang hiam cih leh singlamteh tungah ama sihna hangin kei a dingin leitung thute misi bang a, kei zong, leitung thu-ah misi mah ka bang hi.

¹⁵Vun ki-atna le ki-at lohna a thupi om tuan lo a, mi thak nam pawl hih ding bek a thupi ahi hi.

¹⁶Hih ka thugenna a zui mite a kipanin Pasian’ mite khempeuh tungah Pasian in nopsakna le hehpihna thupha hong pia tahen.

¹⁷A tawpna-ah ka gennop thu in: Ka pum tunga om meimapawn pen Khrih sila ka hihna lim ahih manin kuamah in kei hong nawngkaisak nawn kei tahen.

¹⁸Sanggamte aw, note khempeuh tungah i Topa Jesuh Khrih hehpihna thupha hong tung tahen. Amen.