Read Tedim Chin EFESA 2 Bible Online

EFESA 2 - Tedim Chin bible

EFESA 2

¹A beisa hunah na thuman lohna uh le na mawhna uh hangin kha thu tawh kisai-ah a si na hi uh hi.

²Tuahun lai-in leitung gitloh gamtatnate na zui uh a, Pasian thu a um lo mite sungah tu laitakin na a sem, huihlak a ukte’ thu na mang uh hi.

³A taktakin eite khempeuh zong amaute mah i bang ngei a, i pianpih lungsim zui-in nungta-in, i pumpi le i lungsim deihna bangin i gamta hi. Tua ahih manin eite khempeuh zong Pasian’ hehna hangin gim a thuak dingte ihi hi.

⁴Tua bang hinapi-in Pasian’ hong hehpihna le eite hong itna lian mahmah ahih manin,

⁵i mawhna hangin kha thu tawh kisai-in misi ihih laitakin Khrih tawh eite hong nungtasak hi. Pasian’ hehpihna hangin hotkhiatna a ngah thei ihi hi.

⁶Khrih Jesuh tawh eite i kipawlna hangin vantungah amah tawh i ukkhawm theih nadingin sihna panin Pasian in a hong thokhawmsak hi.

⁷Khrih Jesuh tungtawnin a hong lah ama hehpihna le a hong itna bangzah takin lianin lamdang ahi hiam, ci-in a hong tung ding hunah a hong lah tawntung theih nadingin hih bangin a hong thokhawmsak ahi hi.

⁸Note’ upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi.

⁹Note’ hanciamna tawh a ngah hi lo na hih manun na kisialh nading uh a thu om lo hi.

¹⁰Eite a hong bawlpa pen Pasian hi a, Jesuh Khrih tawh i kipawl ciangin i nuntakna-ah gamtat hoih a nei dingin a hong bawl ihi hi. Hih pen eite’ omzia dingin a na ngaihsut kholhsa ahi hi.

¹¹Amau mahmah in amau pumpi tungah a hihna uh tawh vun a ki-at mite ka hi uh a ci Jew mite in, vun a ki-at lo mite a hong cih uh, na pian’ na patun Gentail mi ahi note in nidanga na omzia uh phawkkik dih un.

¹²Tuahun lai-in Khrih tawh na kikhen uh a, Pasian’ teel Israel minamte hi loin a pualam mite na hi uh hi. Pasian in ama mite tungah piak dingin a ciam thute zong a ngah dingte na hi kei uh a, Pasian a nei lo, lamet ding bangmah nei loin leitungah a om na hi uh hi.

¹³Ahi zongin a gamlapi-ah a om ngei hinapi-in tu-in Khrih Jesuh tawh na kipawlna hangun ama sihna in Pasian kiang hong tunpih hi.

¹⁴Khrih mahmah in Gentail mite le Jew mite pawlkhatin hong bawl ahih manin eite tungah nopsakna a hong piapa ahi hi. Hih minam nihte khenin gal a piangsak dalna pen Khrih in ama pumpi tawh a satkham hi.

¹⁵Amah tawh kipawlna hangin minam nihte pawlkhat a suahtheih nadingin minam a dei Jew Thukham le a ngeinate khempeuh phiatin, eite pawlkhat hong suahin a hong kilemsak hi.

¹⁶Singlamteh tungah a sihna tawh Khrih in kilangneihna beisak a, tua singlamteh hangin minam nihte pawlkhat suahin Pasian kiang a tunpih hi.

¹⁷Tua hi a, Khrih in Pasian tawh a kigamla no Gentail mite tung le Pasian tawh a kinai Jew mite tungah kilem nading Lungdamna Thuhoih a hong hilh hi.

¹⁸Khrih hangin Jew mi le Gentail mi ahi eite khempeuh, Kha Siangtho huhna tawh Pa Pasian kiangah i paithei hi.

¹⁹Tua ahih ciangin no Gentail mite pen a pualam mi, gamdang mite na hi nawn kei uh a, Pasian mite tawh minam khat hita-in, Pasian innkuan sung mite na hita uh hi.

²⁰Note zong, sawltakte le kamsangte in a phuhsa innkhuam tungah a kilam na hi uh a, tua inn sutpi pen Jesuh mahmah ahi hi.

²¹Tua inn sutpi Khrih pen inn-a a kilam khempeuh a puapi pen hi a, Topa a dingin biakinn siangtho a suah dongin tua inn a khangsak hi.

²²Note zong midangte tawh kigawmin ama tungah na kilam uh a, Kha Siangtho-in Pasian a ten nading inn na suak uh hi.