Read Tedim Chin FILIPPI 2 Bible Online

FILIPPI 2 - Tedim Chin bible

FILIPPI 2

¹Note, Khrih tawh kipawlin na nuntakna uh in note hong thahatsak hi. Kha Siangtho tawh kikhawlin, khatlekhat kihehpihin, dikna na kibawl uh hi.

²Tua ahih manin kei tawh ngaihsutna kibangin note khatlekhat ki-itin, khatlekhat lungsim kituakin na omna uh tawh keima lungdamna na hong cingtaaksak nadingun ka hong kun hi.

³Huaihamna lungsim le kisialh nopna lungsim tawh bangmah gamta kei un. Kiniamkhiat ciat unla, midangte thupi ngaihsutzaw un.

⁴Note’ phattuam nading bek ngaihsun kei unla, midangte’ phattuam nading ngaihsutsak zaw un.

⁵Note in Jesuh Khrih lungsim puakzia na nei un. Tua lungsim puak zia in:

⁶Jesuh Khrih in Pasian’ pianzia nei napi-in, Pasian tawh a kizakim theihna dingin thatanghat thu a suang kei hi.

⁷Amah kiniamkhiat tawm zaw a, nasem lim a hong puazaw hi. Mihing bangin amah hong kibawl a, mihing teekteek mah a hong sun hi.

⁸Amah hong kiniamkhiat tawm a, singlamteh tung nangawnah sih ding a ut hi.

⁹Hih thu hangin Pasian in a lianpenin amah koih a, min lian dang khempeuh sangin a min lianzaw-in a koih hi.

¹⁰Tua ahih manin vantung, leitung, leinuai-a om mi khempeuh in Jesuh pahtawi-in khukdin ding uh a,

¹¹Jesuh Khrih in Topa ahi hi, ci-in taangko-in Pa Pasian a min thangsak ding uh hi.

¹²Tua ahih ciangin ka hong it sanggamte aw, note tawh ka hong omkhawm lai-in ka thu na hong man’ tawntung uh mah bangin, tu-in note tawh ka hong omkhawm loh hun ciangin zong ka thu na hong man’ ding uh thupizaw lai hi. Pasian kihtakna le zahtakna tawh na maa uh nawt unla, amah in note hong hotkhiatna thu a cingtaak suaksak un.

¹³Bang hang hiam cih leh note in utna lungsim na neih nading uh le ama deihna na zuihzawh nadingun note sungah Pasian in a tawntungin na a hong sem ahi hi.

¹⁴Na khempeuh phun lo, thu nial loin sem un.

¹⁵Tua hileh a lungsim kawi, a hoih lo leitung mite lakah paubaanna a nei lo a siangtho, Pasian’ tate na hi ding uh a, nuntakna thu na genna uh hangin leitung mite lakah khuavak bangin na hoihna uh a kilang mite na hi ding uh hi.

¹⁶Tua hileh a beisa hunah ka sepna le ka hanciamnate a mawkna suak lo ding ahih manin Khrih hong paikik ni ciangin kei ka kisial thei ding hi.

¹⁷Note’ upna hangin biakpiakna-in keimah hong kigo hitaleh zong, note khempeuh mah bangin kei zong ka lungdam veve ding hi.

¹⁸Tua mah bangin note in zong hong lungdampih ta un.

¹⁹Note kiang panin thu ka zakna hangin ka lung a noptheih nadingin note kiangah Timoti ka hong paisak baih nadingin Topa Jesuh in hong huh ding hi, ci-in ka lamen hi.

²⁰Note ka hong lunghihmawh zahin amah bek mah in note hong lunghihmawhpih hi.

²¹Adangte in ahihleh Jesuh Khrih thu kinloin, amau’ aituam vai bek lunghimawh uh hi.

²²Ahi zongin Timoti ahihleh lungdamna thu nasepna-ah pata bang ka hih manun manpha mahmah hi.

²³Keima pianzia ding ka theihkhit phetin note kiangah Timoti ka hong paisak pah ding hi.

²⁴A sawt loin kei mahmah zong ka hong paitheih nadingin Topa in hong huh ding hi, ci-in ka muang hi.

²⁵Note in kamtai ding le keimah hong huh dingin na hong sawl uh, kei tawh na semkhawmin gal hong simpih, i sanggampa Epafroditas pen note kiangah ka hong ciahsakkik ding kisam hi, ci-in ka ngaihsun hi.

²⁶Amah in note hong munuam mahmah a, ama natna na zak manun amah zong lunghimawh mahmah hi.

²⁷Amah a ci na takpi a, zong si dektak hi. Ahi zongin Pasian in amah hehpih hi. Amah hehpih kei leh keima dahna kibehlapto sawnsawn ding ahih manin amah bek a hehpih hi loin kei zong a hong hehpih ahi hi.

²⁸Tua ahih manin amah na muh uh ciangin na lungdam theih nading uh le kei’ lunghihmawhna a kiam nadingin amah ka hong ciahsak ding ka kin semsem hi.

²⁹Khrih nasepna-ah note in pumpi tawh na hong huhkim theih loh manun note’ tangin amah in kei a hong huh manin a nuntakna hong pia-in sihlawh dektak hi. Tua ahih manin hih bang mite na zahtakbawl mahmah unla, Topa’ nasem taktak hi, ci-in lungdam takin na limbawl un.