Read Tedim Chin 1 THESALONIKA MASA 2 Bible Online

1 THESALONIKA MASA 2 - Tedim Chin bible

1 THESALONIKA MASA 2

¹Sanggamte aw, note kiangah ka hong painasa thu a mawkna a suahlohna thu nomau mahmah in na thei uh hi.

²Note in na theihsa uh mah bangin Thesalonika khua ka hong tun ma-un Filippi khua-ah simmawh bawlna le maizumna ka thuak uh hi. Tua bangin nakpitakin hong kilangbawlna hangin Pasian kiang panin a hong pai Lungdamna Thu note kiangah gen ngam nadingin i Pasian in kote sungah lungsim hanna a hong guan hi.

³Kote in thu ka hong hilh uh ciangin thuman lo, ngimna hoih lo le khemnopna lungsim tawh a hong hilh ka hi kei uh hi.

⁴Pasian in kote hong thei-in Lungdamna Thu a hilh dingin kilawm hong sa ahih mah bangin mite’ lungdam theih nadingin thu a hilh hi loin kote’ lungsim ngimna a hong thei Pasian’ lungkim nadingin thu a hilh ka hizaw uh hi.

⁵Tua ahih manin note in na theih uh mah bangin mite’ lungdam theih nading phatna kamte ka zang kei uh a, kote’ phattuam nading ngaihsutna tawh zong bangmah ka sem het kei uh hi. Hih bang ka hihna uh Pasian in hong thei hi.

⁶Khrih sawltakte ka hihna uh hangin phatna ka ngah ding uh a kilawm hinapi-in note le midangte, a kuamah peuh’ hong phat ding a zong ka hi kei uh hi.

⁷Note kiangah ka hong om lai-un nupite in a tate uh itna tawh a bawl bangin note ka hong bawl uh hi.

⁸Note hong it mahmah ka hih manun Pasian kiang panin a hong pai Lungdamna Thu bek hong gen loin, kote’ nuntakna mahmah zong note a dingin a pia ngamin ka om uh hi. Tua ahih manin kote’ hong muhna-ah note a manpha mahmah na hi uh hi.

⁹Sanggamte aw, ka nasep ka silbawlnate khempeuh uh note in na thei uh hi. Pasian kiang panin a hong pai Lungdamna Thu note kiangah ka hong hilhna hangun note in themkhat beek na gimlawhkhak loh nadingun a sun a zanin nakpitakin na ka sem uh hi.

¹⁰Note in hih thu na theih uh mah bangin Pasian in zong hong thei hi. Thu um note tungah kong gamtatnate uh siangtho-in thuman a, paubaan nading bangmah om het lo hi.

¹¹Pa in a tate a bawl bangin note ka hong bawlna uh na thei uh hi.

¹²Note hong hehnemin ka hong hanthawn uh a, amah tawh ukna le minthanna a ngahkhawm dingin a hong sam Pasian’ lungkimna bangin na gamtat theih nadingun ka hong gengen uh hi.

¹³Note kiangah Pasian’ thu ka hong gen uh ciangin no thu um mite sungah ama thu tawh kisai-in Pasian in na hong sem ahih manin kote’ thugente pen Pasian’ thu taktak ahih mah bangin kote’ thugenna na zak uh ciangin mihing’ thu bangin ngaihsun loin Pasian’ thu taktak mahin hong sang na hih manun, hih thu hangin zong Pasian’ tungah ka lungdamna uh ka ko uh hi.

¹⁴Tua ahih manin sanggamte aw, Judea gam sunga om, Khrih Jesuh thu a um, Pasian’ mi ahi mite in a thuak bangin note in zong a thuak na hi uh hi. Amaute in Jew mite’ bawlsiatna a thuak uh mah bangin note in zong note’ gam mite mah’ bawlsiatna na thuak uh hi.

¹⁵Tua Jew mite in Topa Jesuh le kamsangte that uh a, kote zong hong bawlsia uh hi. Pasian’ lungkim loh nadingin gamta uh a, mi khempeuh langbawl uh hi.

¹⁶Gentail mite tungah hotkhiatna thu ka gen ding uh hong khaktan uh ahih manin amau’ mawhnasate a behlap niloh a suak uh hi. Ahi zongin a tawpna-ah Pasian’ hehna amaute tungah a tungta hi.

¹⁷Sanggamte aw, kote ahihleh no tawh i lungsim a kikhen loh hangin tawlkhat sung i pumpi a kikhen sungin note ka hong phawk mahmah uh a, note kiangah hawhkik ding nakpitakin ka hanciam uh hi.

¹⁸Note kiangah hong hawhkik nuam ka hih manun note kiangah hawhkik ding ka hanciam zelzel hangun kong pai ding uh Satan in hong khaktan hi.

¹⁹Tua banga kong painopna uh pen, note bek mah kote’ lamet, ka lungdamna uh le kote’ gualzawhna lukhu na hi uh a, Topa Jesuh hong pai ciangin ama mai-ah kong kisialhpih ding uh na hi uh hi.

²⁰Kote’ thupi suahna le lungdamna pen note bek mah na hi takpi uh hi.