Read Tedim Chin 1 THESALONIKA MASA 3 Bible Online

1 THESALONIKA MASA 3 - Tedim Chin bible

1 THESALONIKA MASA 3

¹A tawpna-ah ka thuakzawh nawn loh uh ciangin Athen khua-ah kei le Silas omin,

²Khrih Lungdamna Thu hilhna-ah Pasian a dingin kote tawh na a semkhawm i sanggampa Timoti hong paisak le-ung hoihpen ding hi, ci-in ka ngaihsun uh hi. Amah in note hong hanthawnin na upna uhah hong kipsakin,

³hih bawlsiatna hangin note khat beek na puk loh nading uh deihna tawh a hong paisak ka hi uh hi. Hih bang bawlsiatna pen i thuak ding mah hi, ci-in note in zong na theih uh ahi hi.

⁴Bang hang hiam cih leh note tawh kong omkhawm lai-un zong, na theihsa uh bangin tu-a na thuak bangte teekteek mah uh a thuak ding hi hang, ci-in ka hong genkholhsa uh ahi hi.

⁵Tua ahih manin ka thuakzawh nawn loh ciangin note’ upna zia a thei dingin Timoti ka hong sawl hi. Dawimangpa’ ze-etna in note hong puksakkha-in, kote’ nasepna a mawkna suakkha ding hi, ci-in ka lunghimawh uh hi.

⁶Ahi zongin tu-in note kiang panin Timoti hong tungkhin a, note’ upna le nong itna uh thute a hong gen hi. Kote na hong lim ngaihsutnate uh le kote in ka hong muhnop uh mah bangin note in zong kote na hong muhnopna uh thute khempeuh a hong gen hi.

⁷Tua ahih manin sanggamte aw, note’ upna thu ka zak uh ciangin lungkham sinkhamna ka thuak laitakun ka tha uh hong hatsak hi.

⁸Topa’ thu-ah kiptakin om na hih manun tu-in ka husang theita uh hi.

⁹Tu-in note hangin Pasian tungah ka lungdamna uh ka ko theita uh a, note hangin ka lungdamna khempeuh uh, Pasian tungah ka ko uh hi.

¹⁰Pasian in eite maitang kimu-in hong omsak theih nading le note’ upna ka hong kicinsak theih nadingun a sun a zanin lungsim takpi tawh thu ka ngenngen uh hi.

¹¹Tu-in eite’ Pa ahi Pasian le i Topa Jesuh in note kiangah ka hong paitheih nading uh lampi hong honsak tahen.

¹²Kote in note ka hong it zahun, note khatlekhat na ki-itna uh le mi khempeuh na itna uh, hong liansak semsem tahen.

¹³Tua hileh i Topa Jesuh a mi siangthote khempeuh tawh hong pai ciangin eite’ Pa ahi Pasian’ mai-ah kisuanna om hetloin lungsim siangtho takin na om thei ding uh hi.