Read Tedim Chin 1 THESALONIKA MASA 4 Bible Online

1 THESALONIKA MASA 4 - Tedim Chin bible

1 THESALONIKA MASA 4

¹Tu-in sanggamte aw, Pasian’ deihna le ama lungkim nadingin bangci nuntak ding cih thu kote kiang panin na theihsa uh thute tawh kizui-in na nuntaksa uh ahih mah bangin a kicingzaw semsemin na nuntak nadingun i Topa Jesuh min tawh hong thumin ka hong hanthawn uh hi.

²Bang hang hiam cih leh Topa Jesuh min tawh ka hong thuhilhnate uh na theihsa uh ahi hi.

³Note a siangtho-in nungta-in numei tunga mawhna tawh na kipelh siangtho nading uh Pasian in hong deih hi.

⁴Pasian a thei lo dawibiate in kilunggulhna hang bek tawh a pumpi uh a zat bang hi loin, note in a kilawm a siangtho-in na pumpi uh bangci zat ding cih thu na theih ding uh hong deih hi.

⁶Hih bang thute-ah kuamah in Khrih sungah na sanggamte uh tungah na khialh loh nading uh le na khasiatsak loh nading uh hong deih hi. Pasian in hih bangin a gamta mite gim pia ding hi, ci-in khauhtakin note kiangah ka hong genkhol khinzo uh hi.

⁷Eite a thanghuai gamtat dingin Pasian in a hong sam hi lo a, a siangtho-in a nungta dingin a hong sam ahi hi.

⁸Tua ahih manin hih thute a thudon lo mi in mite a thudon lo hi loin, note tungah ama Kha Siangtho a hong pia Pasian a thusim lo ahi hi.

⁹Ahi zongin thu uppih mite it ding tawh kisai-in bangmah gelh ding na kisam nawn kei uh hi. Khatlekhat na ki-it nading uh Pasian in note tungah hong hilh khinzo hi.

¹⁰Masedonia gam sunga om thu um mi khempeuh na it khin takpi uh hi. Tua ahih manin sanggamte aw, itna na neih semsem nadingun ka hong thum uh hi.

¹¹Tu ma-a ka hong gensa uh mah bangin kamtam nuam se loin hoihtakin om hithiatna, no tawh a kisai thu bek ngaihsutna, le note’ nuntak nading na na sep nading uh hanciamin nei un.

¹²Tua bangin gamta le-uhcin thu um lo mite in note hong zahtak ding uh a, mite’ neihsa na duhgawh kei ding uh hi.

¹³Sanggamte aw, lametna a nei lo mite bangin na dahluat loh nadingun a sisa mite’ omzia ding thu na theih ding uh ka deih hi.

¹⁴Jesuh si-in thokik hi, ci-in i up mah bangin Pasian in Jesuh hong paipih kik ciangin amah umin a si mite zong hong tonpih ding hi, ci-in i um hi.

¹⁵Topa’ thugen note kiangah ka hong gen uh thu in: Topa hong paikik ni ciangin a nungta lai eite pen a sisa mite tawh i kimuh ma-in Topa tawh i kimu kei ding hi.

¹⁶Pasian’ thupiakna awging lianpi, vantungmi mangpa’ thugenna, le Pasian’ peengkul hong ging ding a, vantung panin Topa mahmah hong paisuk ding hi.

¹⁷Tua ciangin tua hun laitakin a nungta lai eite pen vankim lai-ah Topa a dawn dingin amah a um a sisa mite tawh hong kilakhawm ding a, Topa tawh i omkhawm tawntung ding hi, cihna ahi hi.

¹⁸Tua ahih ciangin note khatlekhat hih thu tawh na kihehnem un.