Read Tedim Chin 1 THESALONIKA MASA 5 Bible Online

1 THESALONIKA MASA 5 - Tedim Chin bible

1 THESALONIKA MASA 5

¹Ahi zongin sanggamte aw, hih thu hong pian ding hun tawh kisai kong gelh ding uh kisam lo hi.

²Bang hang hiam cih leh Topa hong pai ding Ni pen zan a gutate bangin theihkholh lohin hong tung ding hi, ci-in note in teltakin na theihsa uh ahi hi.

³Mite in, “Thu khempeuh a hoih laitak hi a, bangmah patauh nading om lo hi,” a cih laitakin thakhatthu-in amaute tungah siatna hong tungvat ding hi. Nausuah natna bangin gimna thuak ding uh a, kuamah suakta lo ding uh hi.

⁴Ahi zongin sanggamte aw, note ahihleh khuamial gamtatnate gamta lo na hih manun guta bangin tua Ni hong tunvat ciangin lamdang na sa kei ding uh hi.

⁵Bang hang hiam cih leh note khempeuh, khuavak gamtatna a nei, sun khuavak mite na hi uh a, eite pen khuamial gamtatna a nei, zan khuamial mite ihi kei hi.

⁶Tua ahih ciangin midangte bangin eite mawk om hithiat loin khua phawkin pilvang ni.

⁷Zan khuamial pen mite’ ihmut hithiat hun le zukham hun ahi hi.

⁸Ahi zongin eite pen khuavak gamtatna a nei sun khuavak mi ihih manin pilvang ni. Awmdal bangin upna le itna bulhin, siklukhu bangin i lamet hotkhiatna khu ni.

⁹Pasian in ama hehna a thuak dingin eite a hong teel hi lo a, i Topa Jesuh Khrih hangin hotkhiatna a ngah dingin a hong teel ahi hi.

¹⁰Amah a hong paikik ciangin a hing ihi a, a si ihi zongin amah tawh i omkhawm theih nadingin eite a dingin amah a hong si ahi hi.

¹¹Tua ahih manin tu laitakin na omzia uh mah bangin khatlekhat kihanthawnin na kihuh ciat ta un.

¹²Sanggamte aw, Topa in note lam a hong lak ding le a hong makai dingin a seh, note lakah na a hong sem mite, a kilawm a kituakin zahtakbawl un.

¹³Amau’ nasepna hangin amaute nakpitakin itbawlin zahtak un. Note khatlekhat kilem takin na om un.

¹⁴Sanggamte aw, a thadah mite hilh unla, a meidawite hanthawnin, a zawngkhal mite huh unla, hih bang mite ngongbawl kei un.

¹⁵Gitlohna lamsang kuamah kithuk loin, note khatlekhat tung le mi khempeuh tungah a pha kibawl ding ngaihsutpi-in na nei un.

¹⁶Lungdam tawntungin,

¹⁷thu ngen niloh unla,

¹⁸bangbang hong piang taleh na lungdamna uh Pasian tungah ko tawntung un. Khrih Jesuh tawh kipawlin na nuntakna sung uhah hih bangzia-in na om ding uh Pasian in a hong deih ahi hi.

¹⁹Kha Siangtho nasepna dongtangsak kei unla,

²⁰thuhilhnate simmawhbawl kei un.

²¹Thu khempeuh entel pha unla, a hoihte kemin,

²²a sia lamsang peuhmah pelh un.

²³Nopsakna a hong pia Pasian in na khempeuhah sianthona le kicinna hong pia hen la, na kha uh, na nuntakna uh, le na pumpi uh hoihtakin hong kem hen la, i Topa Jesuh Khrih hong pai ciangin mawhna khat zong a nei het lo dingin hong bawl tahen.

²⁴Note a hong sam i Pa Pasian a thutak hi a, a thuciamte khempeuh hong tungsak taktak ding hi.

²⁵Sanggamte aw, kote a’ ding thu hong ngetsak un.

²⁶Thu uppih mi khempeuh khatlekhat a siangtho ki-itna lungsim tawh kinamin na kihopih un.

²⁷Thu um mi khempeuh’ zak dingin hih lai na sim nadingun Topa’ min tawh ka hong thum hi.

²⁸I Topa Jesuh Khrih hehpihna thupha note tungah hong tung tahen.