Read Tedim Chin JOSHUA 1 Bible Online

JOSHUA 1 - Tedim Chin bible

JOSHUA 1

¹TOPA’ nasem Moses a sih khit ciangin TOPA in Moses’ nasem, Nun tapa Joshua kiangah,

²“Ka nasempa Moses si ta ahih ciangin tu-in ding inla, nang le hih mite khempeuh, hih Jordan kantanin Israel mite tungah ka piak gam sungah pai un.

³Moses tungah ka ciamsa bangin na khe in a totna mun khempeuh nang tungah kong pia hi.

⁴Sehnel gam le hih Lebanon panin gun lianpi Eufratis gun dong, ni a tumna lama Tuipi Lian lam, Hit mite’ leitang khempeuh nangma gam hi ding hi.

⁵Na nuntak sung tawntung kuamah in na mai hong khak zo lo ding hi. Moses tawh ka om mah bangin nang tawh zong kong om ding hi. Nang kong tamasak kei ding a, kong nusia kei ding hi.

⁶Thahat inla, hang in; bang hang hiam cih leh amaute piak dingin a pu a pate uh tungah ka ciam leitang hih mite na luahsak ding hi.

⁷Thahatin hang inla, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuhah hoihtakin na lamzan’ theih nadingin tuate khat zong pelh kei in.

⁸Hih thukham laibu na mangngilh ngei kei ding hi. A sunga kigelh thute khempeuh tawh kizui-in na gamtat theih nadingin sunlezanin na lungngaingai ding hi. Tua hileh na maa vang ding a, na nasep tangtung ding hi.

⁹Thu hong pia khin hi lo ka hi hiam? Thahat inla hang in. Lau kei inla lungkia kei in; bang hang hiam cih leh na paina peuhpeuhah TOPA na Pasian nang tawh hong om hi,” a ci hi.

¹⁰Tua ciangin Joshua in mi makaite thu pia-in,

¹¹“Giahphual ah pai unla, mite thu pia-in, ‘Na lam-an ding uh kigingkhol un; bang hang hiam cih leh TOPA na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi.

¹²Tua ciangin Joshua in Reuben mite, Gad mite, le Manasseh minam a langte tungah,

¹³“TOPA’ nasem Moses in note thu hong piakna kammal, ‘TOPA na Pasian un note tawlngakna mun hong pia-in, hih leitang note hong pia ding hi,’ a cihna thu phawk un.

¹⁴Moses in Jordan galkhat a note hong piak leitangah na zite uh, na taneute uh, le na ganhingte uh a na om ding uh hi. Ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in,

¹⁵note hong piak bangin TOPA in na sanggamte uh tungah tawlngakna pia-in, TOPA na Pasian un amaute a piak leitang amaute in zong a luah mateng uh na huh ding uh hi. Tua ciangin note’ neih leitangah ciahkikin, TOPA’ nasem Moses in Jordan gal ni a suahna lamah note hong piak leitang na luah ding uh hi,” a ci hi.

¹⁶Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi.

¹⁷Na khempeuhah Moses’ thu ka man’ uh mah bangin nangma thu zong kong mang ding uh hi. Moses a ompih mah bangin TOPA na Pasian in nang hong ompih ta hen!

¹⁸Na thupiakna le na thute, na thupiak peuhpeuh hong langpangin a mang lo mipa kithat ding hi. Thahat inla hang in,” a ci uh hi.