Read Tedim Chin JOSHUA 11 Bible Online

JOSHUA 11 - Tedim Chin bible

JOSHUA 11

¹Hazor kumpipa Jabin in Israel-te’ gualzawhna thu a zak ciangin amah in Madon kumpipa Jobab le Shimron kumpipa, Akshaf kumpipa,

²saklam mualtung le Khinneroth leitaw lama om Arabah gam sung, le Jordan gunkuam le nitumna lamah Nafathdor gam sunga om kumpite,

³nisuahna le nitumna lama om Kanaan mite, Amor mite, Hit mite, Perez mite, le mualtung gam a om Jebus mite, le Mizpah gam Hermon nuai-a Hiv mite tungah thu a puak hi.

⁴Tua ciangin amaute tampi a pha a galkap honpite tawh, a tam mahmah sakolte le leengte tawh, tuipi gei-a om sehnel bangin tampi tak hong kuankhia uh hi.

⁵Hih kumpite khempeuh in amau’ galkapte gawmin Israel mite tawh a kido dingin hong pai-in Merom lui-ah giahphual a sat khawm uh hi.

⁶Tua ciangin TOPA in Joshua kiangah, “Zing ciang tubang hunin amaute khempeuh a kithatsa-in Israel mite tungah pia ding ka hih manin amaute kihta kei un. A sakolte uh a zagui na sattat ding uh a, a leengte uh mei tawh na hal ding uh hi,” a ci hi.

⁷Tua ahih ciangin Joshua zong a galkapte khempeuh tawh thakhat thu-in Merom lui gei amaute kiangah pai-in va sim uh hi.

⁸TOPA in Israel-te’ khut sungah amaute pia a, amaute in vatgawpin a Lian Sidon le Misrefothmaim ciang dong, le nisuahna lamah Mizpeh kuam ciang dong delh uh a, amaute kuamah a om nawn lo dongin a vatgawp uh hi.

⁹TOPA’ sawl bangin Joshua in amaute hih a, amau’ sakolte uh a zagui sattat sakin mei tawh a leengte uh a halsak hi.

¹⁰Tua hun laitakin Joshua kihei kikin Hazor la a, namsau tawh a kumpipa a that hi. (Tua hun laitakin Hazor khua pen tua kumpipa gam khempeuh sungah a thahat pen ahi hi.)

¹¹Amaute in tua sunga om mi khempeuh namsau tawh that khinmang uh hi. Khat zong hingkhawi lo uh a, a khuapi uh zong a haltum uh hi.

¹²TOPA’ nasem Moses in a thupiaksa bangin Joshua in tua kumpite’ khuapite, le a kumpi khempeuh la-in namsau tawh amaute vatin thatmang khin hi.

¹³Ahih hangin Hazor khua longal mualtung a om khuapite khat zong Israel mite in hal lo uh a, Joshua in tua khua bek a hal hi.

¹⁴Israel mite in tua khuapite sunga van kinusiate le ganhingte amau’ galzawh van dingin a la uh hi. Ahih hangin amaute a thah khit matengun namsau tawh vatgawp uh a, khat beek hingkhawi lo uh hi.

¹⁵TOPA in ama nasem Moses a thupiak bangin Moses in zong Joshua thu pia a, Joshua zong tua bangmahin gamta a, TOPA in Moses a thupiaknate khempeuh a hihloh om lo hi.

¹⁶Tua ahih ciangin Joshua in gam khempeuh, mualtung gam le Negeb gam le Goshen gam khempeuh le lei niamna gam le Arabah le Israel-te’ mualtung gam le a lei niamna gamte,

¹⁷Seir lamah a kikhungto Halak Mual panin Hermon Mual nuai Lebanon kuama om Baalgad ciang dong a la hi. Amah in amau’ kumpite khempeuh la-in amaute vatgawpin a that hi.

¹⁸Hih kumpite khempeuh le Joshua sauveipi sung a kido hi.

¹⁹Gibeon khua-a teng Hiv mite longal, Israel mite tawh kilemna a bawl khuapi khat zong om lo hi. Amaute in tua khua dangte khempeuh simin a lak uh ahi hi.

²⁰Bang hang hiam cih leh TOPA in Moses a thupiakna bangin amaute a kisuksiat mang nading le hehpihna ngah loin a kibeisak theih nadingin Israel-te a do nadingin a lungsim uh a khauhsak pa pen TOPA ahi hi.

²¹Tua hun laitakin Joshua hong pai-in mualtung gam, Hebron, Debir, Anab, le Judah mualtung gam khempeuh, le Israel mualtung gam khempeuh panin Anak mite notkhiasiang a, Joshua in a khuapite uh tawh amaute susiamang khawm hi.

²²Israel mite’ leitangah Anak mite khat zong om nawn lo a, Gaza, Gath, le Ashdod sung bekah pawlkhat omlai hi.

²³TOPA in Moses tungah a gensa bangin Joshua in leitang khempeuh a la hi. Tua ciangin Joshua in amau minam tawh kizui-in a ngah ding bangin Israel mite tungah gamh-in a pia hi. Tua hun a kipan galdona panin tua gam a tawlnga hi.