Read Tedim Chin JOSHUA 13 Bible Online

JOSHUA 13 - Tedim Chin bible

JOSHUA 13

¹Tu-in Joshua teekin a kum tampi pha hi. TOPA in ama kiangah, “Nang teekin na kum tampi pha a, ahi zongin leitang lak ding tampi tak omlai hi.

²A omlai leitang: Filistia gam sung khempeuh, le Geshur gam khempeuh

³(Kanaan mite’ gam ci-a a kiciamteh, leilu lam Ekron gamgi lam, Egypt nisuahna lama om Shihor pan Filistia gam Gaza, Ashdod, Ashkelon, Gath, le Ekron gamte a uk mi nga om hi), le Avvim gam,

⁴leitaw lamah, Kanaan mite leitang khempeuh, le Sidon mite gam ahi Mearah gam Amor mite gamgi ahi Afek ciang,

⁵le Gebal mite’ leitang, le Lebanon gam khempeuh, nisuahna lamah, Hermon Mual nuai-a Baalgad panin Hamath tumna ciang,

⁶Lebanon le Misrefothmaim kikalah a teng Sidon mite khempeuh ahi hi. Kei mahmah in Israel mite’ mai panin amaute ka hawlkhia ding a, nang kong thupiaksa bangin Israel mite tungah a luah dingun leitang hawm in.

⁷Tua ahih ciangin tu-in minam kua le Manasseh minam alangte tungah luah dingin hih leitang hawm in,” a ci hi.

⁸Reuben mite le Gad mite in Manasseh minam alang dang khatte tawh TOPA’ nasem Moses in amaute a piaksa ahih manin nisuahna lam Jordan galkhatah gamh ngah khin uh hi.

⁹Arnon kuam mong a om Aroer pan, le kuam laizang a om khuapi, le Dibon ciang dong Medeba mualzang khempeuh;

¹⁰le Ammon mite’ gamgi ciang dong Heshbon-ah a uk Amor kumpi Sihon’ khuapi khempeuh;

¹¹Gilead, le Geshur mite le Maakath mite’ gam, le Hermon Mual khempeuh, le Salekah dong Bashan gam khempeuh;

¹²Ashtaroth le Edrei-ah a uk Bashan gam sunga Og kumpi gam khempeuh (Refaim-a a suak tate lakah amah bek om hi); Moses in hihte zo-in a hawlkhia hi.

¹³Ahi zongin Israel mite in Geshur mite ahi a, Maakath mite ahi zongin hawlkhia lo uh a, tuni dongin Geshur mite le Maakath mite Israel-te lakah a teng uh hi.

¹⁴Levi minamte tung bekah Moses in gamh pia lo hi. TOPA in Moses kiangah a gensa mah bangin Israel-te’ TOPA Pasian’ tungah a kipia mei tawh kihal biaknate pen amau’ gamh ahi hi.

¹⁵Tua ciangin Moses in Reuben minamte tungah amau’ beh tawh kizui-in gamh pia hi.

¹⁶Tua ahih ciangin amau’ gamh pen Arnon kuam gei-a a om Aroer pan, le kuam laizang a om khuapi, le Medeba kianga mualzang khempeuh,

¹⁷Heshbon tawh, le mualzang tunga om a khuapite khempeuh; Dibon, Bamothbaal, Bethbaalmeon,

¹⁸Jahaz, Kedemoth, Mefaath,

¹⁹Kiriathaim, Sibmah, le tua kuam mualtung a om Zereth-shahar,

²⁰Bethpeor, Pisgah pang suk, le Bethjeshimoth hi a,

²¹mualzang khuapite khempeuh, le Heshbon-ah a uk, Moses in Midian makaite Evi, Reke, Zur, Hur, le Reba, tua gam a teng Sihon’ uliante tawh a zawh khop ahi Amor kumpi gam khempeuh a huam ahi hi.

²²Beor’ tapa, aisan pa Balaam zong, Israel mite in adang a thahte lakah namsau tawh thatkhawm uh hi.

²³Reuben mite’ gampi pen Jordan ahi hi. Hihte pen amau’ beh tawh kizui-in a khuapite le a khuaneute tawh Reuben mite’ gamhluah ahi hi.

²⁴Tua ciangin Moses in Gad minamte tungah zong amau’ beh tawh kizui-in gamh pia hi.

²⁵Amau’ gam pen Jazer, le Gilead khuapite khempeuh, le Rabbah nisuahna lamah a om Aroer ciang dong Ammon mite’ leitang kimkhat,

²⁶le Heshbon panin Ramathmizpeh le Betonim ciang, le Mahanaim panin Debir gam ciang dong,

²⁷le Bethharam kuam sungah Bethnimrah, Sukkoth, le Zafon, Jordan galkhat nisuahna lam, Khinnereth Tuipi a niamna lam mong ciang, Jordan gamgi-in a nei, Heshbon kumpipa Sihon’ kumpi gam a omlai teng ahi hi.

²⁸Hihte pen amau’ beh tawh kizui-in a khuapite le a khuaneute tawh Gad mite’ gamhluah ahi hi.

²⁹Tua ciangin Moses in Manasseh minam alangte tungah amau’ beh tawh kizui-in gamh a pia hi.

³⁰Amau’ gam pen Mahanaim pan kipanin Bashan gam sung khempeuh, Bashan kumpipa Og’ kumpi gam sung khempeuh, le Bashan gam sunga om Jair khuapi sawmgukte,

³¹le Gilead alang, Ashtaroth, le Edrei, Bashan gam a Og’ kumpi gam khempeuh ahi hi. Hihte amau’ innkuan tawh kizui-in Makhir mi alangte a dingin Manasseh’ tapa Makhir mite tungah kipia hi.

³²Hihte pen Jerikho nisuahna lam Jordan galkhat, Moab zanglei-ah Moses in a hawm gamhte ahi hi.

³³Ahih hangin Levi minamte tungah Moses in gamh pia lo hi. Israel-te’ TOPA Pasian in amaute kiangah a gensa mah bangin amah pen amau’ gamh ahi hi.