Read Tedim Chin JOSHUA 16 Bible Online

JOSHUA 16 - Tedim Chin bible

JOSHUA 16

¹Josef’ suanlekhakte’ tanh gamgi pen Jerikho luite’ nisuahna lam, Jerikho kiang Jordan panin sehnel gamah pai a, Jerikho panin mualtung gamte tawnin Bethel-ah paito hi.

²Tua ciangin Bethel panin Luz-ah pai-in, Arkhi mite gam Ataroth nawk hi.

³Tua ciangin nitumna lam Jaflet mite’ gam lam Bethhoron a niam lam gam ciang dongah paisuk hi. Tua ciangin Gezer-ah pai-in tuipi-ah tawp hi.

⁴Josef’ suan Manasseh, le Efraim mite in amau’ gamhluah dingin hih gamte ngah uh hi.

⁵Amau’ behbehin Efraim mite’ gam pen a nuai-a bang ahi hi: Nisuahna lamah amau’ gamgi pen Atarothaddar pan Bethhoron tungnung ciang ahi hi.

⁶Tua panin tuipi ciangah a gamgi pai a, leilu lamah Mikmethath ahi hi. Tua ciangin nisuahna lam a gamgi Taanathshiloh lamah kual pai-in, nisuahna lam galah pai-in Janoah a tung hi.

⁷Janoah panin Ataroth le Naarah ah paisuk a, Jerikho banin Jordan-ah tawp hi.

⁸Tappuah panin nitumna lam Kanah lui-ah gamgi pai-in tuipi-ah tawp hi. Hih pen amau’ behbehin Efraim minamte’ gamhluah hi a,

⁹Manasseh mite’ gamhluah sung panin Efraim mite a dingin a kikhenkhia khuapite, a khuaneute tawh ahi hi.

¹⁰Ahi zongin amaute in Gezer sunga teng Kanaan mite hawlkhia lo uh hi. Tua ahih ciangin tuni dongin Kanaan mite pen Efraim mite lakah teng a, ahih hangin aana nasep a sem dingin sal a suak uh hi.