Read Tedim Chin JOSHUA 3 Bible Online

JOSHUA 3 - Tedim Chin bible

JOSHUA 3

¹A zing ciangin Joshua tho baihin Israel mi khempeuh tawh Shittim pan dingkhia-in Jordan gun tung uh a, a galkah ma-un tua munah a giak uh hi.

²Ni thum a cin ciangin giahphual ah uliante pai-in

³mite thu pia uh a, “TOPA na Pasian uh Thuciamna Singkuang Levi siampite in a puak na muh uh ciangin na omna panun dingkhia-in na zui ding uh hi.

⁴Hih lamah pai ngei lo na hih manun na pai nading uh lampi tu-a bangin na thei ding uh hi. Ahi zongin note le tua Thuciamna Singkuang kikalah mun awng, pi tulthum bang om ding hi. A gei-ah pai kei un,” a ci uh hi.

⁵Tua ciangin Joshua in mite kiangah, “Nomau mah kisiangsak tawm un; bang hang hiam cih leh zing ciangin note’ lakah TOPA in na lamdangte hong bawl ding hi,” a ci hi.

⁶Tua ciangin Joshua in siampite kiangah, “Thuciamna Singkuang la unla, mite’ mai-ah paisuak un,” a ci hi. Amaute in Thuciamna Singkuang la-in mite’ mai-ah a pai uh hi.

⁷Tua ciangin TOPA in Joshua kiangah, “Moses tawh ka omkhawm bangin nang tawh kong omkhawm nading thu amaute in a theih nadingun Israel mite khempeuh muhna-ah tuni-in nang liatsak ding ka kipan ding hi.

⁸Thuciamna Singkuang a pua siampite thu na pia ding a, ‘Jordan tuite’ gei na tun uh ciangin Jordan tui sungah tang loin na ding ding uh hi,’ na ci ding hi,” a ci hi.

⁹Tua ciangin Joshua in Israel mite kiangah, “Hih lai-ah hong pai unla, TOPA na Pasian uh thute za un,” a ci hi.

¹⁰Joshua in, “A nungta Pasian note lakah a omna hih thu tawh na thei ding uh hi. Amah in pel loin note’ mai panin Kanaan mite, Hit mite, Hiv mite, Perez mite, Girgash mite, Amor mite, le Jebus mite hawlkhia ding hi.

¹¹En un, leitung buppi’ TOPA’ Thuciamna Singkuang note’ mai Jordan lamah pai ding hi.

¹²Tua ahih ciangin tu-in Israel minamte sung panin nam khat pan mi khat, mi sawm le nih teel un.

¹³Leitung buppi’ TOPA ahi TOPA’ Thuciamna Singkuang a pua siampite’ khete in Jordan tui a sik ciangin Jordan tuite luang nawn lo ding a, a tunglam panin hong luangsuk tuite lomkhatin khawl ding hi,” a ci hi.

¹⁴Tua ahih ciangin mite’ mai-ah Thuciamna Singkuang a pua siampite tawh Jordan galkah dingin a puanbuk uh panin mite dingkhia-in,

¹⁵Thuciamna Singkuang a puate Jordan tung a, Thuciamna Singkuang a pua siampite’ khe tui-ah a kidiah ciangin (anlak hun sung khempeuh Jordan a piau khempeuhah let hi),

¹⁶a saklam panin hong luangsuk tuite khawlin khangto a, a gamlapi, Zarethan gei-a khuapi Adamah-ah a lomin kikhol a, Ci Tuipi a kici Arabah tuipi-ah a luangsukte kikhentat siang hi. Tua ciangin Jerikho gei-ah mite galkah uh hi.

¹⁷Israel-te khempeuh lei keu tungah a galkah sung, minam bup in Jordan a khen’ khit mateng, TOPA’ Thuciamna Singkuang a pua siampite Jordan gun laizang lei keu tungah ding uh hi.