Read Tedim Chin JOSHUA 4 Bible Online

JOSHUA 4 - Tedim Chin bible

JOSHUA 4

¹A minam bupin Jordan a galkah khit uh ciangin TOPA in Joshua kiangah,

²“Nam khat pan mi khat, mite lak panin mi sawm le nih teel inla,

³amaute thu pia-in, ‘Siampite’ khe a dinna mun mahmah, Jordan gun laizang panin suangtum sawm le nih la unla, a galah pua-in tu nitakin na giahna uh munah koih un,’ ci in,” a ci hi.

⁴Tua ciangin Joshua in nam khat panin mi khat, ama sehsa mi sawm le nihte Israel mite lak panin a sam hi.

⁵Joshua in amaute kiangah, “TOPA na Pasian uh Thuciamna Singkuang mai Jordan laizangah pai unla, note in Israel minam phazah tawh kizui-in suangtum khat ciat la-in na liangko tung uhah pua un.

⁶Hong tung ding hunah na tate un, ‘Hih suangtumte bang a cihnopna ahi hiam?’ ci-in hong dot ciangin note’ lakah lim khat hi ding hi.

⁷Tua ciangin amaute kiangah, ‘TOPA’ Thuciamna Singkuang mai-ah Jordan tuite kikhentan a, Jordan a galkah laitakun Jordan tuite kikhentan hi,’ na ci ding uh hi. Tua ahih ciangin hih suangtumte pen Israel mite tungah a tawntungin phawkna hi ding hi,” a ci hi.

⁸Joshua’ thupiak bangin Israel mite gamta uh a, TOPA in Joshua a thupiak bangin Israel minam a phazah tawh kizui-in Jordan laizang panin suangtum sawm le nih a la uh hi. Amaute in a giahna uh munah tuate pua-in a koih uh hi.

⁹Tua ciangin Joshua in Thuciamna Singkuang a pua siampite’ khe a dinnasa mun, Jordan laizangah zong suang sawm le nih mah a phut hi. Tuni dongin tua suangte tua mun mahah omlai hi.

¹⁰Bang hang hiam cih leh Moses in Joshua a thupiak bangin mite tungah a gen dingin TOPA in Joshua a thupiak khempeuh a vekpi-in a kiman khit matengin Jordan laizangah Thuciamna Singkuang a pua siampite a ding uh hi. Mite nawhsa-in galkah uh hi.

¹¹Mite khempeuh a galkah khit uh ciangin TOPA’ Thuciamna Singkuang le siampite, mite’ mai-ah na ma pai uh hi.

¹²Moses in amaute a sawlsa bangin Israel mite mai-ah hiam tawi-in Reuben minamte, Gad minamte, le Manasseh minam alangte na ma pai uh a,

¹³mi tul sawmli bang galdo dingin hiam tawi-in a baihsa-in Jerikho zanglei lam TOPA’ mai-ah a pai uh hi.

¹⁴Tua ni-in Israel-te khempeuh’ muhna-ah TOPA in Joshua liansak hi. Amaute in Moses lamdangsa-in a om uh mah bangin Joshua a nuntak sung tawntung lamdangsa-in a om uh hi.

¹⁵Tua ciangin TOPA in Joshua kiangah,

¹⁶“Thuciamna Singkuang a pua siampite Jordan panin hong paikhiat nading thu pia in,” a ci hi.

¹⁷Tua ahih ciangin Joshua in siampite thu pia a, “Jordan panin hong paikhia un,” a ci hi.

¹⁸TOPA’ Thuciamna Singkuang a pua siampite Jordan laizang panin hong paikhia-in, siampite’ khe lei keu tungah hong omtoh ciangin, a ngeina bangin amau’ munah Jordan tuite hong luangkikin a piau khempeuh a tuum hi.

¹⁹Kha masa a ni sawm ni-in Jordan panin mite paikhia uh a, Jerikho nisuahna lam gamgi Gilgal-ah giahphual sat uh hi.

²⁰Jordan panin a lakkhiat uh tua suangtum sawm le nihte Joshua in Gilgal-ah a phut hi.

²¹Tua ciangin amah in Israel mite kiangah, “Hong tung ding hunah na tate un, ‘Hih suangte bang a cihnopna ahi hiam?’ ci-in hong dot uh ciangin,

²²‘Israel-te in lei keu tungtawnin hih Jordan kantan hi,’ ci-in na tate uh na theisak ding uh hi.

²³Bang hang hiam cih leh eite in i kantan khit matengin TOPA na Pasian un a kansak San Tuipi tungah a bawl bangin, note in na kantan khit matengun TOPA na Pasian un Jordan tuite note a dingin kangsak hi.

²⁴TOPA vanglian mahmah hi, ci-in leitung mi khempeuh in a theih nading le TOPA na Pasian uh na zahtak tawntung theih nading uh ahi hi,” a ci hi.