Read Tedim Chin JOSHUA 6 Bible Online

JOSHUA 6 - Tedim Chin bible

JOSHUA 6

¹Tu-in Israel mite’ hangin Jerikho kulhkongpi kikhakcip a, kuamah pusuak thei lo, sungtum thei lo hi.

²Tua ciangin TOPA in Joshua kiangah, “Thei in, na khut sungah a kumpipa le a mi thahatte tawh Jerikho khua kong pia khin hi.

³Khuapi kimkotah galkap mi khempeuh khatvei na pai ding uh hi. Tua bangin ni guk sung na pai ding uh hi.

⁴Siampi sagih in Thuciamna Singkuang mai-ah tuutal ki peengkul sagih tawi ding uh hi. A ni sagih ni-in khuapi kimkotah sagihvei na pai ding uh a, siampite in peengkul tum ding uh hi.

⁵Amaute in tuutal ki sauveipi a ginsak khit uh ciangin, peengkul aw na zak phetun nakpitakin mi khempeuh awng ding uh hi. Khuapikulh cimmai ding a, mi khempeuh amau mai ciatah tangtakin khuapi sungah paisuak ding uh hi,” a ci hi.

⁶Tua ahih ciangin Nun tapa Joshua in siampite samin amaute kiangah, “Thuciamna Singkuang la unla, tua TOPA’ Thuciamna Singkuang mai-ah siampi sagihte tuutal ki peengkul sagih tawisak un,” a ci hi.

⁷Tua ciangin amah in mite kiangah, “Mai nawtin pai un. Khuapi kimkotah pai unla, TOPA’ Thuciamna Singkuang mai-ah hiam tawi mite paisak un,” a ci hi.

⁸Joshua in mite a thupiak bangin TOPA’ mai-ah a pai tuutal ki peengkul a tawi siampi sagihte mai nawtin pai-in peengkul tum uh a, TOPA’ Thuciamna Singkuang in amaute zui hi.

⁹Tua ciangin peengkul a tum siampite’ mai-ah hiam tawi mite pai uh a, peengkulte a kitum suak hun laitakin Thuciamna Singkuang nungah a nungdalte a pai uh hi.

¹⁰Ahih hangin Joshua in mite thu pia-in, “Awng un, ci-a kong sawl hun matengin note awng loin, na aw uh zong na kizasak kei ding uh a, na kam panun aw khat beek gingkhia lo ding hi. Awng un, kong cih ciangin na awng bek ding uh hi,” a ci hi.

¹¹Tua ahih ciangin amah in TOPA’ Thuciamna Singkuang khuapi kimkotah khatvei paisak a, amaute hong ciahkikin giahphual ah a zan giak uh hi.

¹²Tua ciangin zingsangin Joshua tho baih a, siampite in TOPA’ Thuciamna Singkuang a la uh hi.

¹³TOPA’ Thuciamna Singkuang mai-ah a pai tuutal ki peengkul sagih a tawi siampi sagihte paisuakin peengkulte tumsuak uh hi. Amaute’ mai-ah hiam tawite pai-in, peengkulte a kitum suak hun laitakin TOPA’ Thuciamna Singkuang nungah a nungdalte a pai uh hi.

¹⁴A ni nih ni-in khuapi kimkotah khatvei pai uh a, giahphual ah ciahkik uh hi. Tua bangin ni guk sung a hih uh hi.

¹⁵A ni sagih ni-in khuavak tungin tho baih uh a, tua bangmahin khuapi kimkotah sagihvei a pai uh hi. Tuani bekin khuapi kimkotah amaute sagihvei pai uh hi.

¹⁶A sagih veina-ah, siampite in peengkul a tum ciangin Joshua in mite kiangah, “Awng un; bang hang hiam cih leh TOPA in khuapi note hong piazo hi.

¹⁷Khuapi le a sunga omte khempeuh pen TOPA’ tungah biakna-in kisusia ding hi. Amah in i sawl kamtaite na seel ahih manin numei paktat Rahab le ama inn sungah amah tawh a omkhawmte khempeuh bek hing ding hi.

¹⁸Ahih hangin suksiat dingin a kiseh nate panin nomau mah na kikem ding uh hi. Tua hikeileh tuate na suksiat ding uh ciangin a kisusia ding nate khat peuhpeuh iplahin la kha-in Israel-te’ giahphual sungah siat nading na khat suaksakin haksatna na tun kha ding uh hi.

¹⁹Ahih hangin ngun le kham, sumngo le sik tawh kibawl nazatte TOPA a dingin a siangtho ahi hi. TOPA’ sumkoihna-ah tuate tung ding hi,” a ci hi.

²⁰Tua ahih ciangin mite awng a, peengkulte kitum hi. Mite in peengkul aw a zak phetun nakpitakin awng uh a, kulhpi cimmai-in, mi khempeuh amau mai ciatah tangtakin khuapi sungah pai uh a, khuapi a la uh hi.

²¹Tua ciangin amaute in khuapi sunga om khempeuh numei le pasal, a moi a ham, bawngtalte, tuute, le late khempeuh namsau tawh thatmang khin uh hi.

²²Tua ciangin Joshua in tua gam thu a va kansim mi nihte kiangah, “Numei paktat nu’ inn-ah va pai unla, tua lai panin a numei le amah tawh a kizom khempeuh, ama tungah na ciamsa bangun hong paikhiatpih un,” a ci hi.

²³Tua ahih ciangin thu kansim tangvalte va tum uh a, Rahab, a nu, a pa, a sanggamte, le amah tawh a kizom khempeuh a paikhiatpih uh hi. Amaute in tua nu’ tanau teng khempeuh paipih uh a, Israel-te’ giahphual pualamah a koih uh hi.

²⁴Amaute in khuapi le a sunga om khempeuh mei tawh hal uh a, ngun le kham, sumngo le sik tawh a kibawl nazatte bek TOPA’ inn-a sumkoihna-ah a koih uh hi.

²⁵Ahih hangin numei paktat Rahab, le tua nu tawh a kizomte khempeuh Joshua in a hingkhawi hi. Jerikho khua thu a kansim dingin Joshua in a sawl kamtaite tua nu in na seel ahih manin tuni dongin Israel mite lakah a suanlekhakte a teng uh hi.

²⁶Tua hun laitakin Joshua in amaute tungah thuciamna khat koih a, “Mi khat kipanin hih Jerikho khuapi a lamkik pa in TOPA’ mai-ah samsiatna thuak tahen. A tacil luang khaamin tua khuapi bulpi phut ding a, a tapa neupen luang khaamin a kulhkongpite phut ding hi,” a ci hi.

²⁷Tua bangin TOPA in Joshua ompih a, gam khempeuhah ama min a thang hi.