Read Tedim Chin JOSHUA 8 Bible Online

JOSHUA 8 - Tedim Chin bible

JOSHUA 8

¹Tua ciangin TOPA in Joshua kiangah, “Lau kei inla lungkia kei in. Galkap khempeuh nang kiangah la inla, kithawi-in Ai-ah paito in. Nangma khut sungah Ai kumpipa le a mite, a khuapi, le a leitang kong piak khitna thei in.

²Jerikho le a kumpipa tungah na bawl bangin Ai le a kumpipa tungah na bawl ding a, a van kinusiate le a ganhingte bek note a dingin na la ding uh hi. A khuapi nungah a khuapi a sim dingin na buksim ding uh hi,” a ci hi.

³Tua ahih ciangin Joshua le galkap khempeuh Ai-ah a paito dingin kipan uh hi. Joshua in a tha kicing mi thahat tul sawmthum teel a, zanin tua mite a sawlkhia hi.

⁴Amah in amaute thu pia a, “En un, tua khuapi a sim dingin a nungah na buksim ding uh a, khuapi panin gamlapi-ah na pai kei ding uh hi. Ahih hangin a kigingsa-in na om ding uh a,

⁵tua ciangin keimah le kei tawh a om mite khempeuh in khuapi kong naih ding uh hi. A masa bangin kote a do dingin hong kuankhiat uh ciangin amaute’ mai-ah kote ka na tai khem ding uh hi.

⁶Khuapi panin amaute hong paikhiat khit uh matengin kote hong delh ding uh hi. Bang hang hiam cih leh amaute in ‘A masa-a bangin eite’ mai-ah amaute tai uh hi,’ ci ding uh hi. Tua ahih ciangin amaute kiang panin ko ka tai ding uh hi.

⁷Tua ciangin na buksimna panun note na kipan ding uh a, khuapi na la ding uh hi. Bang hang hiam cih leh TOPA na Pasian un note’ khut sungah hong pia ding hi.

⁸Khuapi na lak khit uh ciangin TOPA’ hong sawlna bangin hihin, mei tawh khuapi na hal ding uh hi. Note thu kong piak khitna thei un,” a ci hi.

⁹Tua ahih ciangin Joshua in amaute a sawlkhia hi. A buksimna ding uh munah amaute pai-in, Ai nitumna lam, Bethel le Ai kikalah pang uh a, ahih hangin tua zanin giahphual a mite lakah Joshua omlai hi.

¹⁰Zingsangin Joshua tho baihin mite sam a, mite’ mai-ah Israel upate tawh Ai-ah a paito uh hi.

¹¹Amah tawh a om galkap khempeuh paito uh a, khuapi mai naihin Ai leilu lampangah phual sat uh a, Ai le amaute’ kikalah luihawm khat om hi.

¹²Tua ciangin amah in mi tulnga bang paipihin, khuapi nitumna lam Bethel le Ai kikalah a buksim dingin a koih hi.

¹³Tua ahih ciangin galkapte, khuapi leilu lamah a phualpi le khuapi nitumna lamah a nungdalte a koih uh hi. Ahih hangin tua zanin Joshua kuam sungah a om hi.

¹⁴Ai kumpipa in hih thu a theih ciangin amah le tua khuapi mi khempeuh, Israel-te a do dingin manlangin kithawi-in Arabah lam paisukna-ah zingtungin a kuankhia uh hi. Ahih hangin khuapi nungah amah a buksim a omlam thei lo hi.

¹⁵Tua ciangin amau’ mai-ah Joshua le Israel-te khempeuh kilelsak khem uh a, gamlak lamah a tai uh hi.

¹⁶Tua ahih ciangin khuapi sunga om mi khempeuhte amau a delh dingin kikaikhawm uh a, Joshua a delh uh ciangin amaute khuapi panin a kihemkhia ahi hi.

¹⁷Ai khuasung pan Israel-te a delh lo pasal khat beek om lo uh a, khuapi kong honsa-in nusia-in Israel-te a delh uh hi.

¹⁸Tua ciangin TOPA in Joshua kiangah, “Na khutsunga om teipi Ai lamah zan in. Bang hang hiam cih leh na khut sungah tua khua kong pia ding hi,” a ci hi. Tua ciangin Joshua in a khutsunga om teipi khuapi lamah a zan hi.

¹⁹Tua ciangin a buksimte diangkhia pah uh a, amah in a khut a zan khit phetin amaute tai-in khuapi sungah lut uh a, a khuapi la-in manlangin a hal uh hi.

²⁰Ai mite in a nung et kik uh ciangin, khuapi meikhu vanah a kahto a mu uh hi. A nung a mai koimahah tai thei lo uh hi. Bang hang hiam cih leh gamlak lamah tai-in a kilelsak khemte in amau a delhte’ lamah hong kihei-in lehdelh kik uh hi.

²¹A buksimte in khuapi a lak khitna le khuapi meikhu a kahtohna Joshua le Israel khempeuh in a muh uh ciangin amaute kihei kikin Ai mite vatgawp uh hi.

²²Tua ciangin Ai khua mite a do dingin khuapi panin Israel dangte hong kuankhia uh hi. Tua ahih ciangin Israel-te’ kikalah amaute om uh a, pawlkhat hih lamah pawlkhat hua lamah om uh ahih manin a suakta khat zong a om lo dongin Israel-te in amaute a vatmai uh hi.

²³Ahih hangin amaute in Ai kumpipa hingmatin Joshua kiangah a paipih uh hi.

²⁴Amaute in a delhna gamlakah Ai khuami khempeuh thatin, amaute khempeuh a bei dongin namsau tawh a thah uh a man khit uh ciangin, Israel-te khempeuh Ai-ah paikikin Ai khuami a omlaite namsau tawh a vatgawp uh hi.

²⁵Tua ni-in a si, Ai mi khempeuh numei le pasal a vekpi-in tul sawm le tulnih ahi hi.

²⁶Bang hang hiam cih leh Ai khuami khempeuh a suksiatmang khit matengin amah in a teipi a zanna a khut dokkik lo hi.

²⁷Amah in Joshua a thupiak, TOPA’ thugenna bangin Israel-te in ganhing le khuapi sunga van kinusiate bek a la uh hi.

²⁸Tua ahih ciangin Joshua in Ai hal a, tuni donga a om mah bangin nin khol napi khatin piangsak den hi.

²⁹Tua ciangin amah in nitak mateng sing khat tungah Ai kumpipa a khai hi. Ni a tum ciangin Joshua in thu pia a, amaute in sing tung panin a luang la sukin, khuapi kulhkongpi lutna-ah paai uh a, a tungah suangtum lompi ciang uh a, tuni dongin tua suangcian omlai hi.

³⁰Tua ciangin Joshua in, Moses Thukham Laibu sungah, “A kiseek lo suangte tawh a kibawl biakna tau, kuamah in a tungah siknazat a lik loh,” ci-in a kigelh mah bangin, TOPA’ nasem Moses in Israel mite a thupiakna bangin, TOPA, Israel mite’ Pasian a dingin Ebal Mual tungah biakna tau khat a bawl hi. Tua ciangin amaute in tua tungah TOPA a dingin meihal biaknate pia-in, thunuama biaknate a go uh hi.

³²Tua lai mun, Israel mite’ omna-ah, Moses in a gelhsa a thukhamte tua suangte tungah a gelh hi.

³³Tua ciangin Israel mite in thupha a ngah theih nadingun TOPA’ nasem Moses in a thupiaksa bangin Israel mite khempeuh peemta hitaleh tualsuak hitaleh, a upate le a uliante le a thukhente uh tawh, TOPA’ Thuciamna Singkuang a pua Levi siampite’ mai, Thuciamna Singkuang langkhat, Gerizim Mual mai lamah mi alang, Ebal Mual mai lamah mi alang a ding uh hi.

³⁴Tua khit ciangin amah in thukham laibu sunga a kigelh bangbangin thukham kammal khempeuh, thupha le samsiatnate a sim hi.

³⁵Moses in a thupiak kammalte khempeuh Israel mihonpite, numeite, le amaute lakah a teng peemtate mai-ah Joshua in a simloh khatzong om lo hi.