Read Tedim Chin 2 THESALONIKA NIHNA 2 Bible Online

2 THESALONIKA NIHNA 2 - Tedim Chin bible

2 THESALONIKA NIHNA 2

¹Sanggamte aw, i Topa Jesuh Khrih hong pai nading thu le amah a dawn dingin eite i kikhop nading thu tawh kisai-in note kiangah kong thum nopna uh panin:

²Topa’ hong pai ding ni hong tung khinta hi, ci-a thu kigenna hangin lunghimawhin lungmangin om kei un. Thuhilh khat peuhpeuh in hih bang thu hong genkha thei ding a, tua thu pen kote’ gen leh gelh hi, ci-in zong genkha ding uh hi.

³Ahi zongin kuama khemsa-in ta kei un. Bang hang hiam cih leh nakpitakin Pasian langpanna lianpi le hell khuksung a tung ding ahi A Gilopa hong kilat matengin tua Ni hong tung lo ding hi.

⁴Tua A Gilopa in mite’ biak pasian a kici khempeuh le na khempeuh nialgawp ding hi. Tuate khempeuh sangin a lianzaw-in a kingaihsut banah, Pasian ka hi hi, ci-in Pasian’ biakinn sung mahmahah pai-in va tu ding hi.

⁵Note tawh ka hong omkhawm lai-in hih thute khempeuh hong genkhin ka hih manin na phawk lai ding uh hi.

⁶Ahi zongin tu laitakin tua bang a pian loh nadingin a kham khat om ahihna thu na thei uh hi. A hun a tun ciangin A Gilopa hong kilang ding hi.

⁷Kuamah kim in a phawk loh Gitloh Gamtatna kigamta khinta a, ahi zongin hih thu a pian ding a khamcip pa a kilakkhiat khit matengin a hong piang ding thu hong piang nai lo ding hi.

⁸A khamcip pa a kilakkhiat khit ciangin A Gilopa hong kilang ding a, Topa Jesuh hong pai ciangin tua A Gilopa mutlum ding a, vanglian minthangin hong kilatna tawh a maimangsak ding hi.

⁹Satan’ vangliatna tawh A Gilopa hong pai-in, lim le nalamdang a tuamtuamte hong bawl ding a,

¹⁰gitloh khemna a nam tuamtuam zangin, siatna a thuak ding mite a khem ding hi. Tua bang mite in a suahtak nadingun thuman sang nuam lo, deih lo uh ahih manin siatna a tuak uh ahi hi.

¹¹Tua ahih manin Pasian in amaute lakah nasem dingin zuau thahatna paisak ahih manin amaute in a man lo thu um uh hi.

¹²Tua ahih manin thuman um loin, mawhna sungah nuam a sa khempeuh in mawhsak thukhenna thuak ding uh hi.

¹³Ahi zongin sanggamte aw, Topa in note hong it a, Kha Siangtho vangliatna hang le note in thuman na upna uh hangin ama mi siangthote na suah nadingun nopsakna a ngah masa dingin Pasian in note hong teel ahih manin note hangin Pasian tungah lungdamna ka ko tawntung uh hi.

¹⁴Topa Jesuh Khrih tawh minthanna na ngahkhawm theih nadingun note tungah ka hong hilh uh Lungdamna Thu tawh hih nopsakna ah Pasian in note a hong sam ahi hi.

¹⁵Tua ahih ciangin sanggamte aw, kam tawh ahi a, lai tawh ahi zongin ka hong hilh uh thumante limtakin zui unla, kiptakin om un.

¹⁶I Topa Jesuh Khrih mahmah leh, eite hong itin, a hong hehpihna tawh thakhauhna le lametna a hong pia tawntung eite’ Pa Pasian in

¹⁷note lungsimah thakhauhna hong guan hen la, a hoih thu khempeuh genin a semzo dingin na tha uh hong hatsak tahen.