Read Tedim Chin 2 THESALONIKA NIHNA 3 Bible Online

2 THESALONIKA NIHNA 3 - Tedim Chin bible

2 THESALONIKA NIHNA 3

¹Sanggamte aw, tu-in note lak mah bangin mun dangah zong Topa’ thu manlang takin kizel pakin lungdam takin a kisan’ theih nadingin kote a’ ding thu hong ngetsak un.

²Mi khempeuh in thu um nai lo uh ahih manin a gilo a siahuai mite panin Pasian in kote hong hotkhiat nadingin zong hong ngetsak un.

³Note ahihleh, Topa citak mahmah ahih manin hong thahatsak ding a, A Gilopa kiang panin hong honkhia ding hi.

⁴Note kiangah ka hong gen uh thute a kipat cil a kipanin na zuih uh mah bangin zui paisuak taktak ding, ci-in note muanna lungsim kote sungah Topa in hong guan hi.

⁵Pasian bangin itna nei-in Khrih thuak bangin na thuakzawh nadingun Topa in note lungsim hong bawlsak tahen.

⁶Sanggamte aw, i Topa Jesuh Khrih min tawh kong sawlnop uh thu panin: Note tungah ka hong hilhsa uh thute a zui lo, a thadah gamtat thu uppih mite tawh na kikhawl kei un.

⁷Kote’ gamtatzia bangin a gamta ding na hihna uh teltakin na thei uh hi. Note tawh ka hong omkhawm lai-un ka thadah om kei uh hi.

⁸Kuama an a khongin ka ne kei uh hi. Note khat peuhpeuh in nong suplawhkhak loh nadingun a sun a zanin hahkat takin na ka sem uh hi.

⁹Hih bangin ka gamtatna uh pen note’ hong piakte a khongin ne-in a zang dingin a kilawm mah hinapi-in, note’ etteh ding gamtatzia a hong lak ka hizaw uh hi.

¹⁰Note tawh ka hong omkhawm lai-un, “Na a sem nuam lo mi peuhmah an nesak kei un,” ci-in ka hong gen uh hi.

¹¹Hih bangin thu ka hong genna uh pen note lakah mi pawlkhatte thadahin na sem nuam lo uh a, midangte’ nasepna va nawngkaisak zawsop hi, ci-in ka zakna hang uh ahi hi.

¹²Tu-in tua bang mite in kuamah nawngkaisak nawn loin man manin na sem hiathiatin amau’ nuntak nadingun na a sep nadingun Topa Jesuh Khrih min tawh hanthawnin thu ka hong pia uh hi.

¹³Sanggamte aw, note in a hoihin gamtat ding na cimtak ngei het kei ta un.

¹⁴Hih lai sunga ka hong gente uh a zui nuam lo mi khatpeuh a om leh tua mipa limtakin ciamteh unla, amah a maizum theih nadingin kikholhpih nawn kei un.

¹⁵Ahi zongin amah galbawl kei unla, thu uppih mi khat hihna tawh hilhbawl zaw un.

¹⁶Eite tungah nopsakna a hong pia thei Topa in note tungah a tawntungin nopsakna hong pia hen la, amah in note khempeuh hong ompih tahen.

¹⁷Keimah Paul in kong hopih hi, cihna kammal teng keima khut tawh ka hong gelh ahi hi. Keima laikhak khempeuh hih bangzia-in ciamtehin ka hih ngeina ahi hi.

¹⁸I Topa Jesuh Khrih hong hehpihna thupha note khempeuh tungah hong tung tahen.