Read Tedim Chin 1 TIMOTI MASA 2 Bible Online

1 TIMOTI MASA 2 - Tedim Chin bible

1 TIMOTI MASA 2

¹A masa penin kong gennop thu in: Mi khempeuh a dingin Pasian tungah ngetna, thungetna, thumna le lungdamkohna na neih ding uh ahi hi.

²Eite nuamtakin omthei-in, biakna lungsim nei-in a kilawm takin i nuntak theih nadingin kumpite le uliante a dingin thu na ngetsak un.

³Hih bang gamtatnate pen eite hong Hon Pasian’ muhna-ah a hoih a kilawm thu ahi hi.

⁴Mi khempeuh in hotkhiatna ngahin, thuman a theihkim ding Pasian in deih hi.

⁵Bang hang hiam cih leh Pasian khat bek om a, Pasian le mite a hong kilemsakkik thei Khrih Jesuh khat bek om hi.

⁶Mi khempeuh a tankhia dingin tua Jesuh hong kipiatawm a, a hun lian laitakin a hong kipiakna pen Pasian in mi khempeuh a hotkhiat nopna thu a kilatna ahi hi.

⁷Hih ka gen thu pen zuau ahi lo, thu taktak a gen ka hi a, Gentail mite lakah upna thu le hih thuman a gen dingin sawltak na semin thu a hilh dingin kei a hong kisawl ahi hi.

⁸Mun khempeuhah a om pasal khempeuh in kuamah tawh kitotna le lungsim kinopmawhna nei hetloin, lungsim siangtho tawh a khut uh lamin thu a nget ding uh ka deih hi.

⁹Tua mah bangin numeite zong a kilawm a kituak bekin kizemin kipuahin, sam khawng a uanglua-in bawl loin, a khengvalin kizepna a tuamtuamte zang loin,

¹⁰biakna lungsim neite a dingin a kilawm ahih mah bangin gamtat hoih a neih ding uh ka deih hi.

¹¹Numeite in gamdai takin kiniamkhiatna tawh thu ngai-in a sin ding uh ahi hi.

¹²Numeite in pasalte tungah aana nei-in thu a hilh ding ka phalkei hi. Gamdai takin a om ding uh ahi hi.

¹³Bang hang hiam cih leh a masa-in Adam kipiangsak a, tua ciangin Eve kipiangsak pan hi.

¹⁴Adam in khemna thuak masa lo a, numei in thuakin a khial masa a suak hi.

¹⁵Ahi zongin numei in a kilawm a kituakin upna, itna le sianthona thu-ah kiptakin a om nakleh nausuah gimna sihpih lo ding hi.