Read Tedim Chin 1 TIMOTI MASA 3 Bible Online

1 TIMOTI MASA 3 - Tedim Chin bible

1 TIMOTI MASA 3

¹Mi khatpeuh, pawlpi sia nasep a ut leh a hoih mahmah ahi hi, a cihna thu a man ahi hi.

²Tua ahih manin siate pen paubaanna a nei lo mi, zi khat bek a nei mi, lungsim hoih hithiat mi, thu a ngaihsun thei mi, a kilawm a kituakin a gamta mi, zin le leengla do a siam mi, thuhilh a siam mi,

³zu a kham lo mi, a ngongtat lo mi, lungsimnem mi, kitot a uk lo mi, sum a deihlua lo mite hi ding uh hi.

⁴A innkuan sung hoihtakin a ukzo mi, a tate thumangsak thei-in, na khempeuhah a kilawm a kituakin a gamtasak thei mi hi ding uh hi.

⁵Bang hang hiam cih leh mi khatpeuh in a innkuan sung ukzia ding a theih kei leh Pasian’ pawlpi kem thei lo ding hi.

⁶Khristian a suaktungte zong hi lo ding hi. Tua bang mi thakte kiphasak thei a, Dawimangpa mah bangin thukhenna a thuak mite hikha thei ding hi.

⁷Pawlpi mi ahi lo midangte in zong a zahtak mite hi ding hi. Tua hileh mindai kha lo ding a, Dawimangpa’ thangah awk kha lo zawdeuh ding hi.

⁸Pawlpi upa dingte zong a gamtat hoih, a lungsim citak, leenggahzu tam a ne lo, sum thu-ah a huaiham mi hi lo ding uh hi.

⁹Lungsim kisuanna a om lo, upna thu-ah a kip mite hi ding uh hi.

¹⁰A masa-in kize-et phot ding a, paubaanna a om kei leh sem thei pan ding uh hi.

¹¹A zite uh zong a gamtat hoih mi hi-in, mi gensiat a hat lote hi ding uh a, lungsim citak, thu khempeuhah a thuman mi hi ding uh hi.

¹²Upate pen zi khat bek a nei mi, a tate le a innkuansung hoihtakin a ukzote hi ding hi.

¹³Pawlpi upa hoihtakin a semthei mite pen mite in zahtak uh a, Khrih Jesuh a upna thu uh kisuanna om hetloin hangtakin gen ngam uh hi.

¹⁴Nang kiangah hong pai-in nang tawh kimu baih ding cih lametna tawh hih lai a hong gelh ka hi hi.

¹⁵Ahi zongin ka hong zekai khak zenzen leh thuman thutak khuampi le bulpi, a nungta Pasian’ pawlpi ahi Pasian’ innkuan sungah bangci gamtat ding cih na theih nadingin hih ka hong laikhak in lam hong lak ding hi.

¹⁶I biakna pen a thuthuk a thulian taktak ahihna thu hih bangin i thei hi: Mihing lim pua-in amah hong kilang a, a man taktak ahihna thu Kha Siangtho in kilangsak a, vantung mite in a mu uh hi. Mi khempeuh tungah ama thu kihilh a, mun khempeuhah ama thu ki-umin, vantungah amah kilato hi.