Read Tedim Chin 1 TIMOTI MASA 4 Bible Online

1 TIMOTI MASA 4 - Tedim Chin bible

1 TIMOTI MASA 4

¹Nidang ciangin a upna panun mi pawlkhat pialin, zuauthu gente le dawi thu a kigente a zuih nading uh Kha Siangtho in teltakin a gen hi.

²Tua bang zuau thuhilhnate pen zuau genin mi a khem, sik emsa tawh tatgawp bangin a lungsim un a hoih le a hoih lo a khenthei nawn lote’ kam panin hong gingkhia ding hi.

³Tua bang mite in zi neih le pasal neih ding le an pawlkhat nek ding hoih lo hi, ci uh hi. Ahi zongin thu umin, thuman thutak a thei mite in lungdamna ko-in a nek dingin Pasian in tua ante a bawl ahi hi.

⁴Pasian’ bawlsa na khempeuh a hoih hi a, nial loin, lungdamna pulakin san ding ahi hi.

⁵Pasian’ thu le thungetna hang tawh tuate a hoih a suak ahi hi.

⁶Nang in na zuihsa upna thu le thuhilhna man na zuih kawmin hih ka hong thugente, i sanggamte kiangah na gen nakleh Khrih Jesuh’ nasem a hoih khat na hi ding hi.

⁷Pasian’ thu tawh a kituak lo, a haihuai tangthu phuahtawmte ngaihsutin na nei vet kei in. Pasian’ deihna tawh a kituakin na nuntak zawh nadingin na kisin in.

⁸Pumpi kisekin kisinna manpha hi. Ahi zongin kha thu-ah kisekin kisinna pen tuhun laitak le a hong tung ding hunah nuntakna hong piathei ahih manin manphazaw lai hi,

⁹ci-a kigen pen a man taktak thu hi a, umin sin dingin a kilawm thu ahi hi.

¹⁰A diakdiakin ei thu umte in mi khempeuh a Honkhia, a nungta Pasian muangin lamen ihih manin nakpitakin hanciamin na a sem ihi hi.

¹¹Ka hong gensa thute na hilhsawn in.

¹²Khangno lai na hihna thu hangin mite’ simmawh dingin na om kei inla, kampauna, gamtatna, itna, upna, le sianthona-ah thu um mite’ etteh dingin na om in.

¹³Kei ka hong pai matengin mipi mai-ah Lai Siangtho simna, a khiatna genna, le hanthotnate-ah tavuan na la in.

¹⁴Kamsangte’ thugennate le upate in na tungah a khut uh nga-in thu hong ngetsakna ahi nangma hihtheih siamnate na valkhongsak kei in.

¹⁵Mi khempeuh in na khantohna hong muhtheih nadingin hih thute limtakin ngaihsun inla, hahkatin na sem in.

¹⁶Na gamtatna le na thuhilhnate-ah hoihtakin kidawmin om lecin nangmah a kipan na thugen a za mite a dingin phattuamna om ding ahih manin na nasepna-ah hoihtakin om in.