Read Tedim Chin 1 TIMOTI MASA 5 Bible Online

1 TIMOTI MASA 5 - Tedim Chin bible

1 TIMOTI MASA 5

¹Nang sangin a uzaw mite taiibawl kei inla, na pa bangin ngaihsunin hanthawn in. Nang sangin a nauzawte na nau bangin bawl in.

²Nang sangin a uzaw numeite na nu bangin bawl inla, nang sangin a nauzaw numeite, lungsim siangtho tak tawh na nau numei bangin bawl in.

³Meigong taktak ahi numeite zahtakbawl in.

⁴Meigong numei khatpeuh in tate ahi a, tute ahi zongin a neih leh innkuan sungah biakna tawh kisai-in tavuan a neihna uh hilh inla, a nu a pa, a pu a pite a huh nadingun gen in. Hih bang gamtatna pen Pasian’ muhna-ah a hoih thu ahi hi.

⁵A kem a khoi ding a om lo meigong taktak ahi numeite in Pasian bek mah muan le suanin nei-in, a sun a zanin Pasian’ huh ding deihin thu ngen tawntung uh hi.

⁶Ahi zongin a pumpi uh deihna zui-in a gamta meigong numeite pen a pumpi uh a nuntak hangin kha thu-ah a sikhin ahi uh hi.

⁷Amaute paubaanna a om loh nadingin hih ka hong thupiaksate amaute tungah gensawn in.

⁸Mi khatpeuh in a beh a phung, a diakdiakin a innkuansung mite a vak nop kei leh a upna a nusia hita a, thu um lo mite sangin siazaw lai hi.

⁹Meigong numei khat peuhpeuh a khan kum sawmguk a cingsate, le pasal khatvei bek a nei ngeite bek, meigong sazian sungah koih in.

¹⁰Tua banah a gamtat hoihna a kitheite, a tate hoihtakin a khansuahsate, a inn-ah zin le leengla do a siam mite, kiniamkhiatin Pasian’ mite’ khe a silsakte, a lungkham mite a huhte, le thu khempeuhah a hoih gamtat mite hi lai ding uh hi.

¹¹A khangno lai meigong numeite, sazian sungah hel kei in. A pumpi uh deihna zui-in pasal a neihkik nop uh ciangin Khrih taisan uh ahih manin,

¹²a thuciam masak uh palsat uh ahih manin a mawh a suak uh hi.

¹³Tua bek zong hi loin, bangmah sem loin inn khat pan inn khatah vak kawikawi-in a hun uh mawk beisak uh a, a vakmawk uh tawh maisak loin mi gensia kawikawi-in midangte va nawngkaisak uh a, a gen lohpi ding teng uh genin va nei uh hi.

¹⁴Tua ahih manin, i langte’ hong gensiat nading a om loh nadingin, a khangno lai meigong numeite in pasal nei-in, ta nei-in, amau innkuansung ukin a om ding uh ka deihzaw hi.

¹⁵Bang hang hiam cih leh meigong numei pawlkhat, Satan’ nung a zui dingin kipan khinta uh hi.

¹⁶Thu um innkuan sungah meigong numei a nei a om leh pawlpite in a kisam meigong taktakte a huhtheih nadingin pawlpi tungah tavuan hong guan kei hen la, amau’ meigong numeite na huh ta uh hen.

¹⁷Pawlpi sungah ukna le makaihna siamin, thuhilh le thugen hahkat tawh a thuah upate pen thaman a zah nih piak dingin kilawm hi.

¹⁸Bang hang hiam cih leh Lai Siangtho in, “Buh a cil bawngtal muk na tuam kei in,” a cih banah, “Nasempa in a thaman a ngah ding a kilawm ahi hi,” na ci hi.

¹⁹Upa khat peuhpeuh a mawhsak mi nih le thum a om kei buang leh thu-in na sim kei in.

²⁰A khial takpi upa a om leh upa dangte a lautheih nadingin a lawmte mai-ah tua a khial pa taii-in thuhilh in.

²¹Hih ka hong gen thute na zatna-ah kuamah guptuam paihtuam nei hetloin hoihtakin hong mangin na zat nadingin Pasian, Khrih Jesuh, le a siangtho vantung mite’ muhna-ah limtakin a hong gen ka hi hi.

²²Topa’ na a sem dingin kipsakna-in khut nga-in thungetna pen kuama tungah zang mengmeng kei in. Midang a khialte tawh khialkhawm kha kei inla, siangtho takin na omtheih nadingin limtakin kikem in.

²³Na gil sung natna le na nat mun zelzelna hangin tui bek zang nawn loin leenggahzu tawmtawm na zang in.

²⁴Mi pawlkhatte’ khialhnate kimu pahpahin mawhsakna thuakpah uh a, pawlkhatte’ khialhna pen damdamin hong kinung theih hi.

²⁵Tua mah bangin gamtat hoihnate zong kilangin, kimu-in, a kithei pah kei zongin ki-imcip suak thei lo hi.