Read Tedim Chin 1 TIMOTI MASA 6 Bible Online

1 TIMOTI MASA 6 - Tedim Chin bible

1 TIMOTI MASA 6

¹Kuamah in Pasian’ min le i thuhilhnate hong gensiatsak lohna dingin sila khempeuh in a tote uh zahtakbawl ta uh hen.

²Thu um mi to-in a nei silate in upna sungah sanggam khat hi hang, ci-in ngaihsutna tawh a tote uh zahtakbawl loin omkha kei uh hen. Amaute’ nasepna hangin hamphatna a ngah mite pen thu um mi le a it uh mite ahih manin a hoihzaw-in a sepsak ding uh a kilawmzaw ahi hi. Tu-a ka hong gen ding thute mi khempeuh tungah hilhin gen in.

³Topa Jesuh Khrih thu tawh a kituak lo, i biakna paizia tawh a kilehngatin thu tuamdang a hilh mite pen,

⁴a kiphasak mawkmawk hi uh a, bangmah a thei het lo ahi uh hi. Tua bang mite in thu kisel thu kinial cihte ut belin nei uh a, hazatna, lungsim kituah lohna, kizahkona, a sia lamin ki-upmawhnate piangsak uh a,

⁵thuman thutak zui loin, a lungsim paizia uh a man nawn lo, biakna pen hauhtheih nading lampi bekin a ngaihsun mite in a tawntungin kitot kiselna a piangsak uh ahi hi.

⁶Pasian biakna hangin a neihsateng tawh a lungkim mite pen biakna in mihau a suaksak takpi mah ahi hi.

⁷A taktakin ci lehang, leitungah mihingin i suah laitakin sumlepai tawh i suak kei a, i sih ciangin zong leitung panin bangmah i keng thei tuan kei hi.

⁸Tua ahih manin annek tuidawn, nikten puansilh i neih nakleh a phazo ahi hi.

⁹Ahi zongin a haunuam mite in ze-etna a tuamtuam thuak a, duhhopna, huaihamna a haivai thute-ah awkcipin, haksatna le siatna a tuahlawh uh hi.

¹⁰Sum deihluatna in siatna namkim piangsak hi. Mi pawlkhat in sum deihlua liang uh ahih manin a upna panun pialkhia-in gimna lungkhamna tampi a thuaklawh uh hi.

¹¹Ahi zongin Pasian’ mi ahi nangmah in tua thute khempeuh pelh inla, thuman thutak, Pasian’ deih bangin nuntakna, upna, itna, kipna, le lungnemna na neihzawh nadingin hanciam in.

¹²Upna thu-ah hoihtakin nawksuak inla, mi tampi’ zakin na pulaksa, Pasian in nangmah a hong piak nuntak tawntungna lenkip in.

¹³Na khempeuh tungah nuntakna a pia Pasian, le Pontias Pilat mai-ah hangtakin thu a gen ngam Khrih Jesuh’ mai-ah nang ka hong thupiakna in:

¹⁴I Topa Jesuh hong kilatkik Ni dongin paubaanna le mawhsakna om hetloin nang hong kipia thute na zui in.

¹⁵Kumpite’ Kumpi, topate’ Topa, thupha ngahin amah bek a lianpen ahi Pasian in hun a sak khatpeuh ciangin Jesuh hong kilangsakkik ding hi.

¹⁶Tua i Pasian bek mah a si thei lo hi a, khuavak pha mahmah sungah om ahih manin kuamah in a kiang neh thei lo hi. Kuamah in amah mu ngei lo a, zong mu thei lo hi. A tawntungin amah kipahtawi hen la, vanglian tawntung tahen. Amen.

¹⁷Tuhuna a hau mite kisatheikha loin, a kip lo hauhnate muan le suanin neikha loin, eite in nuamtakin i zat theih dingin citna tawh a hong pia Pasian a muan a suan nadingun na hilh in.

¹⁸A hoih nate semin, gamtat pha-in, citna lungsim nei-in midangte a hopnop nadingun na hilh in.

¹⁹Tua hileh mai lamah amaute’ nuntak nading bulpi taktak ahi neihsate, amau a dingin a khol mite ahi ding uh hi.

²⁰Timoti aw, nang tungah a hong kipia thute hoihtakin na zui in. Mi pawlkhatte in, “Thu theihna,” ci-in a ngaihsutkhak uh, Pasian’ thu tawh a kituak lo, thu kihai selnate na pelh in.

²¹Mi pawlkhatte in tua bang pilna a nei-in kingaihsun uh a, upna thu bulpi khahsuahna-in a nei uh hi. Note khempeuh tungah Pasian’ dikna thupha hong tung tahen.