Read Tedim Chin 2 TIMOTI NIHNA 1 Bible Online

2 TIMOTI NIHNA 1 - Tedim Chin bible

2 TIMOTI NIHNA 1

¹Khrih Jesuh tawh i kipawlna hangin hong kipia ding nuntakna thu a gen dingin Pasian’ deihna tawh Khrih Jesuh’ sawltak nasep a sem dingin a hong kisawl keimah Paul in

²Ka it ka ta Timoti tungah lai ka hong khak hi. Pa Pasian le i Topa Khrih Jesuh in dikna, hehpihna, le nopsakna thupha nang tungah hong tungsak tahen.

³A sun a zanin ka thungetna-ah nang ka hong phawk tawntung a, ka pu ka pate’ sep mah bangin kisuanna lungsim om hetloin a na ka sep Pasian tungah ka lungdamna ka ko hi.

⁴Na khitui luannate phawk ka hih manin ka lung a dam theih nadingin nang tawh kimu nuamin a sun a zanin ka ngaihsun tawntung hi.

⁵Na pi Lois le na nu Eunis in a neih upna bangte pawl mah, lungsim takpi tawh na upna thu ka phawk a, tu-in zong nang sungah tua bang upna om hi, ci-in ka ngaihsun hi.

⁶Tua ahih manin nang tungah ka khut nga-in thu ka hong ngetsak lai-in nangma tungah Pasian in hong piak siamna na sosuah nadingin ka hong phawksak hi.

⁷Bang hang hiam cih leh Pasian in eite tungah meidawina lungsim hong guan lo a, thahatna, ki-itna, pumpi ki-ukzawhna lungsim hong guan hizaw hi.

⁸Tua ahih manin i Topa’ thu gen nading thu-ah ahi a, ama thu hangin thong a kia keima thu-ah ahi zongin maizum het kei in. Pasian in nangma tungah thahatna hong pia ahih mah bangin Lungdamna Thu hangin thuakna-ah zong a thuaknuam hizaw in.

⁹Eite’ sepzawhna hang hi loin ama ngimnasa bang leh a dikna hangin Pasian in eite hong honkhia-in ama mi dingin a hong sam hi. Pasian in leitung a pianma pekin Khrih Jesuh tungtawnin tua dikna a hong piak hi a,

¹⁰tuhun ciangin eite hong Honpa Khrih Jesuh tungtawnin a dikna hong langsak ta hi. Tua Jesuh in sihna beisak a, lungdamna thu hangin sih nawn lohna thu a hong kilangsak hi.

¹¹Hih a thak Lungdamna Thu hilhin a taangko ding le sawltak na a sem dingin kei a hong kikoih ahi hi.

¹²Tua ahih manin hih bangteng a thuak ka hi hi. Ahi zongin ka up pa ka thei a, ama tungah ka apte tua Ni dong hong kepsakzo ding hi, ci-in thei ka hih manin ka maizum het kei hi.

¹³Keima tung panin na zaksa a man thute zui inla, Khrih Jesuh tawh i kipawlna hangin i ngah upna le itna thu-ah kiptakin om in.

¹⁴Eite sungah a hong teng Kha Siangtho in a hong ap thuhoihte limtakin kem in.

¹⁵Na theihsa bangin Asia gam sunga om mi khempeuh in kei hong nusia uh a, tuate lakah Figelas le Hermogenes-te zong kihel uh hi.

¹⁶Onesiforas in tamveipi kei hong lungnuamsak ahih manin Pasian in a innkuan bupun hehpihna thupha pia tahen. Ka thongkiatna hangin amah maizum lo a,

¹⁷Rom khua hong tun ciangin kei hong muh matengin hong zong pah hi.

¹⁸Topa in tua Ni ciangin ama tungah hehpihna thupha pia tahen. Efesa khua-ah ka omlai-in nakpitakin kei a hong huhnate khempeuh na theihsa ahi hi.