Read Tedim Chin TITUS 3 Bible Online

TITUS 3 - Tedim Chin bible

TITUS 3

¹Na mite in hong uk kumpite le aana neite’ thu mangin, thuhoih khempeuh a sem dingin a kigingsa-in a om ding uh phawksak inla,

²kuamah gensia loin, mite tawh kilemin kikhawl thei-in, lungsim nemin, mi khempeuh tungah a dik nading uh na gen in.

³Bang hang hiam cih leh eite zong nidangin haitatin, thumang loin, vakvai-in, duhna deihna a tuamtuamte thuaklahin, thusia le enna lungsim tawh a gamtate, mite in hong mudahin, eite khatlekhat zong a kimudah ngeite ihi hi.

⁴Ahi zongin eite hong Honpa ahi Pasian’ itna le a migitna thu hong kilat ciangin,

⁵amah in eite hong honkhia hi. Eite in na hoih i sepzawhna hangin hong honkhia hi loin eite tungah suahtakna le nuntakna thak a hong pia Kha Siangtho in hong sawpsiangna hangin a hong hehpihna tawh a hong honkhia ahi hi.

⁶Pasian in eite hong Hon Jesuh Khrih hangin eite tungah a kicing takin Kha Siangtho hong pia ahih manin,

⁷ama hong hehpihna hangin Pasian tawh kilemin i lamet nuntak tawntungna a ngah thei ihi hi.

⁸Hih ka thugente a man mahmah ahi hi. Tua ahih manin Pasian’ thu a um mite in gamtat hoih a neihtheihna dingun hih ka hong thugente na lim ngaihsut ding ka deih hi. Ka hong thugente a hoih hi a, mite a dingin a manpha vive ahi hi.

⁹Ahi zongin a haihuai thu kiselna, min kigual deudau khangsimna, kitotna, thukham kitotlawhna cihte na pelh in. Tuate a kimanna a om lo, a mawkna thu hi lel hi.

¹⁰Kitot, kikhen nading a piangsak mite pen khatvei nihvei bang na hilh khit ciangin kisukha nawn vet kei in.

¹¹Tua bang mite a kisiakhin hi a, a mawhna un a khialhna uh a kilangsak ahihna thu na thei in.

¹²Artemas ahi a, Tikhikas ahi zongin khat peuhpeuh nang kiangah ka hong paisak ciangin, Nikopolis khua-ah phalbi sung omsawm ka hih manin, kei omna tua khua-ah nong paitheih nadingin hong hanciam in.

¹³Sitni Zenas le Apollos-te a khualzinna uh manlang takin a paisuak theih nadingun na hihtheih bangin na huh inla, lamkalah kisapna bangmah a neihkhak loh nading uh zong na thei in.

¹⁴I mite ommawk loin, thu kisam a phamawhte huh thei-in, na hoih na phate a septheih nadingun na hilh in.

¹⁵Kei tawh a om mi khempeuh in nang hong hopih uh hi. Thu upna sungah ei hong itte khempeuh na na hopihsak in. Note khempeuh tungah Pasian’ hehpihna thupha hong tung tahen.