Read Tedim Chin HEBRU 10 Bible Online

HEBRU 10 - Tedim Chin bible

HEBRU 10

¹Jew Thukham pen mailam hunah a taktak a hong tung ding lim lahkholhna hi bek ahih manin tua Thukham tawh kizui-in a kum a kumin a kipia biakpiakna in Pasian kiang a zuan mite mi cingtaak suahzo ngei lo hi.

²Thukham zui-in Pasian a bia mite in mawhna panin siansuahna ngahzo uh hileh a lungsim uhah kisuanna lungsim om nawn lo ding ahih manin biakpiakna piak kikkik kul nawn lo ding hi.

³Tua ahih manin biakpiakna a kipiak simin a kum kumin mite a mawhna uh a kiphawksak kikkik ahi hi.

⁴Tua hi a, bawngtal sisan le keel sisan in mawhna siangsakzo ngei lo hi.

⁵Tua ahih manin leitungah Khrih hong pai ciangin Pasian kiangah, “Ganhing le khawhsa tawh biakna na deih kei a, nang kong biak nadingin pumpi khat nong vaihawmsak hi.

⁶Meihal biakna le mawh maisak nadingin biaknate tawh nang na lungkim kei hi.

⁷Tua ahih manin, ‘Thukham laibu sungah keima thu a kigelh bang teekteek mahin keima hih ding nong deih bang teekteek mah ahih dingin ka hong pai hi, Pasian aw,’ ka ci hi,” a ci hi.

⁸“Ganhing le khawhsa tawh biakna na deih kei a, meihal tawh biakna le mawhmaisak nadingin biaknate tawh na lungkim kei hi,” a cih ciangin hih biakpiaknate khempeuh Thukham tawh kizui-in hih bangin kam na pau veve lai a,

⁹tua banah, “Nangma deih bang ahih dingin ka hong pai hi,” na ci thuah lai hi. Tua ahih manin Pasian in Khrih tawh biakna a kipsak theih nadingin ganhing le khawhsa tawh biakna luite na beisak phot hi.

¹⁰Pasian’ deihna bangin Jesuh Khrih gamta a, a tawntungin a kimang paisuak dingin ama pumpi biakna-in khatvei a kipiakna hangin eite khempeuh i mawhna panin a siang ihi hi.

¹¹Jew siampite nisimin a nasepna uh munah dingin a kibang biakpiakna mah pia niloh uh a, ahi zongin tua a piak uh biakpiaknate in mawhna maisak thei lo hi.

¹²Ahi zongin Khrih in mawhna hangin khatvei a piakkhit ciangin a tawntung a dingin kimang ahih manin Pasian’ taklam ah tu hithiat a,

¹³Pasian in ama khenuai-ah a galte khempeuh a koihsak nading hun ngakin a om hi.

¹⁴Mawhna panin a sianthosak mite, khatvei bek biakpiakna a bawlna tawh siangtho paisuaksak hi.

¹⁵Kha Siangtho in zong hih thu hong theihpih ahih manin,

¹⁶“Topa in hih bangin ci hi: Mailam hunah amaute tawh thuciamna khat ka bawl ding a, amaute sungah ka thukhamte guanin, amaute lungtang tungah ka gelh ding hi,” a cih khit ciangin,

¹⁷“Amaute’ mawhna le a gitloh gamtatnate uh ka ciamteh nawn kei ding hi,” ci hi, ci-in a na gen hi.

¹⁸Tua hi a, mawhna a kimaisak khit ciangin mawh maisak nadingin biakna piak ding kisam nawn lo hi.

¹⁹Tua ahih ciangin sanggamte aw, Jesuh hong sihna hangin Siangtho Pen Munah ut utin luttheih nading thu i neita hi.

²⁰Ama pumpi mahmah ahi dalna puan tawnin nuntakna lampi-ah i pai theih nadingin amah in lampi thak hong honsak hi.

²¹Pasian’ innsung a uk siampi lianpen zong i nei hi.

²²Tua ahih manin mawhna thu-ah kisuanna lungsim om nawn loin, tui siangtho tawh i pumpi a kisawpsa-in muanna le lungsim takpi tawh Pasian kiang zuan ni.

²³Pasian in piak dingin a hong ciam thu muangngam ihih manin i lametna thu kiptakin len ni.

²⁴Khatlekhat ki-itin a hoih nate i sep nadingin kihanthawn ciat ni.

²⁵Mi pawlkhatte in kikhop a pelh bang hi loin, eite in kikhop khawmnate pelh loin om ni. Topa’ hong pai ding Ni hong naina thu thei ihih manin khatlekhat kihanthawn semsemzaw ni.

²⁶Thuman thutak i theih khit ciangin mawhna i bawl hamtang lai leh i mawhna a kimaisak nadingin biakpiakna dang om nawn lo a,

²⁷a kihtakhuai thukhenna le Pasian’ thu a nial mite a kangtum ding meikuangpi bek omlai hi.

²⁸Moses Thukham a zui lote pen mi nih le thum in mawh mah hi, ci-in teci a pan’ khit nakleh kihehpih hetloin sihna kithuaksak hi.

²⁹Tua bang ahihleh Pasian’ Tapa a simmawh, mawhna a hong maisak Pasian’ thuciamna sisan a thudon lo, Pasian’ hehpihna a hong puak Kha Siangtho a hehsakte’ thuak ding bangzah takin lianzaw kan ding ahi hiam?

³⁰Bang hang hiam cih leh, “Phulakna keima a’ hi a, ka thukkik ding hi,” a ci pa le, “Topa in ama mite thu a khen ding,” a ci pa i theih ahi hi.

³¹A nungta Pasian’ khut sungah thumang loin i tunkhak ding a lauhuai mahmah ahi hi.

³²A beisa hun a note tungah thupiangte phawkkik un. Pasian’ khuavak sungah na om khit uh ciangin haksatna tampi thuak napi-in tuate na lel kei uh hi.

³³Mipi’ mai-ah hong kisimmawhin hong kibawlsia a, tua bang a thuakte na pawlpih ngam uh hi.

³⁴Note in a hoihzaw, a kipzaw nate a nei na hihlam uh kithei na hih manun thongkia mite thuakpih ngamin, na neihsa uh hong kilaksak hangin zong lungdam takin na om thei veve lai uh hi.

³⁵Tua ahih manin thaman lianpi a hong ngahsak thei na lungsim hanna uh na khahsuah kei un.

³⁶Pasian’ deihna bangin gamta-in, ama thuciam na ngahtheih nadingun lungduai-in thuakzawhna na kisam uh hi.

³⁷Bang hang hiam cih leh Lai Siangtho sungah, “A sawt loin, a hong pai ding pa hong tung ding a, hong zekai nawn lo ding hi.

³⁸Ahi zongin keima mi a thuman mite in ka thu umin nungta ding uh a, a nungkik a om uhleh tua mite tungah ka lungkim kei ding hi,” na ci hi.

³⁹Eite pen nungkikin a maimang mite ihi kei a, upna nei-in hotkhiatna a ngah mite ihi hi.