Read Tedim Chin HEBRU 12 Bible Online

HEBRU 12 - Tedim Chin bible

HEBRU 12

¹Tua hi a, eite in i kiim i pamah hih zahin a tam teci nei ihih ciangin eite a hong dongtangsak thei nate khempeuh le eite a hong gakcip mawhna le khialhnate khempeuh paikhia-in, i mai-ah a om tai nading lampi a mong dongin lungsim kiptakin tai ni.

²Eite hong makai-in i upna a hong cingtaaksak Jesuh mitsuanin nei ni. Mailamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom taklamah a tu hi.

³Tua zahta-in mawhnei mite’ langbawlna a thuaknate ngaihsun unla, note lungkia loin khauhtakin om un.

⁴Tu ciang dong mawhna tawh na kidona uhah sihna zah ciang dongin na dona uh om nai lo hi.

⁵Pasian in note, tate, hong ci-in hong hanthotna thu mangngilh khinta na hi uh hiam? Pasian in note kiangah, “Ka ta aw, Topa’ hong thuhilhna zangkhai ngaihsut kei inla, gim a hong piak ciangin lungkia kei in.

⁶Bang hang hiam cih leh Topa in a it mite thuhilh a, ta taktakin a ngaihsut mite a taii hi,” hong ci hi.

⁷Pasian’ hong thuhilhna na thuak ding mah uh ahi hi. Pasian in note ta-in hong ngaihsun ahih manin a thuak na hi uh hi. Pate’ thuhilhna le taiina a thuak lo ta kuamah om lo hi.

⁸Tate’ thuak bangin thuhilhna le taiina thuak loin hong kikoih mawk leh ta taktak hi loin zawlta na hi lel ding uh hi.

⁹Tua banah, i leitung pate in gim hong pia a, zong i zahtak lai hi. Tua ahihleh kha thu tawh kisai-ah i Pa’ thu mang phazaw-in i nuntak ding kisam hi.

¹⁰I leitung pate in amau’ hoihsak bangin nuntak tomno sung ngaihsutna-in hong thuhilhin gim hong pia a, ahi zongin Pasian in amah tawh kibangin siangtho-in i omtheih nadingin eite hong khualna-in hong thuhilhin gim hong pia hi.

¹¹Thuhilhna tawh gim hong kipiak ciangin nuam kisa hetloin na kisa mahmah sam a, ahi zongin tua thuhilhna a mangzote in thuman nuntakna hangin nopsakna thaman a nung ngah uh hi.

¹²Tua ahih ciangin a zaw nuangnuang na khutte uh le a no dakdak na khukte uh khauhsak un.

¹³Bai luangluangin a paite, na guh na taang uh a kipelh loh nadingin lampi tang zui-in na pai un.

¹⁴Mi khempeuh tawh na kilem theih nading uh hanciam un. Nuntak siangtho lo tawh kuamah in Topa mu zo lo ding ahih manin nuntak siangtho na nungta un.

¹⁵Pasian’ hehpihna a ngahlah na hihkhak loh nadingun na kidawm un. Zungkha a nei singkung hong khangin mi tampi gimsakin a siatsak bangin mite a siasak na hihkhak loh nadingun na kidawm un.

¹⁶Numei tawh a mawh mite suakkha kei unla, Esau bangin annek khat tawh innluah za a zuak mi na suahkhak loh nadingun kidawm un.

¹⁷Bang hang hiam cih leh Esau in a pa kiang panin thupha ngahkik nuamin khitui naptui tawh a nget hangin a gamtatnasa a bawlkik theih nading lampi om nawn lo ahih manin bangmah ngahthei tuan nawn lo hi.

¹⁸Israel mite in a tuahsa bangin note in Sinai Mual tunga meikuang, khuamial le lungzinna, huihpi,

¹⁹peengkul tumna awging le a kihtakhuai awgingte na za nai kei uh hi. Israel mite in awging a zak uh ciangin kihta lua uh ahih manin a zakkik nawn loh nadingun a thum uh hi.

²⁰“Ganhing nangawn in tua mual a sukkhak le kidenglum ding hi,” ci ahih manin thuakngap lo uh hi.

²¹Tua pen naklauhuai mahmah ahih manin Moses in zong, “Lau-in ka ling hi,” a na ci hi.

²²Ahi zongin note pen Zion Mual, a nungta Pasian’ khuapi, vantung Jerusalem, simzawh loh vantung mite a omna,

²³vantungah a min a kikhum Pasian’ ta upate a kikhopna, mi khempeuhte’ thu a khen Pasian’ kiang, a cingtaakin a kibawl midikte’ kha a omna,

²⁴thuciamna thak a hong vaihawm Jesuh kiang, Abel’ sisan sangin thu hoihzaw a gen sisan a kithehna mun na tungzo uh hi.

²⁵Tua ahih manin note tungah thu a hong gen pa’ thugen na ngaih loh khak ding uh kidawm un. Hih leitungah thu a gen pa’ thu a ngai lote suakta lo ahih manin vantung panin thu a hong gen pa’ thugen ngai kei lehang i suakta kei zaw kan lai ding hi.

²⁶Tuahun lai-in thu a gen ciangin leitung kiling a, ahi zongin tu-in amah in thu hong ciam a, “Leitung bek lingsak loin vantung tawh zong khatvei ka lingsak lai ding hi,” hong ci hi.

²⁷“Khat vei lingsakkik lai ding,” a cih ciangin a kipiangsak nate kilingsakin kipaikhia ding a, a kilingsak lo nate kip lai ding ahihna thu hong kilangsak hi.

²⁸Tua ahih manin a kilingsak zo lo Pasian’ gam i ngah manin lungdamin, zahtakna le lamdangsakna tawh Pasian’ lungkimna bangin amah bia ni.

²⁹Bang hang hiam cih leh eite’ Pasian pen a kangtum thei meikuang tawh a kibang ahi hi.