Read Tedim Chin HEBRU 4 Bible Online

HEBRU 4 - Tedim Chin bible

HEBRU 4

¹Ahi zongin tu-in eite va pai-in amah tawh i tawlngak khawm theih nadingin Pasian in thuciam hong nusiat khin ahih manin tua tawlngakna munah a lutlah na suahkhak loh nadingun lau-in kidawm ni.

²Bang hang hiam cih leh amaute in Lungdamna Thu a zak uh mah bangin eite in zong i za hi. Amaute in Lungdamna Thu a zak uh ciangin upna tawh na sang lo uh ahih manin a thuzak uh amaute a dingin a phattuamna om lo hi.

³Ahi zongin eite ihih leh amah in, “Ka heh manin ka kiciam a, ‘Hih leitangah hong lut lo ding uh a, ka tawlngakna munah hong pai-in kei tawh hong tawlnga khawm ngei lo ding uh hi,’ a cihte bang hi loin ei thu umte pen Pasian tawh a tawlnga khawm ihi hi. Leitung a piansak cil pek a kipanin a nasep a mankhin hinapi-in tu-a bangin thu gen veve lai hi.

⁴Lai Siangtho mun khatah, “A ni sagih ni-in a nasepna khempeuh panin Pasian tawlnga hi,” ci-in ni sagihna thu tawh kisai na gen hi.

⁵Hih thu mah na kigenkik a, “Ka tawlngakna munah hong pai-in kei tawh hong tawlnga ngei lo ding uh hi,” na ci kik hi.

⁶Lungdamna Thu a za masate in um lo uh ahih manin Pasian tawh va tawlnga khawm thei lo uh hi. Tua ahih manin va pai-in Pasian tawh a tawlnga khawm ding mi pawlkhat omlai hi.

⁷“Tuni,” cihna kammal na omlai ahih manin Pasian in nidang khat seh lai ahihna thu hong kilang hi. Lai Siangtho sungah, “Tuni-in Pasian’ aw na zak uhleh na lungsim uh khauhsak nawn kei un,” a cihna mun i mat khitsa mah bangin tuazawh kum tampi khit ciangin David tungtawnin thu hong genkik hi.

⁸Joshua in Pasian’ tawlngakna munah mite tunpih khin hileh Pasian in a nidang khat thu nunggen nawn lo ding hi.

⁹Tua ahih manin tu-a thu om zia-ah ci lehang ni sagih ni-in Pasian a tawlngak mah bangin Pasian’ mite a tawlngak nading omlai hi.

¹⁰Bang hang hiam cih leh a nasepna panin Pasian a tawlngak mah bangin va pai-in Pasian tawh a tawlngate khempeuh zong a nasepna panun khawl ding uh hi.

¹¹Tua ahih manin amaute in a uploh manun Pasian’ tawlngakna munah a lut zawh loh uh bang hi loin va pai-in Pasian tawh i tawlngak khawm theih nadingin hanciam ciat ni.

¹²Pasian’ thu nungta-in a gamtang hi a, langnih a hiam namsau sangin hiamzaw lai hi. Kha le lungsim, guh le taang kituahna, guh le guhngek dongin khenkhia thei hi. Mihingte’ lungsim ngimna le a ngaihsutnate zong theithei hi.

¹³Pasian’ mai-ah seelcip theih ding bangmah om lo hi. Eite khempeuh i dinna ding pa’ mai-ah a kipiangsak na khempeuh a kiliah a ki-im thei om loin kimu sinsen hi.

¹⁴Tua ahih manin eite in Pasian’ omna vantung a va tung khinsa, Siampi Lianpen ahi Pasian’ Tapa Jesuh neikhin ihih manin i sansa upna thu kiptakin len ni.

¹⁵Eite’ neih Siampi Lianpen pa in i ginat lohna-ah eite a hong hehpih thei lo ding hi lo hi; eite mah bangin ze-etna khempeuh a thuak hi a, ahi zongin mawhna a bawl lo ahi hi.

¹⁶Tua ahih manin a kisap hunin, eite a hong huh dingin hehpihna le dikna thupha i ngahtheih nadingin, kimuanna lungsim tawh hehpihna tokhom va zuan ciat ni.