Read Tedim Chin HEBRU 9 Bible Online

HEBRU 9 - Tedim Chin bible

HEBRU 9

¹A masa thuciamna nangawn in biakna zia ding le biak nading mun tawh kisai ngeina na nei tei sam hi.

²Puanbuk khat kibawl a, a puanung dei pen Siangtho Mun kici a, tua sungah meivak, sabuai, le Ompihna Anlum kikoih hi.

³Tua Siangtho Mun a kideina zomah Siangtho Pen Mun a kici a dei dang khat om leuleu hi.

⁴Tua sungah paknamtui hal nading kham kibawl biakna tau le kham tawh a kizut Thuciamna Singkuang om hi. Tua Thuciamna Singkuang sungah manna anlum a kikoihna kham beel, tehno nei-in a hing Aaron’ ciangkhut le thukhamte a kigelhna suangpek nihte kikoih hi.

⁵Tua Thuciamna Singkuang tung sanah Pasian’ ompihna lim ahi kherub nihte om a, tua kherub nihte in hehpihna tokhom liimsun uh hi. Hih nate’ thu tu-in a neng a tawngin i gen khinzo kei hi.

⁶Hih bang tengin a kibawl khit ciangin a dei puanung sungah nisim a nasep uh a sem dingin siampite a lut hi.

⁷Ahi zongin a dei sungnung sungah Siampi Lianpen pa bek kum khatin khatvei pai a, theih loh man a, amah le mite’ khialhna hangin ganhing sisan tawh biakpiakna a bawl hi.

⁸A puanung inndei a om laiteng a sungnung ahi, a Siangtho Pen Mun a kihong nai lo ahihna thu Kha Siangtho in hong kilangsak hi.

⁹Hih bang omzia pen tuhun lai thu a lahna ahi hi. Bang hang hiam cih leh Pasian tungah a kipia letsongte le ganhing tawh biaknate in a bia mite’ lungsim siangsak zo lo hi.

¹⁰Zu le an, le pumpi siansuahna ngeina tuamtuamte hi bek a, Pasian in na khempeuh a puahphat hun ma kikal sungteng zat ding ngeina ahi hi.

¹¹Ahi zongin tu-in a hoihzaw thu a sem ding Siampi Lianpen Khrih hong tung khinta a, ama lutna biakbuk pen a kipiangsak tawm, khut tawh a kibawl biakbuk hi loin a lianzaw, a cingtaakzaw mun ahi hi.

¹²Siangtho Pen Mun ah a tawntungin a kimang dingin khatvei bek Khrih a va lut ciangin biakpiak nadingin keel sisan le bawngno sisante va keng loin ama sisan va keng a, eite a dingin tawntung hotkhiatna a hong ngahsak hi.

¹³Keel sisan, bawngtal sisan, le bawngla kihaltum vute, biakna vai-in a siang lo mite tungah a kitheh ciangin biakna vai-in mite’ pum tung siangthosak thei ahihleh,

¹⁴tawntung Kha Siangtho hangin Pasian tungah a cingtaak biakpiak nadingin Khrih in a piak ama sisan in na tam semkhia zozaw ding a, a nungta Pasian’ na i septheih nadingin bangmahin a kimang lo nasepna panin ama sisan in i lungsim hong siangsak ding hi.

¹⁵Thuciamna masa in a huamkhak mite, a mawhna panun a suahtak theih nading uh ngeina om pen a si suak khinta ahih manin, Pasian’ sap mite in a ciamsa tawntung thupha a ngahtheih nadingun Khrih in thuciamna thak a hong vaihawm ahi hi.

¹⁶Mi khat in a sih khit ciangin a gamhluah dingin a deih pa lai-in ciamtehin a koih leh a laibawl pa a sih phot ding kisam hi.

¹⁷A laibawl pa a hin laiteng tua lai kizang thei lo a, a sih khit ciangin kizang thei bek hi.

¹⁸Tua mah bangin thuciamna masa zong sisan a kizat ciangin thu suak thei pan hi.

¹⁹Moses in zong mite tungah Thukham sunga om thute a piak lai-in bawngno sisan, keel sisan, le tui sungah puknah le tuumul san diahin, tuate tawh Thukham laibu le mite theh a,

²⁰“Pasian in note tungah a hong piak thuciamna sisan ahi hi,” a ci hi.

²¹Tua banah Moses in Biakbuk le biakna-in a kizang a sunga na om khempeuh zong sisan a theh hi.

²²Thukham kizatna sungah na khempeuh sisan tawh kisiansuah a, sisan a kiluansak khit ciang bekin mawhna kimaisak thei pan hi.

²³A taktak ahi lo vantung limte pen hih bangin siansuahna kibawl hi. Ahi zongin vantung nate in hih sangin a hoihzaw biakpiakna kisam hi.

²⁴Tua ahih manin a lim ahi mihingte’ bawl Siangtho Mun sungah Jesuh pai lo a, vantung mahmahah va pai-in Pasian’ omna-ah eite’ tangin tu-in amah a va kilaak ahi hi.

²⁵Kum simin Siangtho Pen Munah Jew Siampi Lianpente amau’ sisan ahi lo, ganhing sisan tawh a pai zelzel bangun amah va pai themthum lo hi.

²⁶Tua bangin va pai zelzel hileh leitung piancil a kipanin a va thuak zelzel ding ahi hi. Ahi zongin amah biakna-in a va kipiakna hangin a kimang paisuak a suahtheih nadingin mawh maisak nadingin hun bei kuan ciangin amah khatvei a va kipia hi.

²⁷Mi khempeuh khatvei si-in, tua khit ciangin Pasian’ thukhenna a thuak ding ahih mah bangin,

²⁸mi tampite’ mawhna a thuak dingin Khrih zong khatvei bek a kipia hi. A nihveina hong kilatkik ciangin mawhna thu tawh kisai nasem ding hi nawn loin, lawptakin amah a ngak mite a honkhia ding ahi hi.