Read Tedim Chin JAMES 3 Bible Online

JAMES 3 - Tedim Chin bible

JAMES 3

¹Sanggamte aw, mite tungah thu a hilh eite pen midangte sangin a khauhzaw-in thu hong kikhen ding ahih manin note tampi sia na suaknuam se kei un.

²Eite khempeuh a khialthei zelzelte vive ihi hi. Kampauna-ah a khial ngei lo mi a om leh a cingtaak mahmah hi a, a pumpi zong a ukzo mi ahi hi.

³Sakol in i thu hong mantheih nadingin kamkaih i bulh a, a sakol pumpi buppi i ukzo hi.

⁴Teembawte ngaihsun dih un. Teembaw lian mahmah a, huihpi in nakpitakin a mut hangin a hawlpa’ deihna bangin a heina neu khat tawh ki-ukzo hi.

⁵Tua mah bangin leii zong i pumpi na sung panin a neu mahmah khat hinapi-in thusia lianpipi piangsak zo hi. Gam khempeuh zong mei-ek neuno khat pan kipanin a kangtum thei hi.

⁶Leii pen mei tawh kibang hi. I pumpi na sung panin a neuno khat hinapi-in i pumpi buppi a sia suahthei a, hell khuk sung panin a hong piang mei tawh i nuntakna buppi hong kangtumsak thei hi.

⁷Mihingte in gamsa, vasa, a bokvak ganhing le tui sunga om ngasate a kipan ganhing khempeuh zualsakin ukzo uh hi.

⁸Ahi zongin siattheih nading gukhal tawh a kidim, a omkhong thei lo leii pen zualsakin a ukzo kuamah om lo hi.

⁹I leii tawh eite’ pa ahi Topa i phat thei a, Pasian tawh a kisunin a kibawl i mipihte zong tua i leii mah tawh i samsia thei hi.

¹⁰Kam khat sung panin thupha le thusia pusuak khawm hi. Sanggamte aw, hih bang ahi ding hi het lo hi.

¹¹Tuinak khat panin tui lim le tui lim lo hong luangkhia khawm thei ahi hiam?

¹²Sanggamte aw, theikung in oliv hong gahthei a, leenggui in theipum hong gahthei ahi hiam? Tui-al in tuilim piangsak ngei lo hi.

¹³Note lakah pilin thuthei a kisa a om leh kiniamkhiatin pilin, nuntak hoih le gamtat hoih tawh a lahkhiat ding ahi hi.

¹⁴Ahi zongin na lungsim uhah enna, gitlohna, le huaihamna a om leh a zuaugen na hi uh a, pil ing, ci-in kisialh nading bangmah om lo hi.

¹⁵Tua bang pilnate vantung panin a hong pai hi lo a, leitung pilna, kha thu tawh a kisai lo, a dawivai ahi hi.

¹⁶Enna le huaihamna a om nakleh buaina le siatna nam khempeuh tawh kizom pahpah hi.

¹⁷Ahi zongin tunglam panin a kingah pilna a siangtho ahi hi. Mi tawh kilem thei-in dik a, mi tawh kikhawl thei a, hehpihna lungsim nei-in gamtat hoih a, mi lang-et lo a, kineihkhem cihte om lo hi.

¹⁸Kilemna a piangsak mite in lungnuam takin a tuh khaici in hoihna le dikna a piangsak hi.