Read Tedim Chin JAMES 5 Bible Online

JAMES 5 - Tedim Chin bible

JAMES 5

¹A haute aw, tu-in ka thugen hong ngai dih un. Note tungah a hong tung ding lungkhamna hangin kapin thum un.

²Na neihsate uh muattumta a, na puante uh nget in netum khinta hi.

³Na ngun le na khamte uh kekseu khinta hi. Hih kekseuna pen note langah teci suak a, mei in a kattum bangin na sa uh hong netum ding hi. Hih a hun nunung ciangin tu-a bangin a piang dingin neihsa a khol na hi uh hi.

⁴Na lo uh a hong khawhsakte a thaman pia lo na hih manun tu-in amaute’ phunna za un. Anla dingin na sawl uh mite’ phunna Vanglian Topa in za khinta hi.

⁵Hih leitung na nuntak sungun uang nekin na noptat mahmah uh hi. Note hong kigawh hun ding kiginna-in a kithausak phitphet na hi uh hi.

⁶A thuman mite mawhsakin na that uh a, amaute in na thu uh hong nial zo lo uh hi.

⁷Tua ahih ciangin sanggamte aw, Topa hong pai matengin lungduai takin om un. Lo khote in zong a lo panun an a ngahtheih nadingun lungduai takin khuapi guah le tuk guah a ngakna thu thei un.

⁸Note zong na lungduai un. Topa hong pai ding hun naita ahih manin na lungsim uh na thahatsak un.

⁹Sanggamte aw, Pasian in note tungah thu hong khenkhak loh nadingin khatlekhat na kiphunsan kei un. Thukhen ding pa hong nai mahmah ta a, hong tung dektak ta hi.

¹⁰Sanggamte aw, Topa’ min tawh thu a gen kamsangte na phawk un. Gimna a thuak laitakun lungduai-in a thuaknate uh na etteh un.

¹¹Tua bangin a thuak mite a hampha mahmah hi, i ci hi. Job in a thuakna-ah a lungduaina na thei uh a, Topa in dikna le hehpihna nei ahih manin a tawpna-ah Job tungah a piak thuphate na thei uh hi.

¹²Hih thute khempeuh banah, sanggamte aw, thu khat peuhpeuh na gen uh ciangin kiciam se kei un. Vantung ahi a, na khat peuhpeuh tawh ahi zongin kiciam kei un. Pasian’ thukhenna na thuakkhak loh nadingun a hite, “Hi,” ci lel unla, a hilote, “Hilo,” na ci lel un.

¹³Lungkhamna a thuak na om uhleh thu na ngen un. A lungdam na om uhleh phatna la na sa un.

¹⁴A cina na om uhleh pawlpi upate sam un. Amaute in thu hong ngetsakin Topa min tawh sathau hong zut ding uh hi.

¹⁵Upna tawh thu a kinget ciangin Topa in cinate noptuamsakin, damsak ding a, mawhna nei ahihleh zong a mawhna maisak ding hi.

¹⁶Tua ahih manin na ci uh a dam nadingin khatlekhat tungah na mawhna uh kipulakin thu na kingetsak ta un. Mihoihte’ thungetna in vang nei a, na lianpi semzo hi.

¹⁷Elijah zong eite mah bangin mi mawkmawk hinapi-in, guah a zuk loh nadingin lungsim takpi tawh thu a nget ciangin kum thum le kum lang sung tua gam sungah guah zu lo hi.

¹⁸Tua ciangin guah a zuk nadingin thu ngenkik leuleu a, van panin guah hong zu-in, leitungah nektheih ding gah le teh hong piangkik hi.

¹⁹Sanggamte aw, note khatpeuh thuman lampi panin pialkha-in, adang khatpeuh in thuman lampi-ah a tun pihkik theih leh,

²⁰tua bangin a khial mite lam manah a tunpihkik mipa in a khial mite a sih nading panin honkhia-in, mawhna tampi a mai nadingin na a sempa ahihna thu na phawk un.