Read Tedim Chin THUKHENTE 10 Bible Online

THUKHENTE 10 - Tedim Chin bible

THUKHENTE 10

¹Abimelek khit ciangin Israel-te a honkhia dingin Issakhar minam Dodo’ tapa Puah, Puah’ tapa Tola hong khang a, Efraim mualtung gam Shamir-ah a teng hi.

²Amah in Israel-te kum sawmnih le kum thum sung thu khen hi. Tua ciangin amah si a, Shamir-ah kivui hi.

³Ama khit ciangin Israel-te kum sawmnih le kum nih sung thu a khen Gilead mi Jair hong khang hi.

⁴Amah in la sawmthum tungah a tuang tapa sawmthum a nei hi. Amaute in Gilead gam sunga om tu dongin Havvothjair a kici khuapi sawmthum nei uh hi.

⁵Tua ciangin Jair si-in Kamon-ah kivui hi.

⁶Tua ciangin TOPA’ muhna-ah Israel mite a sia gamta kik uh a, Syria mite’ pasian-te, Sidon mite’ pasian-te, Moab mite’ pasian-te, Ammon mite’ pasian-te, Filistia mite’ pasian-te le Baal-te, le Ashtaroth bia uh a, amaute in TOPA nusia-in ama na sem lo uh hi.

⁷Tua ciangin Israel-te tungah TOPA sinso a, amah in Filistia mite tung le Ammon mite tungah amaute pia a,

⁸amaute in Israel mite tua kum sugawpin nengniam uh hi. Amaute in Jordan galkhat Gilead gam sunga om Amor mite’ leitangah a om Israel mite khempeuh kum sawm le kum giat sung nengniam uh hi.

⁹Judah, Benjamin, le Efraim minamte a sim dingin Ammon mite Jordan hong galkah uh hi. Tua ahih ciangin Israel-te nakpitakin lungkham uh hi.

¹⁰Tua ciangin TOPA tungah Israel-te kiko uh a, “Nang tungah kong khial khin uh hi; bang hang hiam cih leh kote in ka Pasian uh nusia-in Baal-te ka bia uh hi,” a ci uh hi.

¹¹TOPA in Israel mite kiangah, “Egypt-te le Amor mite, Ammon mite le Filistia mite kiang panin hong honkhia hi lo ka hi hiam?

¹²Sidon mite, Amalek mite, le Maon mite in note hong nengniam uh hi. Kei tungah note nong kiko uh a, keimah in amaute’ khutsung panin note kong honkhia hi.

¹³Tua hinapi-in note in kei hong nusia-in pasian dangte na bia uh hi. Tua ahih ciangin note kong honkhia nawn kei ding hi.

¹⁴Pai unla note’ teel pasian-te tungah ko un. Na lungkham hunun amaute kihonkhia sak un,” a ci hi.

¹⁵Ahi zongin Israel mite in TOPA tungah, “Ka khial khin uh hi. Hoih na sak bangin ko tungah hong hih in. Tuni-in hong honkhia in, kong thum uh hi,” a ci uh hi.

¹⁶Tua ahih ciangin amaute in amau’ lak panin gamdang pasian-te koih khia-in TOPA a bia uh hi. Tua ahih ciangin Israel-te’ gentheihna ah amah a dah hi.

¹⁷Tua ciangin Ammon mite galhiam tawi dingin kisam uh a, Gilead-ah giahphual sat uh hi. Israel mite zong kikaikhawmin Gilead gam sung Mizpah-ah giahphual sat uh hi.

¹⁸Tua ciangin Israel mihonte le makaite khatlekhat in, “Ammon mite do dinga a kipan ngam kua om ihi hiam? A kipan ngam mipa, Gilead gam a teng mite khempeuh tungah lutang hi ding hi,” a kici uh hi.