Read Tedim Chin THUKHENTE 11 Bible Online

THUKHENTE 11 - Tedim Chin bible

THUKHENTE 11

¹Tu-in Gilead khuami Jefthah, a thahat galhang khat hi a, ahih hangin amah pen zawlta ahi hi. Jefthah’ pa Gilead hi a,

²Gilead’ zi in zong amah tawh tapa dang nei hi. A tapate a khan ciangun amaute in Jefthah notkhia-in ama kiangah, “Ka pa uh inn sungah gamh na luah kei ding hi; bang hang hiam cih leh nang pen numei dang tawh zawlta na hi lel hi,” a ci uh hi.

³Tua ciangin a sanggamte kiang panin Jefthah tai-in Tob gam sungah teng a, bangmah a man lo mite in Jefthah pawmin amah tawh mite sugawpin pai kawikawi uh hi.

⁴Tawlkhat khit ciangin Ammon mite in Israel-te sim uh hi.

⁵Ammon mite in Israel-te a sim ciangin Tob gam panin Jefthah a la dingin Gilead upate va pai uh hi.

⁶Amaute in Jefthah kiangah, “Ammon mite i do theih nadingin hong pai inla kote’ makai hong hi in,” va ci uh hi.

⁷Ahih hangin Jefthah in Gilead upate kiangah, “Note in kei hong mudahin ka pa’ inn pan hong hawlkhia hi lo na hi uh hiam? Bang hangin thuhaksa na tuah uh ciangin kei kiangah hong pai na hi uh hiam?” na ci hi.

⁸Tua ciangin Gilead upate in Jefthah kiangah, “Kote tawh nang hong pai-in Ammon mite do-in Gilead gam sunga teng mi khempeuh tungah lutang nong hih theih nadingin nang’ lamah hong kihei ka hi uh hi,” a ci uh hi.

⁹Jefthah in Gilead upate kiangah, “Note in Ammon mite a do dingin inn-ah kei nong ciahpih uh a, kei tungah TOPA in amaute hong piak leh kei pen note’ lutang ka hi ding hi,” a ci hi.

¹⁰Gilead upate in Jefthah kiangah, “TOPA pen eite’ kikalah teci hi ding hi. Na cih bangin ka gamta ding uh hi,” a ci uh hi.

¹¹Tua ahih ciangin Gilead upate tawh Jefthah pai a, mite in amau’ tungah lutang le makai-in amah koih uh hi. Jefthah in hih thute khempeuh Mizpah khuasung TOPA’ mai-ah a gen ahi hi.

¹²Tua ciangin Jefthah in Ammon mite’ kumpipa kiangah kamtaite sawlin, “Ka gam a sim dingin kei kiangah nong pai nadingin kei’ tungah bang thu om ahi hiam?” cisak hi.

¹³Ammon mite’ kumpipa in Jefthah’ kamtaite dawng a, “Egypt panin Israel-te hong pai lai-in Arnon panin Jabbok le Jordan ciang ka gam hong laksak hang ahi hi. Tua ahih ciangin tu-in thudamin hong piakik in,” a ci hi.

¹⁴Jefthah in Ammon mite’ kumpipa kiangah kamtaite sawlkikin

¹⁵ama kiangah, “Jefthah in hih bangin ci hi: Israel-te in Moab leitang hitaleh Ammon mite’ leitang hitaleh la lo hi.

¹⁶Egypt panin Israel-te hong paitoh lai-in gamlak tawnin San Tuipi-ah hong pai-in Kadesh hong tung uh hi.

¹⁷Israel-te in Edom kumpipa kiangah kamtaite sawl a, ‘Kong thum uh hi; na gam sung hong nawksak in,’ cisak uh hi. Ahih hangin Edom kumpipa in a thu ngai lo hi. Tua ciangin Moab kumpipa kiangah zong sawl uh a, ahih hangin amah thukim lo hi. Tua ahih ciangin Kadesh-ah Israel-te om phot uh hi.

¹⁸Tua ciangin sehnel gam tawnin amaute khualzin uh a, Edom gam le Moab gam kimkotin pai-in Moab gam nisuahna lampangah tung uh a, Arnon gun galkhatah phual sat uh hi. Ahih hangin Moab gam sungah amaute lut lo uh hi. Bang hang hiam cih leh Arnon gun pen Moab gamgi ahi hi.

¹⁹Tua ciangin Israel-te in Heshbon khua-ah a om Amor mite’ kumpi Sihon kiangah kamtaite sawl uh hi. Israel-te in ama kiangah, ‘Kong thum uh hi; ka gam uh a zuan dingin na gam hong nawksak in,’ ci uh hi.

²⁰Ahih hangin Sihon in ama gam a nawk dingin Israel-te muang lo hi. Tua ahih ciangin Sihon in a mite khempeuh kaikhawmin Jahaz-ah giahphual sat a, Israel-te na sim hi.

²¹TOPA, Israel-te’ Pasian in Sihon le a mite khempeuh Israel-te’ khut sungah pia a, amaute in zo uh hi. Tua ahih ciangin tua gam sunga teng Amor mite’ leitang khempeuh Israel-te in luah uh hi.

²²Amaute in Arnon gun panin Jabbok lui ciang leh sehnel gam panin Jordan gun ciang, Amor mite’ gam khempeuh a luah uh hi.

²³Tua ahih ciangin TOPA, Israel-te’ Pasian in ama mi Israel-te’ mai panin Amor mite paaikhia hi. Tu-in nangmah in luahkik ding sawm na hi hiam?

²⁴Na pasian Khemosh in na neih dinga hong piakte kem peuh in. Kote ahihleh TOPA ka Pasian un kote’ mai-ah a suankhiatte ka tang ding uh hi.

²⁵Tu-in nang pen Moab kumpipa, Zippor’ tapa Balak sangin ginazaw na hi hiam? Amah in Israel-te to ngei a, amaute do ngei ahi hiam?

²⁶Heshbon le a khuaneute, Aroer le a khuaneute, le Arnon gun panga om khuapite khempeuh sungah Israel-te a ten kum zathum hun sung tengin bang hangin lakik lo na hi hiam?

²⁷Tua ahih ciangin nang tungah ka khial kei a, kei nong simna-ah kei tungah nang nong khial hi. TOPA, Thukhen pa in Israel mite le Ammon mite kikalah tuni-in thu khen ding hi,” a ci hi.

²⁸Ahih hangin Ammon kumpipa in ama kiangah thu a puak Jefthah’ thu a don kei hi.

²⁹Tua ciangin Jefthah’ tungah TOPA’ kha hong tung a, amah in Gilead le Manasseh nawkin Gilead gam Mizpah-ah paisuak a, Gilead gam Mizpah panin Ammon mite kiangah paisuak lai hi.

³⁰Jefthah in TOPA tungah thuciamna bawlin, “Ka khut sungah Ammon mite nong piak leh

³¹Ammon mite kiang panin gualzo-in ka ciah ciangin keimah a dawn dingin ka innsung pan a hong pai peuhpeuh TOPA a’ hi ding a, meihal biak nadingin kong pia ding hi,” a ci hi.

³²Tua ahih ciangin amaute a sim dingin Ammon mite kiangah Jefthah galkah a, TOPA in ama khut sungah amaute a pia hi.

³³Amah in Aroer panin Minnith kiimnai ciang dong khuapi sawmnih, le Abelkeramim ciang dong mi tampi tak thatin a vatgawp hi. Tua ahih ciangin Israel mite mai-ah Ammon mite guallel uh hi.

³⁴Tua ciangin Mizpah-a ama inn-ah Jefthah hong ciah hi. Amah a dawn dingin a tanu khuangneute tawh a laamsa-in hong paikhia hi. Tua nu pen ama ta khat neihsun hi a, amah simloh tapa ahi a, tanu ahi zongin adang nei lo hi.

³⁵Amah in a tanu a muh ciangin a puan balkekin, “Ala, ka tanu! Kei nong niamkoih mahmah hi. Kei a dingin lungkhamna lianpi nong suak hi. Bang hang hiam cih leh TOPA tungah thu ka ciam khin a, ka thuciamna ka dokkik thei kei hi,” a ci hi.

³⁶Tua ciangin a tanu in ama kiangah, “Ka pa aw, TOPA tungah thu ciam khin na hih leh, na thuciamna tawh kizui-in kei’ tungah hong bawl in. Tu-in TOPA in na gal Ammon mite tungah nang a’ ding hong thuksak khin hi,” a ci hi.

³⁷Tua ciangin amah in a pa kiangah, “Kong ngetnop thu khat om hi. Kei pai-in mualtungah vak kawikawi-in kei le ka lawmte in nungak-in ka sih nading hangin ka thum theih nadingun kha nih sung kei guak hong omsak in,” a ci hi.

³⁸Amah in, “Pai ta in,” a ci hi. Amah in kha nih sung a tanu paikhia sak hi. Tua ciangin amah le a lawmte paikhia-in nungakin a sih nading hangin mualte tungah kapin a thum uh hi.

³⁹Kha nih a cin ciangin a pa kiangah amah ciahkik a, amah in ama bawlsa a thuciamna bangin a tanu tungah hih hi. Tua nu pen pasal tawh a lumkhawm nai lo, nungakin khansih hi. Tua ciangin Israel-te sungah ngeina khat suak a,

⁴⁰Israel numeite kum khatin ni li sung kum simin Gilead mi Jefthah’ tanu hangin a thum dingin paikhia uh hi.