Read Tedim Chin THUKHENTE 12 Bible Online

THUKHENTE 12 - Tedim Chin bible

THUKHENTE 12

¹Efraim mite galhiam tawi dingin kisam uh a, amaute Zafon gun kantanin galkah uh a, Jefthah kiangah, “Bang hangin Ammon mite a sim dingin galkahin, nang tawh a kuankhawm dingin kote hong zawn lo na hi hiam? Na inn tawh nang kong halnelh ding uh hi,” a ci uh hi.

²Tua ciangin Jefthah in amaute kiangah, “Kei le ka mite in Ammon mite tawh buaina lianpi khat ka nei ngei uh hi. Note kong sap hangin amau’ khutsung panin kei nong honkhia kei uh hi.

³Note in kei nong hotkhiat loh ding uh ka theih ciangin kei mahmah hanciam tawmin Ammon mite a sim dingin ka galkah a, TOPA in kei’ khut sungah amaute hong pia hi. Tua ahih ciangin bang hangin tuni-in kei a hong sim dingin hong kuan na hi uh hiam?” a ci hi.

⁴Tua ciangin Jefthah in Gilead mite khempeuh khawmin Efraim mite tawh kido uh hi. Gilead mite in Efraim mite vatgawp uh hi. (Efraim mite in, “No Gilead mite pen Efraim-te le Manasseh-te sung panin Efraim mite a taisante na hi uh hi,” ci ngei uh hi.)

⁵Gilead mite in Efraim mite tung panin Jordan ngahmunte la uh hi. Efraim galtaite khat peuhpeuh in, “Hong galkah sak in,” a cih ciangin Gilead mite in ama kiangah, “Efraim mi na hi hiam?” ci uh hi. Amah in, “Hi kei ing,” a cih ciangin

⁶amaute in ama kiangah, “Tua ahihleh Shibboleth ci in,” ci uh a, tua ciangin amah in, “Sibboleth,” ci hi; bang hang hiam cih leh a manin ci thei lo hi. Tua ciangin amaute in amah manin Jordan ngahmunte-ah that uh hi. Tua tungin Efraim mi tul sawmli le tulnih tuk hi.

⁷Jefthah in Israel mite kum guk sung thu khen hi. Tua ciangin Gilead mi Jefthah si a, Gilead gam ama khuapi sungah kivui hi.

⁸Ama nungah Bethlehem khuami Ibzan in Israel-te thu khen hi.

⁹Amah in tapa sawmthum nei hi. Ama beh pualam mite tungah tanu sawmthum mo kha a, a pualam panin a tapate a dingin tanu sawmthum la hi. Amah in Israel-te kum sagih sung thu khen hi.

¹⁰Tua ciangin Ibzan si a, Bethlehem-ah kivui hi.

¹¹Ama nungah Zebulun mi Elon in Israel-te kum sawm sung thu khen hi.

¹²Tua ciangin Zebulun mi Elon si a, Zebulun gam Aijalon-ah kivui hi.

¹³Ama nungah Pirathon mi Hillel’ tapa Abdon in Israel-te thu khen hi.

¹⁴Amah in la sawmsagihte tungah a tuang tapa sawmli le tupa sawmthum nei hi. Amah in Israel-te kum giat sung thu khen hi.

¹⁵Tua ciangin Pirathon mi Hillel’ tapa Abdon si a, Amalek mite’ mualtung gam Efraim leitang tung, Pirathon-ah kivui hi.