Read Tedim Chin THUKHENTE 17 Bible Online

THUKHENTE 17 - Tedim Chin bible

THUKHENTE 17

¹Efraim mualtung gammi Mikah a kici min nei mi khat om hi.

²Amah in a nu kiangah, “Ngun pek tul le zakhat hong kiguksak lai-in a gu pa na samsiatna thu ka za hi. A ngunte pen keima guk hi a, tu-in hih lai-ah tuate om hi,” a ci hi. Tua ciangin a nu in, “Ka tapa aw, TOPA in thupha hong pia ta hen,” a ci hi.

³Amah in ngun pek tul le za khatte a nu kiangah piakik hi. A nu in, “A kiseek milim khat le a kisung milim khat bawl nadingin ka tapa a dingin TOPA’ tungah a ngunte ka apsa ahi hi. Tua ahih ciangin tu-in nang tungah kong piakik ding hi,” a ci hi.

⁴Tua ahih ciangin amah in a nu kiangah a sum a piakkik ciangin a nu in zong ngun pek zanih la-in, a kiseek milim khat le a kisung milim khat-a a bawlsak ngunseek pa kiangah pia a, tuate pen Mikah’ inn sungah om hi.

⁵Tua mipa Mikah in biakna phual khat nei a, amah in siampipuan khat le innsung pasian-te bawlin siampi a suak dingin a tapate khat a koih hi.

⁶Tua hun lai-in Israel sungah kumpi om lo a, mi khempeuh amau’ hoihsak bang ciatin gamta uh hi.

⁷Tua hun laitakin Judah gam Bethlehem khua sungah Levi mi tangval khat om hi.

⁸Tua mipa a muhna mun peuhpeuhah a teng dingin Judah gam Bethlehem khua panin paikhia hi. Tua bangin khualzinin a pai laitakin Efraim mualtung gam sunga Mikah’ inn-ah va tung hi.

⁹Mikah in ama kiangah, “Koi panin hong pai na hi hiam?” a ci hi. Amah in, “Judah gam sung Bethlehem khua-a om Levi mi ka hi a, mun ka muhna peuhah a peem ding ka hi hi,” a ci hi.

¹⁰Mikah in ama kiangah, “Kei tawh hong omin kei a dingin pa le siampi hong hi in; kum khatin ngun pek sawm, puan silh khat, le annek kong pia ding hi,” a ci hi.

¹¹Levi mipa zong Mikah tawh a tengkhawm dingin lungkim hi. Tangvalpa pen ama tungah a tapate khat tawh kibang hi.

¹²Mikah in Levi mipa koihin, tangvalpa ama siampi suakin Mikah’ inn-ah a om hi.

¹³Tua ciangin Mikah in, “TOPA in kei hong daupaisak ding hi, ci-in tu-in ka thei hi; bang hang hiam cih leh siampi-in Levi mite khat ka neita hi,” a ci hi.