Read Tedim Chin THUKHENTE 2 Bible Online

THUKHENTE 2 - Tedim Chin bible

THUKHENTE 2

¹Tu-in Gilgal panin Bokhim-ah TOPA’ vantungmi paito hi. Amah in Israel mite kiangah, “Egypt panin note kong paipihto a, na pu na pate uh tungah piak dinga ka ciam leitangah note kong paipih hi. Keimah in, ‘Note tawh ka thuciam ka siasak ngei kei ding a,

²hih gam a teng mite tawh thuciamna na bawl kei ding uh hi. Amau’ biakna taute na susia ding uh hi,’ ka hong ci hi. Ahih hangin note in ka thupiakna na mang kei uh hi. Bang hangin lehgamtat na hi uh hiam?

³Tua ahih ciangin tu-in keimah in note’ mai-ah amaute ka hawlkhia kei ding hi. Amaute pen note’ lang suak ding uh a, a pasian-te uh note a dingin thang antah hi ding hi,” a ci hi.

⁴TOPA’ vantungmi in Israel mi khempeuh tungah hih thute a gen ciangin mite a kap uh hi.

⁵Tua ahih manin tua mun pen Bokhim, ci-in min phuak uh a, tua lai munah TOPA’ tungah biakna a pia uh hi.

⁶Joshua in mite ciahsak a, Israel mite zong leitang luah dingin amau’ gamh ciatah pai uh hi.

⁷Mite in Joshua’ nuntak sung le, Israel-te a dingin TOPA’ sepsa na lian khempeuh a mu, Joshua sanga sau a nungta zawte khempeuh nuntak sungin TOPA’ na sem uh hi.

⁸Tua ciangin TOPA’ nasem ahi, Nun’ tapa Joshua, a khan kum za le kum sawmkhat a phak laitakin a si hi.

⁹Amaute in Gaash Mual leilu lam, Efraim mualtung gam sung, Timnathheres-a ama luahna huam sungah a vui uh hi.

¹⁰Tua ciangin tua khangmite khempeuh zong si khin uh a, amaute’ khit ciangin TOPA hitaleh, Israel-te a dingin a septe hitaleh a thei lo khangthak hong piang uh hi.

¹¹Tua ciangin Israel mite, TOPA’ muhna-ah a sia gamta-in Baal-te’ na sem uh hi.

¹²Egypt panin amaute a paikhiatpih a pu a pate uh Pasian ahi TOPA amaute in nusia uh hi. Amau’ kiima om mite’ pasian dangte’ nung zui-in, tuate’ mai-ah kun uh a, amaute in TOPA hehsak uh hi.

¹³Amaute in TOPA nusia uh a, Baal-te le Ashtaroth pasian-te bia uh hi.

¹⁴Tua ahih ciangin Israel-te tungah TOPA sinso a, amaute’ na a sut, mi’ na a sut thei mite’ tungah amaute a pia hi. A kiima om a galte uh tungah amaute pia a, amaute in a galte uh nangzo nawn lo uh hi.

¹⁵Galsim dingin amaute a kuankhiat sialun, TOPA in a hilhkholhsa le TOPA in amaute tungah a kiciamsa bangin amaute’ langkhatah a sia lamin TOPA pang hi. Tua ahih ciangin amaute in lungkhamna tuak uh hi.

¹⁶Tua ciangin, amaute’ na a sutgawp mite’ vangliatna panin amaute a honkhia thukhente TOPA in khangsak hi.

¹⁷Ahi zongin amaute in a thukhente uh thu ngai lo uh hi. Bang hang hiam cih leh amaute in pasian dangte bia-in tuate’ mai-ah kun uh hi. TOPA’ thupiakna a mang amau’ pute pate’ tot lampi panin amaute pial pah uh a, amaute in TOPA’ thu mang lo uh hi.

¹⁸TOPA in amaute a dingin thukhente a khansak sialin TOPA in thukhente huh a, thukhente’ nuntak sung tawntung a galte uh khutsung panin amaute hon hi. Bang hang hiam cih leh amaute a gimsak a nengniamte’ hangin amau’ tauna in TOPA’ hehpih nading piangsak hi.

¹⁹Ahih hangin thukhente a sih peuhpeuh ciangin amaute kihei kikin a pu a pate uh sangin a siazaw-in gamta zel uh hi. Adang pasian-te’ nung zui uh a, amaute’ na semin a mai uhah kun uh hi. Amaute’ gamtatnate uh ahi a, a lungkhauhnate uh ahi zongin khia lo uh hi.

²⁰Tua ahih ciangin Israel-te tungah TOPA heh mahmah a, amah in, “Hih mite in amau’ pulepate’ tungah ka thupiak ka thuciamna khialin keima thu ngai lo uh ahih manin,

²¹Joshua a sih lai-in a nusiat minamte khat zong tu a kipanin amaute’ mai-ah ka hawlkhia kei ding hi.

²²Amau’ pute pate in TOPA’ lampi a zuih bangin zuih ding a don uh hiam, a don kei uh hiam, cih a kitheih nadingin hih mite tawh Israel mite ka ze-et ding hi,” a ci hi.

²³Tua ahih ciangin TOPA in tua minamte thakhatin hawlkhia loin koihcing a, Joshua’ khut sungah amaute pia lo hi.