Read Tedim Chin THUKHENTE 21 Bible Online

THUKHENTE 21 - Tedim Chin bible

THUKHENTE 21

¹Tu-in Israel mite Mizpah-ah kiciam uh a, “Benjamin mite tungah kuamah in i tanu mo-in i kha kei ding hi,” a ci uh hi.

²Tua ciangin Bethel-ah Israel mite hong pai-in Pasian’ mai-ah nitak dong tu uh a, amaute nakpitakin a kap uh hi.

³Amaute in, “Israel-te’ Pasian, TOPA aw, tuni-in Israel-te sungah minam khat a pelem nading, hih thu bang hangin Israel-te tungah hong tung ahi hiam?” a ci uh hi.

⁴A zing ciangin mite tho baihin tua lai-ah biakna tau khat lam uh a, meihal biakna le thunuama biakna a pia uh hi.

⁵Tua ciangin Israel mite in, “TOPA a’ ding kikhopna-ah Israel minamte khempeuh sung panin kua teng hong pai lo ahi hiam?” a ci uh hi. Bang hang hiam cih leh amaute in TOPA kiangah a pai lo mite tawh kisai-in Mizpah-ah kiciamna lianpi khat bawl uh a, “Kithat ding hi,” a ci uh hi.

⁶Israel mite in a sanggam uh Benjamin mite khasiat uh a, “Tuni-in Israel-te’ sung panin minam khat bei hi.

⁷Eite in i tanute amaute tungah zi dingin pia lo ding hi hang, ci-in TOPA tawh kiciam khin ihih ciangin a nungta lai amaute’ zi ding bang cih ding ihi hiam?” a ci uh hi.

⁸Tua ciangin amaute in, “TOPA kiang Mizpah-ah Israel minamte hong pai lo a om hiam?” a ci uh hi. En in, Jabeshgilead panin tua giahphual kikhopna-ah kuamah pai lo hi.

⁹Bang hang hiam cih leh mite a kikhop ciangin, tua lai-ah Jabeshgilead a tengte khat zong om lo hi.

¹⁰Tua ahih ciangin mihonte in a galhangte uh mihing tul sawm le tulnih tua lai-ah sawl uh a, “Pai unla Jabeshgilead-a tengte namsau tawh va vatgawp unla, nupite le naupang neute zong hih un.

¹¹Hih bangin na hih ding uh hi: Pasal khempeuh le pasal tawh a lumkhawmsa numei khempeuh na sumai ding uh hi,” ci-in thu pia uh hi.

¹²Amaute in Jabeshgilead-a teng mite lakah pasal tawh a lumkhawm nai lo nungakno zali mu uh a, Kanaan gam a om Shiloh giahphual ah tuate hong paipih uh hi.

¹³Tua ciangin mihon buppite in Rimmon Suangpi-a om Benjamin mite kiangah thu puak a, amaute kiangah kilemna thu gen uh hi.

¹⁴Tua hun ciangin Benjamin-te hong ciah uh a, amaute in Jabeshgilead numei a hing a a koihte uh pia uh a, ahi zongin amau a dingin kicing zo lo hi.

¹⁵Israel minamte sungah TOPA in kitapkhapna omsak ahih manin mite in Benjamin-te khasiat uh hi.

¹⁶Tua ciangin mihonte’ upate in, “Benjamin-te’ sung panin numeite kithat khin ahih manin a omlai mite’ zi ding bang cih ding ihi hiam?” a ci uh hi.

¹⁷Amaute in, “Israel-te sung panin minam khat a bei loh nadingin Benjamin a suakta laite a dingin gamhluah a om ding kisam hi.

¹⁸Ahi zongin amau’ zi dingin i tanute i pia thei kei hi,” a ci uh hi. Bang hang hiam cih leh Israel mite kiciam khinin, “Benjamin-te tungah zi a pia mipa in samsiatna ngah ta hen,” a ci uh hi.

¹⁹Tua ahih ciangin amaute in, “En un, Bethel leilu lam, Bethel panin Shekhem lamah a paito lam lianpi nisuahna lam, Lebonah leitaw lamah a om Shiloh-ah TOPA a’ ding kumsim pawi khamna om hi,” a ci uh hi.

²⁰Tua ahih ciangin amaute in Benjamin mite thu pia-in, “Pai-in leenggui lote-ah bukin

²¹vil un. Laamna-ah Shiloh nungakte a laam dingin hong pai uhleh, leenggui lote panin note in delhin mi khempeuh in na zi ding ciat uh Shiloh nungakte man unla, Benjamin gamah ciahpih un.

²²Amau’ pate ahi a, a sanggampate uh ahi zongin a lungkim lohna uh kote’ kiangah a gen dingin hong pai uh ciangin kote in amaute kiangah, ‘Kote tungah hehpihna tawh amaute hong pia un; bang hang hiam cih leh mi khempeuh zi ding galsimna sungah ka ngahsakzo kei uh a, note zong a mawh na suahloh nadingun note in amaute tungah utna tawh na piaktawm uh ahi kei hi,’ ka ci ding uh hi,” a ci uh hi.

²³Benjamin mite zong tua bangmahin gamta uh a, amau mi a phazah tawh kituakin a laamte lak panin a zi dingun a la uh hi. Tua ciangin amaute pai-in a gamhluahna uhah ciahkik uh a, khuapite lamkikin a sungah a teng uh hi.

²⁴Tua hun ciangin Israel midangte tua lai panin paikhia uh a, mi khempeuh amau’ minam le a innkuanpih ciat, amau’ gamhluahna ciatah a ciah uh hi.

²⁵Tua hun lai-in Israel-te sungah kumpi om lo a, amau’ hoihsak bang ciatin mi khempeuh a gamta uh hi.