Read Tedim Chin THUKHENTE 4 Bible Online

THUKHENTE 4 - Tedim Chin bible

THUKHENTE 4

¹Ehud a sih khit ciangin TOPA’ muhna-ah Israel mite a sia gamta kik uh hi.

²Tua ciangin TOPA in Hazor-ah a uk, Kanaan kumpipa Jabin’ khut sungah amaute a pia hi. Ama galkapte a ukpa pen, Harosheth-ha-goiim ah a teng Sisera ahi hi.

³Tua ciangin Israel mite huhna a ngen dingin TOPA’ tungah a kiko uh hi. Bang hang hiam cih leh amah in sik leeng zakua nei a, Israel mite kum sawmnih sung nakpitakin gim a pia hi.

⁴Tua hun lai-in Lappidoth’ zi kamsang numei Deborah in Israel-te thu khen hi.

⁵Tua nu, Efraim mualtung gam sung Ramah le Bethel kikal nisuhkung nuai-ah tu zel a, thu a khensak dingin ama kiangah Israel mite hong pai uh hi.

⁶Amah in mi sawlin Naftali gam Kedesh panin Abinoam’ tapa Barak samsakin ama kiangah, “TOPA, Israel-te’ Pasian in nang thu hong pia-in, ‘Pai in, Tabor Mual-ah na mite khawm inla, Naftali minam le Zebulun minam panin mi tul sawm bang la in hong ci hi lo ahi hiam?

⁷Keimah in Jabin’ galkapmang Sisera, Kishon gun-ah nang hong dawntuah dingin a leengte le a galkapte tawh ka kaikhia ding a, na khut sungah amah kong pia ding hi,’ hong ci hi,” a ci hi.

⁸Barak in ama kiangah, “Kei na hong zuih ding le, ka kuan ding hi. Ahih hangin kei tawh nong kuan kei ding le, ka kuan kei ding hi,” a ci hi.

⁹Tua ciangin amah in, “Nang tawh kong kuan taktak ding hi. Ahi zongin gualzawhna pen nangma min than nading hi lo ding hi. Bang hang hiam cih leh TOPA in numei khat’ khut sungah Sisera pia ding hi,” a ci hi. Tua ciangin Deborah dingin Barak tawh Kedesh-ah pai hi.

¹⁰Barak in Kedesh-ah Zebulun minam le Naftali minamte a sam hi. Ama kiangah mihing tul sawm bang kuanto uh a, amah tawh Deborah kuanto khawm hi.

¹¹Tu-in Moses’ zi’ sanggampa Hobab’ suanlekhak Ken mite sung panin Ken mi Heber paikhia a, Kedesh kianga Zaanannim-a tawsaw ciang pekah a puanbuk a lam hi.

¹²Abinoam’ tapa Barak, Tabor Mual-ah paito khin, ci-in Sisera kiangah a kigen ciangin,

¹³Sisera in a leeng khempeuh, sik leeng zakua, le ama kianga om mi khempeuh, Harosheth-ha-goiim panin Kishon gun-ah a samkhia hi.

¹⁴Tua ciangin Deborah in Barak kiangah, “Pai in! Bang hang hiam cih leh TOPA in na khut sungah Sisera hong piak ni ahi hi. Na mai-ah TOPA pai hi lo ahi hiam?” a ci hi. Tua ahih ciangin mihing tul sawm bang in zui-in Tabor Mual panin Barak a paisuk hi.

¹⁵TOPA in Barak’ mai-ah Sisera le a leengte khempeuh a taisak hi. Tua ciangin Sisera a leeng tung pan tuakin a khe-in a tai hi.

¹⁶Barak in Harosheth-ha-goiim ciang dong a leengte le a galkapte delh a, Sisera’ galkapte khempeuh namsau tawh kithatin beimang uh a, mi khat zong suakta lo hi.

¹⁷Ahih hangin Sisera, Ken mi Heber’ zi Jael’ puanbukah a khe-in a tai hi. Bang hang hiam cih leh Hazor kumpipa Jabin le Ken mi Heber’ innkuante kilem uh hi.

¹⁸Sisera a dawn dingin Jael hong pusuakin ama kiangah, “Hong kihei in, ka topa aw, kei lamah hong kihei in; lau kei in,” a ci hi. Tua ahih ciangin ama puanbukah Sisera hong pai a, tua nu in sualphah puan khat tawh amah na khuh hi.

¹⁹Amah in tua nu kiangah, “Hong thum ing, dawn ding tui hong pia in; bang hang hiam cih leh ka dangtak hi,” a ci hi. Tua ahih ciangin amah in bawngnawi koihna savun thawl hongin dawnsakin amah a khuhkik hi.

²⁰Amah in tua nu kiangah, “Puanbuk kongah ding inla, mi khatpeuh hong pai-in na kiangah, ‘Hih lai-ah mi khatpeuh a om hiam?’ hong cih leh, ‘Om kei,’ na ci in,” a ci hi.

²¹Ahih hangin Heber’ zi Jael in puanbuk khetphim khat la a, a khutah sek khat tawi-in ama kiangah damtakin pai a, a gimluatna hangin ihmucipin a om laitakin a khetphim in lei a bat dongin a paangah a khensuk hi. Tua ciangin Sisera a si hi.

²²En in, Barak in Sisera hong delh ciangin amah a dawn dingin Jael hong pusuakin ama kiangah, “Hong pai in, na mi zon kong lak ding hi,” a ci hi. Tua ahih ciangin tua nu’ puanbuk sungah amah hong pai hi. Tua lai-ah Sisera a paangah puanbuk khetphim tawh a si-in na om hi.

²³Tua ahih ciangin tua ni-in Israel mite’ mai-ah Pasian in Kanaan kumpi Jabin nuaisiah hi.

²⁴Israel mite in Kanaan kumpipa Jabin a suksiat matengin Kanaan kumpipa Jabin tungah thuak hak semsem uh hi.