Read Tedim Chin THUKHENTE 6 Bible Online

THUKHENTE 6 - Tedim Chin bible

THUKHENTE 6

¹TOPA’ muhna-ah Israel-te a sia gamta uh a, TOPA in Midian-te’ khut sungah amaute kum sagih sung a pia hi.

²Israel-te tungah Midian-te gualzo uh hi. Midian-te’ kiang panin a buk nadingun leihawmte le munmuanhuaite a bawl uh hi.

³Bang hang hiam cih leh Israel-te in khai a tuh peuhmah uh ciangin Midian-te le Amalek mite le Nisuahna lam mite hong pai-in amaute sim uh hi.

⁴Amaute a sim nadingun giahphual satin Gaza kiim ciangciang dong lei pana piangte susia uh a, Israel mite a nuntak nading bangmah nusia loin, tuu ahi a, bawngtal ahi a, la ahi zongin siit nei lo uh hi.

⁵Bang hang hiam cih leh amaute a ganhingte le a puanbukte uh tawh kauphe honpi bangin tamin hong pai uh a, amaute le a kalaohte uh kisim zo lo hi. Tua ahih ciangin amaute hong tun ciangin gamteng beisak uh hi.

⁶Midian-te’ hangin Israel-te kiniamkoih mahmah a, Israel mite in TOPA’ tungah huhna ngenin kiko uh hi.

⁷Midian-te’ hangin Israel mite TOPA’ tungah a kiko uh ciangin,

⁸TOPA in Israel mite kiangah kamsang khat a sawl hi. Amah in amaute kiangah, “Israel-te’ Pasian, TOPA in hih bangin ci hi: Salsuahna Egypt panin note kong paikhiatpih hi.

⁹Egypt mite le note hong nengniam mi khempeuh khut sung panin note kong honkhia a, note’ mai-ah amaute hawlkhia-in, amau’ leitang note kong pia hi.

¹⁰Tua ciangin note kiangah, ‘Kei pen TOPA na Pasian uh ka hi hi. Na tenna uh Amor mite’ pasian-te zahtakna na pia kei ding uh hi,’ kong ci hi. Ahih hangin note in ka thu na ngai kei uh hi, ci hi,” a ci hi.

¹¹Tua ciangin Ofrah khua-ah TOPA’ vantungmi hong pai a, Abiezer mi Joash neihsa tawsaw nuai-ah hong tu hi. Tua laitakin Joash’ tapa Gideon in Midian mite’ muh loh dingin leenggah sukna-ah mangbuh cil simin na om hi.

¹²TOPA’ vantungmi ama tungah kilangin ama kiangah, “TOPA in nang hong ompih hi, a thahat a vanglian mipa aw,” a ci hi.

¹³Gideon in ama kiangah, “Kong thum hi, sia aw, TOPA in kote hong ompih ahihleh, bang hangin hih thu khempeuh ko tungah hong tung ahi hiam? Ka pate un kote tungah hong genin, ‘TOPA in Egypt panin eite hong paipih hi lo ahi hiam?’ a cih uh a lamdang ama sepnate khempeuh koi-ah om ta ahi hiam? Ahih hangin tu-in TOPA in kote hong paaikhia-in Midian-te’ khut sungah hong pia khin hi,” a ci hi.

¹⁴Tua ciangin ama lamah TOPA kihei-in, “Hih nangma thahatna tawh pai inla, Midian-te’ khutsung panin Israel-te honkhia in. Nangmah hong sawl khin hi lo ka hi hiam?” a ci hi.

¹⁵Tua ciangin Gideon in ama kiangah, “Kong thum hi, Topa aw, Israel-te bangci hotkhiat zawh ding ka hi hiam? En in, Manasseh minam sungah keima behte a hat lo pen hi a, ka innkuan sung panin kei a neupen ka hi hi,” a ci hi.

¹⁶TOPA in ama kiangah, “Nang kong ompih ding a, nangmah in mihing khat bang lelin Midian-te na vatgawp ding hi,” a ci hi.

¹⁷Tua ciangin amah in, “Tu-in nong hehpih zawh leh, kei tawh a kiho mi pa pen nang na hihna lim khat hong lak in.

¹⁸Kong thum hi, letsong puakin nang kiangah hong pai-in nangma mai-ah kong koih mateng hih lai panin na paikhia kei in,” a ci hi. Amah in, “Nong tunkik mateng ka na om ding hi,” a ci hi.

¹⁹Tua ahih ciangin Gideon a inn-ah pai-in keelno khat le annel seu khat silngo sawh loh moh a bawl hi. A sa ciang sung khatah koihin a satui beel sung khatah koih a, tawsaw nuai ama kiangah tuate hong paipihin a pia hi.

²⁰Tua ciangin Pasian’ vantungmi in ama kiangah, “Sa le silngo sawh loh moh la-in, hih suang tungah koih inla, a tungah satui sung in,” a ci hi. Tua bangmahin amah in a hih hi.

²¹Tua ciangin TOPA’ vantungmi in a khutsung a om ciangkhut dawn dawksakin, sa le silngo sawh loh mohte a su hi. A suang panin mei piangkhia-in, sa le silngo sawh loh moh a kangtum hi. Tua ciangin ama muhna panin TOPA’ vantungmi a mang hi.

²²Tua ciangin Gideon in amah pen TOPA’ vantungmi ahihlam a thei hi. Gideon in, “Ala, Topa PASIAN! TOPA’ vantungmi mai kituahin ka mukha khin hi,” a ci hi.

²³Ahih hangin TOPA in ama kiangah, “Nopna na tungah hong om ta hen; lau kei in, na si kei ding hi,” a ci hi.

²⁴Tua ciangin Gideon in TOPA a dingin biakna tau khat tua lai-ah lamin tua pen, “TOPA in nopna ahi hi”, ci-in min a phuak hi. Tua pen, Abiezer mite’ neihsa Ofrah khua-ah tuni dongin a dinglai hi.

²⁵Tua zanin TOPA in ama kiangah, “Na pa’ bawng sung pan kum sagih a pha a bawngtal nih la inla, na pa’ neih Baal biakna tau phelin, a gei-a om Asherah milim phuk in.

²⁶Tua ciangin hih lai munmuanhuai dawnah TOPA na Pasian a dingin biakna tau khat lamin, a suangte a ngeina ding bangin koih in. Tua ciangin a bawngtal nih la-in, na phuk Asherah milim sing tawh meihal biakna-in pia in,” a ci hi.

²⁷Tua ahih ciangin Gideon in a nasemte mi sawm paipihin, TOPA in ama tungah a gen bangin a hih hi. Ahih hangin sunin a hih ding a innkuanpihte le a khuamite kihta lua ahih manin zanin a hih hi.

²⁸Tua khua mite zingsang tungin a thawh uh ciangin, Baal biakna tau kiphelkhia-in a gei-a om Asherah milim kiphuk a, a kilam thak biakna tau tungah bawngtal a nihna a kipia a mu uh hi.

²⁹Amaute khatlekhat kiangah, “Hih na kua in hih ahi hiam?” kici uh hi. Amaute in a thu kanin a dot uh ciangin, “Joash’ tapa Gideon in hih hi,” kici uh hi.

³⁰Tua ciangin tua khuamite in Joash kiangah, “Na tapa in Baal biakna tau phelkhia-in a gei-a om Asherah milim phuk ahih manin ka thah theih nadingun amah hong paikhiatpih in,” a ci uh hi.

³¹Ahih hangin Joash in ama langkhatah a pang mite khempeuh tungah, “Baal panpih ding a, ama tupna hutpih ding na hi uh hiam? Amah a panpih peuhmah zingsang ciangin kithat ding hi. Amah pasian ahihleh amahmah kihu tawm tahen. Bang hang hiam cih leh ama biakna tau a kiphelsak ahi hi,” a ci hi.

³²Tua ahih ciangin tua ni-in Gideon, “Keima langkhatah Baal pangsak un,” a cihnopna ahi Jerubbaal min kiphuak hi. Bang hang hiam cih leh Gideon in a biakna tau a phel hi.

³³Tua ciangin Midian mite, Amalek mite le Nisuahna lam mite khempeuh hong paikhawm uh a, amaute in Jordan kantanin Jezreel Kuam-ah giahphual a sat uh hi.

³⁴Ahih hangin Gideon’ tungah TOPA’ kha hong tung hi. Amah in peengkul gingsak a, amah a zui dingin Abiezer mite kisamkhia hi.

³⁵Amah in Manasseh gam khempeuhah kamtaite sawl a, amaute zong amah a zui dingin kisam hi. Amah in Asher, Zebulun le Naftali minamte kiangah kamtaite sawl a, amah a pawm dingin amaute zong paito uh hi.

³⁶Tua ciangin Gideon in Pasian kiangah, “Na gensa bangin keima tha tawh Israel-te na hotkhiat ding leh,

³⁷en in, ancilna sual tungah tuumul lom khat ka koih hi. Tuumul tung bekah daitui omin leilak dang khempeuh a keu leh, na gensa bangin keima tha tawh Israel-te na honkhia ding hi, cih ka thei ding hi,” a ci hi.

³⁸Tua bangmahin a piang hi. A zing ciangin tho baihin a tuumulte a tui suk a, tuumul panin tui hai khat dim a sukkhia hi.

³⁹Tua ciangin Gideon in Pasian kiangah, “Kei tungah hong heh kei in, tu-a khatvei bek hong pausak lai in, kong thum hi; tuumul tawh hih khatvei bek hong sinsak lai in, kong thum hi. Tuumul tung bek keusak inla, mun dang leitung khempeuhah daitui omsak in,” a ci hi.

⁴⁰Tua bangmahin Pasian in tua zanin a hih hi. Bang hang hiam cih leh tuumul tung bek keu a, mun dang leitung khempeuhah daitui a om hi.