Read Tedim Chin 2 JOHAN NIHNA 1 Bible Online

2 JOHAN NIHNA 1 - Tedim Chin bible

2 JOHAN NIHNA 1

¹A khangham bel keimah Johan in Teeltuam ahi, kong it taktak tonu le na pawlpi mite kiangah lai ka hong gelh hi. Kei bek in a hong it hi loin thuman a thei taktakte khempeuh in zong hong it uh hi.

²Thuman thei ihih manin a tawntungin tua thu-ah i kip ding hi.

³Pa Pasian le a Tapa Jesuh Khrih in dikna, hehpihna, le nopsakna, eite tungah hong pia hen la, thuman le itna tawh tua thuphate khempeuh eite a’ hong hi tahen.

⁴Pa Pasian in eite hong thupiakna bangmahin na pawlpi mite pawlkhat in thu a mantakin a zuihna uh mu ka hih manin ka nuam mahmah hi.

⁵Tua ahih ciangin ka hong it tonu aw, ka hong thum nopna panin: Eite khempeuh khatlekhat ki-it ni, cihna ahi hi. Hih ka hong gen thu pen thuthak hi lo a, a kipatcil pek a kipanin i neihsa thupiakna ahi hi.

⁶Itna thu ka hong gen ciangin Pasian’ thupiakte zui ding cihna ahi hi. A kipat cil a kipan na zaksa uh ahi hih thupiakna pen na khan tawntungun zui-in itna na nei ta un.

⁷Bang hang hiam cih leh leitungah midangte a khem tampi hong omta a, tua mite in Jesuh Khrih, mihing banga hong paina thu a nial uh hi. Tua bang mite pen mi khemte hi a, Khrih’ Gal ahi uh hi.

⁸Tua ahih ciangin na sepsa uh thuman taankha loin, a kimtakin na ngahtheih nadingun limtakin kidawm un.

⁹Khrih’ thuhilhna zui loin a khengvalin a pai mite pen Pasian tawh a kipawl lo ahi hi. Ahi zongin a thuhilhna a zuite pen Pa Pasian le a Tapa tawh a kipawl ahi uh hi.

¹⁰Tua ahih manin Khrih’ hilh ahi hih thute a hilh lo midang khatpeuh note kiangah a hong pai leh na inn uhah zong na tungsak kei unla, zong na hopih kei un.

¹¹Bang hang hiam cih leh tua bang mite a’ ding thupha a deihsak mite pen amau’ nasep hoih lohna-ah zong a kipawl ahi uh hi.

¹²Gen ding tampi ka neihlai hangin lai-in hong gelh lo zaw-in, eite’ lungdamna a kicinzawk theih nadingin kei hong pai-in khatlekhat maitang kimu-in thu genkhawm dingin ka kingaihsun hi.

¹³Teeltuam ahi hih lai-a om pawlpi mite in hopihna kam hong khak uh hi.