Read Tedim Chin MAANGMUHNA 10 Bible Online

MAANGMUHNA 10 - Tedim Chin bible

MAANGMUHNA 10

¹Tua ciangin a thahat vantungmi khat, meiipi in tuamin, a lu tungah sakhituihup khimin, a maitang nitaang tawh kibangin, a khete meikuang khuampi tawh a kibang khat, vantung panin a hong kumsuk ka mu hi.

²A khut sungah laizial neu khat phelsa-in a tawi hi. A taklam khe in tuipi sung sikin, a veilam khe in leitung sik a,

³nakpitakin kiko ahih manin humpinelkai hawk tawh a kibang hi. Tua bangin a kiko ciangin van sagih a gingte in a dawng hi.

⁴Tua van sagih a gingte’ thugen a mankhit phetin tua a thugente lai-ah a gelh dingin ka kithawi hi. Ahi zongin vantung panin awging khat ka za a, “Tua thute lai-ah gelh kei inla, tua van sagih a gingte’ thugen imcip in,” hong ci hi.

⁵Tua ciangin tuipi le leitung kalkakin a ding ka muh vantungmi in vantung lamah a taklam khut laamto-in,

⁶a nungta tawntung, vantung le a sunga om khempeuh, leitung le a sunga om khempeuh, le tuipi le a sunga om khempeuh a bawl Pasian’ min tawh kiciam a, “Tu-in zekai nawn het lo ding hi.

⁷A sagihna vantungmi in a peengkul a tum ciangin ama nasem kamsangte tungah a gensa bangin Pasian in ama ip thusim a geelte hong semkhia ding hi,” a ci hi.

⁸Tua ciangin vantung panin awging ka zak in kei kiangah thu hong genkik a, “Tuipi le leitung kalkakin a ding vantungmi’ khut sungah a om laizial kiphelsa pen va la in,” hong ci hi.

⁹Tua ahih manin vantungmi kiangah va pai-in tua laizial neu a hong piak nadingin ka va gen leh amah in, “La inla, ne in. Na gil sung a tun ciangin thuk mahmah ding a, ahi zongin na kam sungah khuaizu bangin khum mahmah ding hi,” hong ci hi.

¹⁰Kei zong tua vantungmi’ khutsung panin a laizial neu la-in ka ne hi. Ka kamah khuaizu bangin khum dekdak a, ahi zongin ka nekkhit ciangin ka gil sung thuk velvalsak hi.

¹¹Tua ciangin keima kiangah, “Minam tuamtuam, pau nam tuamtuam a zangte le kumpite tungah a piang ding thu na gen ding kisam lai hi,” hong kici hi.