Read Tedim Chin MAANGMUHNA 15 Bible Online

MAANGMUHNA 15 - Tedim Chin bible

MAANGMUHNA 15

¹Tua ciangin vanah nalamdang lian mahmah khat ka mu hi. Gimna nam sagih a hong keng vantungmi sagih om uh a, Pasian’ hehna a lah tawpna uh ahih manin a nunung pente ahi uh hi.

²Tua ciangin mei tawh a kihel limlang peekpi kiphah tuipi tawh a kibang ka mu hi. Ganhing, a lim, le a min nambat tawh a kipiasa a zote, Pasian’ lasakna harpte tawi-in tuipi tawh a kibang gei-ah a ding uh hi.

³Amaute in Pasian’ nasem Moses la le Tuuno la sa uh a, “A Vanglian Topa Pasian aw, na nasepnate lamdangin lian mahmah hi. Khang tawntung a Kumpipa aw, na nasepnate-ah thumanin na thutang hi.

⁴Topa aw, nang, kua in hong kihta lo ding a, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in, na mai-ah hong bia ding uh hi,” a ci uh hi.

⁵Tua khit ciangin ka khuadak leh a sungah Pasian’ Ompihna Mun a om vantung biakinn a kihong ka mu hi.

⁶Tua biakinn sung panin vantungmi sagih, gimna sagih tawh hong pusuak uh a, puanpak silhin, kham awmgak tawh a awm uh a gak uh hi.

⁷Ganhing lite sung panin khat in a nungta tawntung Pasian’ hehna a dim hai sagih, vantungmi sagihte kiangah a pia hi.

⁸Tua biakinn sungah Pasian’ minthanna le a vangliatna khu kidim ahih manin, vantungmi sagihte in hong paipih gimna sagih a ven’ matengin biakinn sungah kuamah lut thei lo uh hi.