Read Tedim Chin MAANGMUHNA 19 Bible Online

MAANGMUHNA 19 - Tedim Chin bible

MAANGMUHNA 19

¹Tua khit ciangin vantungah mihonpi a kikona awging tawh a kibang khat ka za a, “Pasian phat un! Hotkhiatna, minthanna le vangliatna pen eite’ Pasian-a’ ahi hi.

²A thukhennate thumanin thutang a, a paktatna tawh leitung mi khempeuh a siasak, a paktat nu tungah thu khen khinta a, ama nasemte a thahsakna hangin ama tungah a phu la khinta hi,” a ci uh hi.

³Tua ciangin khatvei kiko kik leuleu uh a, “Pasian phat un! Tua khuapi a katna khu tatsat loin van lamah khuto tawntung hi,” a ci uh hi.

⁴Tua ciangin upa sawmnih le lite le ganhing lite in tokhom tungah a tu Pasian mai-ah kunin bia uh a, “Amen! Pasian phat un!” a ci uh hi.

⁵Tua ciangin tokhom panin aw khat hong ging a, “Amah a kihta a lian a neu mite, le ama nasem khempeuhte aw, eite’ Pasian phat un,” a ci hi.

⁶Tua ciangin tuizeu ging le vanging tawh a kibang mihonpi kikona awging bang khat ka za a, “A Vanglian eite’ Topa Pasian kumpi suakkhin ahih manin Pasian phat un.

⁷Tuuno’ zineih ding hun hong tungta a, a Lawmnu a kithawisa-in omkhin ahih manin lungdam kipakin amah phat ni.

⁸Puan hoih mahmah, siangin a pak mahmahte, ama silh dingin kipia hi,” a ci uh hi. Tua puan hoih pen Pasian’ mi siangthote’ gamtatna mante ahi hi.

⁹Tua ciangin vantungmi in keima kiangah, “Hih thu gelh in: Tuuno’ zineihna pawi-ah a kisam mite a hampha mahmah ahi hi,” hong cihkhit ciangin, “Hihte pen Pasian’ gen taktak kammal ahi hi,” hong cithuah lai hi.

¹⁰Tua ciangin amah a bia dingin a khe phungah ka kunsuk a, ahi zongin amah in, “Kei hong bia kei in. Kei pen Jesuh’ hong thugente a lenkip nang le na sanggamte khempeuh tawh nasemkhawm khat ka hi hi. Pasian bia in!” hong ci hi. Jesuh’ thugen in kamsang nasep sepnop nading lungsim a guan ahi hi.

¹¹Tua ciangin vantung a kihong ka mu a, sakol kang khat a om hi. A tungah a tuang pa pen a Citak a Thuman pa kici hi. Amah in thumanin thu khenin gal a do hi.

¹²A mittangte meikuang tawh kibang a, lukhu tampi a khu hi. Amah simloh kuamah dang in a theih loh min khat ama tungah a kigelh hi.

¹³Sisan sungah a kidiah puantualpi khat silh a, amah pen, “Pasian’ Thu,” cihna min tawh a kisam hi.

¹⁴Vantung galkapte a siangtho puanpak hoih tawh kizem uh a, sakol kangte tungah tuangin amah a zui uh hi.

¹⁵Minam dangte a zawhgawp nading namsau hiam khat a kam sung panin a pusuak hi. Amah in sik ciangkhut tawh minam dangte ukin, a Vanglian Pasian’ heh mahmahna tawh leenggah cilna-ah leengtui a sukkhia ding hi.

¹⁶A puan tung le a phei tungah, “Kumpite’ Kumpi, topate’ Topa,” ci-in a min kigelh hi.

¹⁷Tua ciangin ni sungah vantungmi khat a ding ka mu a, amah in vankim lai-ah a leeng vasa khempeuh nakpitakin samin, “Pasian’ pawi lianpi-ah a kikhawm dingin hong pai un.

¹⁸Hong pai unla, kumpite’ sa, galkapmangte le galkapte’ sa, sakolte le a tungah a tuangte’ sa, a lian a neu, silate le sila ahi lo mi khempeuhte’ sa hong ne un,” a ci hi.

¹⁹Tua ciangin sakol tungah a tuang pa le a galkapte a sim dingin ganhing le leitung kumpite a galkapte uh tawh a kikaikhawm ka mu hi.

²⁰Tua ciangin a ganhing le tua ganhing omna-ah nalamdang a bawl kamsang zuau pa kiman khawm hi. Ganhing ciaptehna a neite le ganhing lim a biate pen tua na lamdangte tawh a kikhem ahi hi. Ganhing le kamsang zuau pa, a nihun kat kikhulna meiphualpi sungah a hingtangun kilawn hi.

²¹Sakol tungah a tuang pa’ kam panin a hong pusuak namsau in amaute’ galkap khempeuh thatlum khin a, vasate khempeuh in a nekzawh zahzahun amaute’ sa a ne uh hi.