Read Tedim Chin MAANGMUHNA 21 Bible Online

MAANGMUHNA 21 - Tedim Chin bible

MAANGMUHNA 21

¹Tua ciangin van thak khat le lei thak khat ka mu hi. Van masa le lei masa maimang khin a, tuipi zong om nawn lo hi.

²Mothak khat a pasal tawh a kituah dingin a kizem bangin vantung Pasian kiang panin Khuapi Siangtho ahi Jerusalem khua thak a hong paisuk ka mu hi.

³Tokhom panin nakpitakin awging khat ka za a, “Tu-in Pasian omna inn pen mite tawh omkhawm ta hi. Pasian in amaute ompih ding a, amaute pen ama mite hi ding uh hi. Pasian mahmah amaute tawh omkhawm ding a, amah pen amaute’ Pasian hi ding hi.

⁴Amaute’ mit panin khitui khempeuh nulsak ding hi. Thu luisate maimang khinta ahih manin sihna, dahna, le na sa-a kahna cihte om nawn lo ding hi,” a ci hi.

⁵Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi.

⁶Tua ciangin amah in, “Tu-in man khinta! Kei pen a kipatna le a tawpna a cihna Alfa le Omega ka hi hi. A dangtak mi khempeuh tungah nuntakna tuinak panin a khongin tui ka pia ding hi.

⁷A gualzo mi khempeuh in kei tung panin a ngah ding thu in: Kei pen amaute’ Pasian ka hi ding a, amaute keima ta ahi ding uh hi.

⁸Ahi zongin a meidawite, a lehtatte, a lampialte, mi thatte, a paktatte, aisante, milim biate, le zuaugente om nading mun pen sihna nihna ahi kat a kikhulna meiphualpi kuang sung ahi hi,” a ci hi.

⁹Tua ciangin gimna nunung sagihte a dimin a om hai sagih a tawi vantungmi sagihte sung panin khat kei kiangah hong pai-in thu hong gen a, “Hong pai in; Tuuno zi, a Mothak ka hong lak ding hi,” hong ci hi.

¹⁰Tua laitakin Kha Siangtho tawh ka kidim a, tua vantungmi in mual sang mahmah khat dawnah hong paipih hi. Vantung Pasian kiang panin a hong paisuk Khuapi Siangtho ahi Jerusalem khua a hong lak hi.

¹¹Tua khuapi pen Pasian’ vang tawh tee ziazua a, Jasper suangmanpha bangin taang a, Kristal suangmanpha bangin siang kilkel hi.

¹²A kulh sahin sang mahmah a, kulhkongpi sawm le nih nei-in, a kongpite-ah vantungmi sawm le nih om a, a kulhkongpite tungah Israel minam sawm le nihte’ min kigelh hi.

¹³Nisuahna lamah kongpi thum, leilu lamah thum, leitaw lamah thum, nitumna lamah thum mah om hi.

¹⁴Tua khuapikulh pen kulh tawphah suang sawm le nih tungah a kiciang hi a, tua suangtawphahte tungah Tuuno sawltak sawm le nihte’ min kigelh hi.

¹⁵Keima kiangah thu a hong gen vantungmi in tua khuapi, a kulhkongpite le a kulh a teh nadingin kham kibawl tehna ciang khat a nei hi.

¹⁶Tua khuapi a pang kikim linlian a, a dung a vai a kikim ahi hi. A ciang tawh khuapi a teh ciangin tai tul le zanga bang pha a, a dung, a vai le a sanna kikim hi.

¹⁷A kulhpi zong ama zat tehna tawh a teh ciangin pi zanih sawmkhat guk a sang hi.

¹⁸A kulhpi dingin jasper suangmanpha kiciang a, a khuasung pen kham citak tawh a kibawl hi a, limlang bangin siang kilkel hi.

¹⁹Tua khuapi kulh suangtawphahte pen suangmanpha namkim tawh kizem hi. A masa-in jasper suangmanpha, a nihna-ah sapfira suangmanpha, a thumna-ah agate suangmanpha, a lina-ah emerald suangmanpha,

²⁰a ngana-ah onik suangmanpha, a gukna-ah karnelian suangmanpha, a sagihna-ah khrisolait suangmanpha, a giatna-ah beryl suangmanpha, a kuana-ah topaz suangmanpha, a sawmna-ah khrisoprase suangmanpha, a sawm le khatna-ah jakinth suangmanpha, a sawm le nihna-ah amethyst suangmanpha tawh a kizem hi.

²¹A kongpi sawm le nihte kep sawm le nih tawh a kibawl hi a, kongpi khat ciangin kep sabit khat ahi hi. A khuapi sung lampite kham citak vive hi a, limlang bangin a sung kimu paisuak thei hi.

²²A Vanglian Topa Pasian le Tuuno pen khuapi biakinn hita ahih manin tua khua sungah biakinn dang ka mu kei hi.

²³Pasian’ minthanna vang pen khuavak hi a, Tuuno zong meivak hi khin ahih manin tua khuapi in nitaang le khataang cihte kisam lo hi.

²⁴Tua a taang sungah leitung mite lam pai ding uh a, leitung kumpite in a neihsa khempeuh uh hong paipih ding uh hi.

²⁵Zan khuamial hun cih om lo ding ahih manin kulhkongpite khak hun cih om loin a tawntungin kihong paisuak ding hi.

²⁶Leitung mite’ hauhna le liatnateng tua khuapisung hong kitunpih ding hi.

²⁷Ahi zongin a siang lo, a hoih loin a gamta mi, zuau a gen mite kuamah lut thei lo ding uh a, a nungta mite a kigelhna Tuuno laibu sungah a min a omte bek tua khuapi sungah lutthei ding uh hi.