Read Tedim Chin MAANGMUHNA 3 Bible Online

MAANGMUHNA 3 - Tedim Chin bible

MAANGMUHNA 3

¹“Sardis khua pawlpi vantungmi kiangah lai gelh inla, Pasian Kha Siangtho sagih le aksi sagih a nei pa’ thugen in: Note’ gamtatnate ka thei a, note a si hinapi-in a hing min na pua uh hi.

²Tua ahih manin khua phawk unla, na neihlai sunte uh a beimang ma-in thasanpha kik un. Bang hang hiam cih leh na nasepnate uh Pasian’ muhna-ah a cingtaak nai het lo ahihna thu ka thei hi.

³Tua ahih manin note a hong kihilh na zaksa uh thute phawkkik unla, tua thute zui-in na mawhna panun kisik kik un. Khua na phawk kei uhleh note kiangah guta bangin ka hong pai ding a, ka hong tunlam nangawn na thei kei ding uh hi.

⁴Ahi zongin Sardis khuasunga om note lakah a puan a ninsak nai lo tawmkhat na om uh hi. Tua bang mite kilawm uh ahih manin kei tawh puanpak silhin ka tonkhawm ding uh hi.

⁵A gualzo mite in tua bangin puanpak silh ding uh a, a nungta mite a kikhumna laibu sung panin amaute’ min ka phiat kei ding hi. Ka Pa le ama vantung mite kiangah zong keima mite ahihna uh ka pulak ding hi.

⁶Tua ahih manin zak nading bil a neite in Kha Siangtho in pawlpite kiangah a gen thute na za un.

⁷“Filadelfia khua pawlpi vantungmi kiangah lai gelh inla, David’ tawhtang kemin, ama honsa kong kuamah in a khak zawh loh, ama khaksa kong kuamah in a hon zawh loh, a thuman a siangthopa’ thugen in:

⁸Note’ nasepnate ka thei hi. Na tha uh a hat loh hangin ka thu zui-in kei tungah na hong cihtakna uh ka thei hi. Tua ahih manin kuamah in a khak zawh loh ding kong, note’ mai-ah honsa-in ka koih hi.

⁹Jew mi hi lo napi-in Jew mi hi ung, ci-in zuau a gen Satan’ pawlte, note’ mai-ah hong paisakin na khephung uhah ka boksak ding a, note ka hong itna thu amaute ka theisak ding hi.

¹⁰Note in lungduai takin na thuak nading uh ka hong thupiakna zui na hih manun leitung a a om mi khempeuh ze-et nadingin leitung bupah a hong tung ding lungkhamna panin kei zong note ka hong suaktasak ding hi.

¹¹Keimah ka hong pai baih ding hi. Kuamah in, na ngah ding uh gualzawhna lukhu hong tuhkhak loh nadingun na neihsate uh hoihtakin na lenkip un.

¹²A gualzote pen ka Pasian’ sutpi-in ka bawl ding a, amaute paikhia ngei nawn lo ding uh hi. Amaute tungah ka Pasian’ min le ka Pasian kiang vantung panin a hong paisuk ding Jerusalem khua thak min ka gelh ding a, amaute tungah keima min thak zong ka gelh ding hi.

¹³Tua ahih manin zak nading bil a neite in Kha Siangtho in pawlpite kiangah a gen thute na za un.

¹⁴“Laodisia khua pawlpi vantungmi kiangah lai gelh inla, thuman le citakin teci a pang, Pasian’ piansakte khempeuh a kipatna ahi Amen’ thugen in:

¹⁵Note’ gamtatnate ka thei a, vot lah vot vet lo, sa lah sa vet loin na omna uh zong ka thei hi. A vot na hih kei uhleh a sa hi vet le-uhcin ka ut hi.

¹⁶Ahi zongin note pen vot lah vot vet lo, sa lah sa vet loin a laklawhin om na hih manun ka kam sung panin ka hong siakhia ding hi.

¹⁷Note a zawng, a mittaw, puansilh ding a nei lo, a hehpihhuai, a lungkhamhuai na hih lamtak uh thei loin, kote hau-in ka cithei uh a, bangmah kisapna ka nei kei uh hi, na ci uh hi.

¹⁸Tua ahih manin na hauhtheih nadingun kei kiang panin kham citak hong lei-in a zumhuaipi-in guaktanga na omna uh na kisel nadingun puanpak hong lei unla, khua na muhtheih nadingun mit zatui hong lei un.

¹⁹Ka it mite thuhilhin ka taii hi. Tua ahih manin lungsim tak tawh na mawhna panun kisik kik un.

²⁰Kongkhakah dingin kong ka hong kiu hi. Ka aw za-in kong hong honte kiangah lutin an ka nekhawm ding uh hi.

²¹Keimah zong gualzo-in ka Pa’ tokhomah ka tutkhawm uh mah bangin a gualzote khempeuh zong kei tawh ka tokhom tungah hong tutkhawm theih nadingun thu ka pia ding hi.

²²Tua ahih manin zak nading bil a neite in Kha Siangtho in pawlpite kiangah a gen thute na za un, ci-in gen in,” a hong ci hi.