Read Tedim Chin MAANGMUHNA 4 Bible Online

MAANGMUHNA 4 - Tedim Chin bible

MAANGMUHNA 4

¹Hih thuteng khit ciangin ka khuadak leh vantungah kong a kihongsa-in a om ka mu hi. Peengkul awging tawh a kibang, kei kiangah thu a hong gensa awging mah in, “Hih lai-ah hong paito in. Tunung ciangin thupiang dingte ka hong lak ding hi,” hong ci hi.

²Thakhat thu-in Kha Siangtho tawh ka kidim a, tua vantung a tokhom tungah mi khat a tu ka mu hi.

³Tua tokhom tungah a tupa pen Jasper le Karnelian suangmanpha bangin taang ziazua a, a tokhom kimkot pen Emerald suangmanpha bangin suum pempam hi.

⁴Tua tokhom kimkotah tokhom sawmnih le li om a, tuate tungah puanpak silhin kham lukhu a khu upa sawmnih le lite tu uh hi.

⁵Tua tokhom panin khuaphialep hong taangkhia-in, awging le vanging hong kipankhia a, a tokhom mai-ah Pasian’ kha ahi meivak sagih a kivak hi.

⁶A tokhom mailam tengah Kristal suangmanpha bangin a siang kilkel, limlang peekpi kiphah tuipi bangin a dum dide hi. Tua tokhom kiim a pang ciatah a nung le a mai-ah mit a dimin a nei ganhing li a om hi.

⁷A ganhing a khatna pen humpinelkai tawh kibang a, a nihna bawngtal tawh kibang a, a thumna in mihing maitang nei a, a lina pen muvanlai a leeng lai tawh kibang hi.

⁸Tua ganhing lite in kha guk ciat nei-in, tua a khate’ sunglam le a pualamah mittang a dimtakin om a, a sun a zan tawlnga loin la sa uh a, “A beisa, tuhun, le a tawntungin a om Vanglian Topa Pasian, siangtho hi, siangtho hi, siangtho hi,” a ci uh hi.

⁹Tua ganhingte in a nungta tawntung, tokhom tungah a tupa tungah a lungdamna uh ko-in pahtawi-in a phat simun

¹⁰nungta tawntungin tokhom tungah a tupa mai-ah tua upa sawmnih le lite zong bokin amah bia uh a, tua tokhom mai-ah a lukhute uh lawnin la sa uh a,

¹¹“Kote’ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi,” a ci uh hi.