Read Tedim Chin MAANGMUHNA 8 Bible Online

MAANGMUHNA 8 - Tedim Chin bible

MAANGMUHNA 8

¹Tuuno in ciaptehna sagihna a hon ciangin vantungah nai lang sung bang kidai dide hi.

²Tua ciangin Pasian mai-ah a ding vantungmi sagihte ka mu a, amaute tungah peengkul sagih a kipia hi.

³Tua ciangin kham kibawl paknamtui kuang a tawi vantungmi adang khat hong pai-in biakna tau mai-ah a ding hi. Pasian’ mite in thungetna-in a zat paknamtuite tawh hal beh ding le tokhom mai-ah a om kham kibawl biakna tau tungah piak dingin amaute tungah paknamtui tampi tak a kipia hi.

⁴Pasian’ mai-ah a ding vantung mipa’ khutsung panin paknamtui khu le Pasian’ mite’ thungetna van lam manawhin kizialto hi.

⁵Tua ciangin tua vantungmi in paknamtui kuang la a, biakna tau panin mei-am la-in a sungah a koih khit ciangin leitungah lawnsuk a, nakpitakin van gingin zin ling a, khua phia-in keek a kia hi.

⁶Tu-in peengkul sagih a tawi vantungmi sagihte a peengkul uh a tum dingin hong kithawi uh hi.

⁷A masa vantungmi in a peengkul hong tum a, gialpi le mei, sisan tawh kihelin leitungah a kiasuk hi. Leitung sehthumsuah sehkhat, le lopa hing sehthumsuah sehkhat a kangtum hi.

⁸A nihna vantungmi in a peengkul hong tum a, mual lianpi tawh a kibang, mei in kangin a kuang zuazua khat, tuipi sungah kilawnsuk hi.

⁹Tuipi sehthumsuah sehkhat sisan suakin, tuipi sunga om ganhingte sehthumsuah sehkhat si a, teembaw sehthumsuah sehkhat a kisia hi.

¹⁰A thumna vantungmi in a peengkul hong tum a, vantung panin aksi lian khat meikuang bangin hong kiasukin gunte le tuinakte sehthumsuah sehkhat tungah a tu hi.

¹¹Tua aksi a min Gamsai hi a, tui sehthumsuah sehkhat gamsai tui suak a, tua tui khasak ahih manin a dawn mi tampi tak a si uh hi.

¹²A lina vantungmi in a peengkul hong tum a, ni sehthumsuah sehkhat kisatkhia-in, kha zong sehthumsuah sehkhat mah kisatkhia a, aksi zong sehthumsuah sehkhat mah kisatkhia ahih manin a taanna uh sehthumsuah sehkhat ciat a bei hi. Sunin hun sehthumsuah sehkhat tang khua vak lo a, zanin zong hun sehthumsuah sehkhat tang mah kha le aksi taang lo hi.

¹³Tua ciangin ka khuadak leh vankim lai-ah muvanlai khat a leenkawmin nakpi-in ham a, “Vantung mi adang thumte in a hong tum lai ding peengkulte hangin leitungah a teng mi tungah gimna, gimna, gimna lianpi hong tung ding hi,” a cihna ka za hi.