Read Tedim Chin 1 SAMUEL MASA 13 Bible Online

1 SAMUEL MASA 13 - Tedim Chin bible

1 SAMUEL MASA 13

¹Saul in uk ding a kipatin kum sawmthum pha a, kum sawmnih le kum nih sung Israel-te a uk hi.

²Saul in Israel-te mihing tulthum teel hi. Tul nihte Mikmash le Bethel mualtung gamah Saul tawh om a, tul khatte Benjamin gam sung Gibeah-ah a tapa Jonathan tawh om uh a, midang a omlaite amau’ inn a puanbuk ciat uhah amah in ciahsak hi.

³Jonathan in Geba-ah a om Filistia-te’ khuacingte zo a, Filistia-te in tua thu za uh hi. Tua ciangin Saul in gam khempeuhah peengkul tum a, “Hebru mi khempeuh zasak un,” a ci hi.

⁴Tua ciangin Saul in Filistia khuacingte a zawhna le Filistia-te a dingin Israel-te a huathuai ahihna zong Israel-te khempeuh in za uh hi. Gilgal-ah Saul a pawm dingin mite kisamkhia hi.

⁵Tua ciangin Israel-te tawh a kido dingin Filistia-te kikhawmin, leeng tul sawmthum, sakol galkap tulguk, le a galkapte tuipi gei-a sehnel zahin tampi pha uh hi. Amaute hong paito-in Bethaven nisuahna lam Mikmash-ah phual sat uh hi.

⁶A galte in Israel mite neh mahmah ahih manin amaute haksatna sungah a omlam uh a kitheih uh ciangin suanghawm sung, leihawm sung, suang kawmlak, han lak, le tuikhukte sungah bu uh a,

⁷a dangte in Jordan ngahmun kantanin Gad le Gilead gamah galkah uh hi. Saul ahihleh Gilgal-ah omlai a, amah tawh a om mi khempeuh zong lau-in ling uh hi.

⁸Amah in Samuel’ seh hun, ni sagih sung a ngak hi. Ahih hangin Gilgal-ah Samuel hong pai lo a, ama kiang panin mite kithehthang hi.

⁹Tua ahih ciangin Saul in, “Meihal biakna le thunuama biakna hih lai kei kiangah hong paipih un,” a ci hi. Tua ciangin amah in meihal biakna a pia hi.

¹⁰Meihal biakna a piak a man khit phetin Samuel hong tung a, amah a dawn ding le a hopih dingin Saul paikhia hi.

¹¹Samuel in, “Bang hih na hi hiam?” a ci hi. Saul in, “Kei kiang panin mite kithehthangin, a ni kiseh sungin nang lah hong tung lo a, Mikmash-ah Filistia-te a kikhopna ka muh ciangin

¹²keimah in, ‘Tu-in Filistia-te keimah hong hih dingin Gilgal-ah hong paisuk ding uh a, keimah in TOPA’ maipha ka ngen nai kei hi,’ ka ci hi. Tua ahih ciangin kei mahmah kisawl tawmin meihal biakna ka pia hi,” a ci hi.

¹³Tua ciangin Samuel in Saul kiangah, “Na hai gamtat hi; TOPA na Pasian’ hong thupiakna na zui kei hi; bang hang hiam cih le TOPA in Israel-te tungah kumpi dingin nang le na suanlekhakte a kipsaksuak ding ahi hi.

¹⁴Ahih hangin tu-in na ukna kizomsuak lo ding a, TOPA in ama lungsim bangin mi khat zong khin hi. TOPA in nang hong thupiak zui lo na hih manin ama mite tungah ulian dingin TOPA in amah seh khin hi,” a ci hi.

¹⁵Tua ciangin Samuel dingin Gilgal panin Benjamin-te’ gam sung Gibeah-ah paito hi. Tua ciangin Saul in amah tawh a om mite mihing zaguk bang kaikhawm hi.

¹⁶Saul, a tapa Jonathan, le amau tawh a om mite Benjamin-te’ gam sung Gibeah-ah om uh hi. Ahih hangin Filistia-te in Mikmash-ah phual sat uh hi.

¹⁷Tua ciangin Filistia-te’ giahphual panin galsimte pawl thumin hong kuankhia uh hi. Pawlkhatte Shual gam Ofrah lamah kihei-in,

¹⁸pawlkhatte Bethhoron lamah kihei a, pawlkhatte gamlak lam Zeboiim kuam a kimuh sukna gamgi lamah kihei uh hi.

¹⁹Tua laitakin Israel gam sung khempeuhah sikseek khat zong om lo hi. Tua ahih manin Filistia-te in, “Hebru mite in amau a dingin namsau ahi a, teipi ahi zongin hong seeksak kha ding hi,” a ci uh hi.

²⁰Israel-te pen a lokhawhna tu, a hei, ahih kei leh a phiaukawi a seek hiam dingin Filistia-te kiangah paisuk zel uh hi.

²¹Lokhawhna tu le tuzum seek hiam thaman hamu bang hi a, hei seek hiam thaman le ciangkhutah sik phuh thaman mat khat bang ahi hi.

²²Tua ahih ciangin galdo-in Saul le Jonathan tawh a om mite khat peuhpeuh khut sungah namsau ahi a, teipi ahi zongin om lo a, ahi zongin Saul le a tapa Jonathan in nei uh hi.

²³Tua ciangin Filistia mite in Mikmash paina ciangka a cing dingin mi sawl uh hi.