Read Tedim Chin 1 SAMUEL MASA 15 Bible Online

1 SAMUEL MASA 15 - Tedim Chin bible

1 SAMUEL MASA 15

¹Samuel in Saul kiangah, “TOPA in ama mi Israel-te tungah kumpi dingin nang sathau a nilh dingin kei hong sawl hi. Tua ahih ciangin tu-in TOPA’ thugen ngai in.

²Vanglian TOPA in hih bangin ci hi: ‘Amaute Egypt panin hong paikhiat lai-in amaute in lampi-ah Israel-te a nialna uh hangin Amalek mite gim ka pia ding hi.

³Tu-in pai-in Amalek mite vatgawp unla, amaute’ neih khempeuh susiamang khin un. Amaute siit loin, numei le pasal, naupang le nawine laite, bawngtal le tuu, kalaoh le la, that un,’ ci hi,” a ci hi.

⁴Tua ahih ciangin Saul in Israel mite sam a, Telaim-ah khe galkap mi tul zanih le Judah mi tul sawm kaikhawm hi.

⁵Tua ciangin Amalek khuapi-ah Saul hong pai-in kuam sungah pangsim hi.

⁶Tua ciangin Saul in Ken mite kiangah, “Pai un; kihemkhia un. Amalek mite lak panin paikhiasuk un. Tua hikeileh amaute tawh note kong susiakhawm kha ding hi. Bang hang hiam cih leh Egypt panin Israel-te hong paikhiat lai-in amaute khempeuh tungah migitna na lak uh hi,” a ci hi. Tua ahih ciangin Amalek mite lak panin Ken mite kihemkhia uh hi.

⁷Tua ciangin Saul in Havilah panin Egypt nisuahna lama om Shur ciang dong Amalek-te zo hi.

⁸Amah in Amalek-te’ kumpipa Agag a hingin man a, mi khempeuh namsau tawh thatmang hi.

⁹Ahih hangin Saul le mite in Agag, le a hoihpen tuute, bawngtalte, gannote, tuunote le a hoih khempeuh khawi uh a, tuate thatmang khin lo uh hi. A kisimmawh bangmah a man lo khempeuh amaute in thatmang uh hi.

¹⁰TOPA’ thu Samuel tungah hong tung hi:

¹¹“Kumpi-in Saul ka koih ka kisik hi. Bang hang hiam cih leh amah pen keimah zuihna panin kihei kik a, ka thupiaknate sem lo hi,” a ci hi. Tua ciangin Samuel heh hi; zan tawntung TOPA’ tungah kiko hi.

¹²Tua ciangin Saul a dawn dingin zingsangin Samuel tho baih hi. Samuel kiangah, “Karmel-ah Saul hong pai hi. Amah in ama a dingin phawkna mual khat phutin, kihei-in paisuak a, Gilgal-ah paisuk hi,” kici hi.

¹³Tua ciangin Samuel hong pai a, Saul in ama kiangah, “TOPA’ thupha na tungah hong tung hen. TOPA’ thupiakna ka sem khin hi,” a ci hi.

¹⁴Tua ciangin Samuel in, “Tua ahihleh ka bil-a tuu hamna le ka zak bawngtalte’ hamna bang ahi hiam?” a ci hi.

¹⁵Saul in, “Amaute in Amalek-te kiang panin tuate hong paipih uh hi; bang hang hiam cih leh TOPA na Pasian tungah biakna piak nadingin a limci pen tuute le bawngtalte mite in siit uh a, a dangte ka thatmang khin uh hi,” a ci hi.

¹⁶Tua ciangin Samuel in Saul kiangah, “Khawl in! TOPA in tuzanin kei kiangah hong gen thu nang kiangah kong gen ding hi,” a ci hi. Tua ciangin amah in Samuel kiangah, “Hong gen in,” a ci hi.

¹⁷Tua ciangin Samuel in, “Nang na kineu ngaihsut hun a om hangin, tu-in nang pen Israel minamte’ lutang hi lo na hi hiam? TOPA in Israel-te tungah kumpi-in nang sathau hong nilh hi.

¹⁸TOPA in nasem dingin nang hong sawl a, ‘Pai in; mawhnei Amalek mite va susiamang inla, amaute a bei mateng va simgawp in,’ hong ci hi.

¹⁹Tua ahih ciangin bang hangin TOPA’ thu mang lo na hi hiam? Bang hangin vankinusiate bawhin TOPA’ muhna-ah a sia gamta na hi hiam?” a ci hi.

²⁰Tua ciangin Saul in Samuel kiangah, “Keimah in TOPA’ thu ka mang a, TOPA in hong sawl nasepna-ah pai khinin, Amalek kumpipa Agag kong ciahpih khin a, Amalek mite ka susiamang khin hi.

²¹Ahih hangin mite in a kinusiate, tuute le bawngtalte, suksiat dinga a ki-ap na hoihpente Gilgal-ah TOPA na Pasian piak dingin la uh hi,” a ci hi.

²²Tua ciangin Samuel in, “TOPA in meihal biaknate le biakpiaknate TOPA’ thu man’ ding zahin deih ahi hiam? En in, biakpiakna sangin thu man’ ding hoihzaw a, tuutal thaute sangin thu ngaih ding hoihzaw hi.

²³Bang hang hiam cih leh lehdona pen aisan mawhna bangmah hi a, lungkhauhna pen mawhna le milim biakna mah a bang ahi hi. Nangmah in TOPA’ thu nial khin na hih manin, amah in zong kumpi hihna pan nang hong nolh khin hi,” a ci hi.

²⁴Tua ciangin Saul in Samuel kiangah, “Ka khial khin hi; bang hang hiam cih leh keimah in mite kihta-in amau’ thu mangkha ka hih manin TOPA’ thupiakna le nangma thute ka palsat khin hi.

²⁵Tua ahih ciangin tu-in kong thum hi; ka khialhna hong maisak inla, TOPA ka biaktheih nadingin kei hong lehzuihkik in,” a ci hi.

²⁶Tua ciangin Samuel in Saul kiangah, “Nang tawh kong kilehkik kei ding hi; bang hang hiam cih leh nangmah in TOPA’ thu na nial khin a, Israel-te’ tungah kumpi hihna panin TOPA in nang hong nolh khin hi,” a ci hi.

²⁷A paikhia dingin Samuel a kihei laitakin Saul in a puantualpi mongin len a, a puan kikeek hi.

²⁸Tua ciangin Samuel in ama kiangah, “TOPA in Israel-te’ kumpi gam nang’ tung panin tuni-in balkhia-in nang sangin a hoihzaw na vengpa tungah pia khin hi.

²⁹Israel-te’ minthang Pasian in zong zuau gen lo ding a, zong kisik lo ding hi; bang hang hiam cih leh a kisik dingin amah mi hi lo hi,” a ci hi.

³⁰Tua ciangin amah in, “Ka khial khin hi; ahi zongin tu-in keima mi upate mai le Israel-te’ mai-ah kei hong pahtawi inla, TOPA na Pasian ka biaktheih nadingin kei hong zuikik in,” a ci hi.

³¹Tua ahih ciangin Saul’ nung zui-in Samuel kilehkik a, Saul in TOPA a bia hi.

³²Tua ciangin Samuel in, “Amalek-te’ kumpi Agag hih lai ka kiangah hong paipih in,” a ci hi. Tua ciangin Agag launa linna tawh ama kiangah hong pai hi. Agag in, “Sih ding lungkhamna hong tung taktak ta hi,” a ci hi.

³³Tua ciangin Samuel in, “Na namsau in nute ta bei-in a bawl mah bangin na nu zong ta bei hi ta ding hi,” a ci hi. Tua ciangin Samuel in TOPA’ mai Gilgal-ah Agag a semnen hi.

³⁴Tua ciangin Ramah-ah Samuel pai a, Gibeah-a a inn-ah Saul zong a ciahto hi.

³⁵Samuel in ama sih ni dong Saul mukik lo a, ahih hangin Saul’ hangin Samuel a dah hi. Israel-te tungah kumpi-in Saul a koih manin TOPA kisik hi.