Read Tedim Chin 1 SAMUEL MASA 17 Bible Online

1 SAMUEL MASA 17 - Tedim Chin bible

1 SAMUEL MASA 17

¹Tu-in Filistia-te in galsim dingin a galkapte uh khawmin Judah gam Sokoh-ah amaute kituah uh a, Sokoh le Azekah kikal Efesdammim-ah giahphual sat uh hi.

²Tua ciangin Saul le Israel mite kikhawmin Elah kuamah giahphual sat uh a, Filistia-te a do dingin kithawi uh hi.

³Filistia-te a gal mualtungah ding uh a, Israel-te a galkhat mualtungah dingin, amaute’ kikalah kuam khat om hi.

⁴Filistia-te’ giahphual panin Gath khuami Goliath a kici a makai, a tun pi kua val a sang mi khat hong paikhia hi.

⁵Amah in a lu tungah sumngo sik lukhu khu-in, sik puan tawh amah kithawi a, a puan gihna sumngo shekel tulnga ahi hi.

⁶Amah in a khete tungah sumngo ngaltuam bulh a, a liangko-ah sumngo teipi khawh kikhai hi.

⁷A teibul siam lawngpi cia bang pha a, a teipak sik shekel zaguk gik a, ama mai-ah a lum puapa a pai hi.

⁸Amah dingin Israel uliante otsanin, “Galdo dingin bang hangin hong kuankhia ngam na hi uh hiam? Kei, Filistia mi hi-in, note, Saul’ nasemte hi lo na hi uh hiam? Note a dingin mi khat teel unla, tua mipa kei kiangah hong paisuksak un.

⁹Amah in kei hong do-in hong thah zawh leh kote na nasemte ka hi ding uh a, ahih hangin keimah in amah zo-in ka thah leh note, komau’ nasem na hi ding uh hi,” a ci hi.

¹⁰Tua ciangin tua Filistia mipa in, “Tuni-in Israel uliante kong to hi. I kido theih nadingin mi khat hong pia un,” cithuah lai hi.

¹¹Saul le Israel-te khempeuh in Filistia mipa’ kammalte a zak uh ciangin amaute lungkia-in nakpitakin a lau uh hi.

¹²David pen Judah gam Bethlehem khua-a om Efrathah mi, tapa giat a nei Jessi min a nei pa’ tapa ahi hi. Saul’ hun lai-in tua mipa teek zo-in kum tampi pha ta hi.

¹³Jessi’ tapa a u pen thumte in galdona-ah Saul zui khin uh hi. Gal sungah a pai a tapa thumte’ min pen, a ta upa Eliab, ama zomah Abinadab, le a thumna Shammah ahi hi.

¹⁴David, a nautum pen hi a, a upa pen thumte in Saul zui a,

¹⁵ahih hangin Bethlehem-a a pa’ tuute a vak dingin Saul’ kiang panin David ciah zelzel hi.

¹⁶Ni sawmli sung zing le nitakin Filistia-pa hong pai-in hong ding zelzel hi.

¹⁷Tua ciangin Jessi in a tapa kiangah, “Hih ankan seu khat le hih anlum sawm na ute puak dingin guang inla, na ute kiang giahphual ah manlangin va puak inla,

¹⁸a tul a ukpa kiangah zong hih sathaukhal sawmte puak in. Na ute’ omdan va mu inla, amau’ omzia a kitheihna lim pawlkhat hong ciahpih in,” a ci hi.

¹⁹Tua laitakin Filistia-te tawh kido-in Saul le amaute, le Israel mite khempeuh, Elah kuamah om uh hi.

²⁰Tua ciangin Jessi in a thupiak bangin zingsangin David tho baihin, a kem ding midang khat tawh a tuute nusia a, a ante pua-in a pai hi. Mihonte giahphual ah pai-in galdo kikona a ot laitakun amah giahphual va tung hi.

²¹Israel-te le Filistia-te, galkap le galkap a kido dingin kinaih uh hi.

²²David in van cing pa’ khut sungah a nate nusia-in galkapte kiangah va tai a, pai-in a ute va hopih hi.

²³Amaute tawh a kiho laitakin, Gath khuami Filistia-te a makaipi Goliath min nei pa, Filistia uliante lak panin hong paikhia-in a masa-a mah bangin kam hong pau hi. David in ama kampau a za hi.

²⁴Israel mite khempeuh in tua mipa a muh uh ciangin ama kiang panin taikhia uh a, lau mahmah uh hi.

²⁵Israel mite khatlekhat kiho-in, “Hih hong paikhia mipa na mu ngei uh hiam? Israel-te a to dingin hong paito takpi hi. Amah a that mipa tungah kumpipa in sum tampi pia-in, ama tanu zong pia ding a, a pa’ innkuante, Israel sungah aana nasep le siah khempeuh kipengsak ding hi,” a ci uh hi.

²⁶David in ama kianga ding mite kiangah, “Hih Filistia-pa thatin Israel-te’ tung panin hih mindaina a beisak pa a dingin bang kihih ding ahi hiam? A nungta Pasian’ galkapte a to dingin hih dawibia Filistia-pa kua ahi hiam?” a ci hi.

²⁷Mite in a kibang mahin dawng uh a, “Amah a that mipa tungah tua bang tua bangin kihih ding hi,” a ci uh hi.

²⁸David in mite kiangah thu a gen laitakin ama u a upen Eliab in a za hi. David tungah Eliab heh mahmah ahih manin, “Bang hangin hong paisuk na hi hiam? Tua tuu tawmkhatte gamlakah kua tawh nusia na hi hiam? Na kihaimuanna le na lungsim gitlohna ka thei hi. Bang hang hiam cih leh galkidona a en dingin nong paisuk hi,” a ci hi.

²⁹David in, “Bang hih ka hi hiam? Kam bek hi lo ahi hiam?” a ci hi.

³⁰Tua ciangin ama kiang panin midang khat kiangah kihei-in a kibang mahin thu dong a, mite in a masa-a mah bangin amah dawngkik uh hi.

³¹David’ kampaute a kizak ciangin amaute in Saul kiangah gen uh a, Saul in amah samsak hi.

³²Tua ciangin David in Saul kiangah, “Ama hangin kuamah lungkiasak kei in. Na nasempa pai-in hih Filistia-pa tawh ka va kido ding hi,” a ci hi.

³³Saul in David kiangah, “Hih Filistia-pa tawh a kido dingin ama langkhatah na kuanzo kei ding hi. Nang pen tangval na hi pan a, amah pen a tangval a kipan galkap mi ahi hi,” a ci hi.

³⁴Ahih hangin David in Saul kiangah, “Na nasempa in a pa’ tuute a kem zel hi. Humpinelkai ahi a, vom ahi zongin hong pai-in tuute lak panin tuuno a mat ciangin,

³⁵a nungah delhin vatgawpin a kamsung panin tuuno ka honkhia hi. Kei hong hih dingin amah hong ding leh keimah in a ngawngin manin vatgawpin ka that hi.

³⁶Na nasempa in humpinelkai le vomte that khin ngei hi. Amah in a nungta Pasian’ galkapte ninsak ahih manin dawibia hih Filistia-pa pen tuate khat tawh kibang lel ding hi,” a ci hi.

³⁷Tua ciangin David in, “Humpinelkai khecin le vom khecin panin kei a hong honkhia TOPA in hih Filistia-pa’ khutsung panin zong kei hong honkhia ding hi,” ci thuah lai hi. Tua ciangin Saul in David kiangah, “Pai in; TOPA in nang hong ompih ta hen!” a ci hi.

³⁸Tua ciangin Saul in a galvante David pia a, amah in a lu tungah sumngo lukhu khusakin, sik puan silhsak hi.

³⁹Tua ciangin David in a galdalnate tungah a namsau khih a, amah kingeinaseh lo ahih manin lam pai dingin a kithawi leh pai thei lo hi. Tua ciangin David in Saul kiangah, “Hihte tawh lam ka pai thei kei hi; bang hang hiam cih leh ka kingeinaseh kei hi,” a ci hi. David in tuate suahkhia hi.

⁴⁰Tua ciangin amah in a khutah a ciangkhut tawi-in, lui panin suangmai tang nga tengin a tuucin thungip sungah tuate koih hi. A khut sungah a suanglotna tawi a, Filistia-pa’ nai-ah a pai hi.

⁴¹Tua ciangin a mai-ah a lum puapa tawh Filistia-pa hong pai-in David hong naih hi.

⁴²Filistia-pa khuadakin David a muh ciangin amah in simmawh hi; bang hang hiam cih leh amah a tangval pan, a cidam tuak, a melhoih khat hi lel hi.

⁴³Tua ciangin Filistia-pa in David kiangah, “Ui hong sa a, ciangkang tawh sat hong sawm na hi hiam?” a ci hi. Filistia-pa in a pasian-te’ min tawh David samsia hi.

⁴⁴Filistia-pa in David kiangah, “Ka kiangah hong pai in. Huih lak vasate le gamlak gamsate tungah na sa ka pia ding hi,” a ci hi.

⁴⁵Tua ciangin David in Filistia-pa kiangah, “Namsau, teipi, le teikhawh tawh kei kiangah nang nong kuan hi. Ahih hangin kei pen Israel galkapte’ Pasian, a Vanglian TOPA, nangmah in na to mipa’ min tawh nang kiangah kong kuan hi.

⁴⁶Tuni-in TOPA in ka khut sungah nang hong pia ding a, keimah in nang hong sattukin na lu ka tankhia ding hi. Tua ciangin tuni-in huihlak vasate le leitung ganhingte tungah Filistia mi a site’ luanghawmte ka pia ding hi. Israel sungah Pasian khat a omlam leitung mi khempeuh in a theih nading,

⁴⁷le TOPA in namsau le teipi tawh a hotkhiat lohna thu hih lai-a a om khempeuh in a theih nading ahi hi. Bang hang hiam cih leh galdona pen TOPA a’ hi a, amah in kote’ khut sungah note hong pia ding hi,” a ci hi.

⁴⁸David tawh a kituah dingin Filistia-pa dingin hong pai a, hong nai ciangin David zong Filistia-pa tawh a kituah dingin gal mai-ah a delh hi.

⁴⁹Tua ciangin David in a khutin a thungip sawkin suangtang khat la a, a kap leh Filistia-pa’ taltang a kha hi. A taltangah a suangtang tum a, leilakah amah maipuk hi.

⁵⁰Tua ahih ciangin David in suanglotna khat le suangtang khat tawh Filistia-pa zo-in a that hi. David’ khut sungah namsau om lo hi.

⁵¹Tua ciangin David tai-in ama tungah ding a, Filistia-pa’ namsau mah a paai panin dok a, amah thatin tua tawh a lu a tankhia hi. Filistia-te in a makai pa uh a sihna a theih uh ciangin a taikeek uh hi.

⁵²Tua ciangin Israel-te le Judah-te awngin ding uh a, Gath le Ekron kulhkongpi ciang dong Filistia-te delh uh ahih manin Shaarim panin Gath le Ekron ciang dong Filistia mi a liamte puk uh hi.

⁵³Tua ciangin Filistia-te a delhna panun Israel-te hong ciahkik uh a, amaute in a giahphual uh luhsak uh hi.

⁵⁴David in Filistia-pa’ lutang la-in Jerusalem-ah paipih a, ahih hangin a galvan teng ama puanbukah a koih hi.

⁵⁵Filistia-pa do-in David a kuankhiatna Saul in a muh ciangin galkap mangpa Abner kiangah, “Abner aw, hih tangvalpa kua’ tapa ahi hiam?” a ci hi. Abner in, “Kumpipa aw, ka thei kei hi,” a ci hi.

⁵⁶Tua ciangin kumpipa in, “Tangvalpa kua’ tapa ahi hiam, kan in,” a ci hi.

⁵⁷Filistia-pa a thahna panin David hong ciah ciangin Abner in amah samin a khutsunga Filistia-pa’ lutang tawh Saul’ mai-ah a paipih hi.

⁵⁸Saul in ama kiangah, “Tangvalpa aw, kua’ tapa na hi hiam?” a ci hi. David in dawngin, “Bethlehem khuami na nasempa Jessi’ tapa ka hi hi,” a ci hi.