Read Tedim Chin 1 SAMUEL MASA 19 Bible Online

1 SAMUEL MASA 19 - Tedim Chin bible

1 SAMUEL MASA 19

¹Tua ciangin Saul in David thah ding a ngaihsutna thu a tapa Jonathan le a nuai-a ulian khempeuh kiangah a gen hi. Ahih hangin Saul’ tapa Jonathan in David diksa mahmah hi.

²Jonathan in David kiangah, “Ka pa Saul in nang thah hong sawm hi. Tua ahih ciangin zingsang ciangin kidawm inla, mun simtham khatah omin bu in.

³Kei paikhia-in nangma bukna phual nai-ah ka pa kiangah ka ding ding a, nangma thu ka pa kiangah ka gen ding hi. Ama tung panin phawk ka neih leh nang kiangah kong gen ding hi,” a ci hi.

⁴Jonathan in a pa Saul kiangah David’ thu a hoihin genin ama kiangah, “Kumpipa, a nasempa David tungah khial kei in; bang hang hiam cih leh nang tungah amah hong khial lo a, ama nasepnate nang a dingin nasep hoih ahi hi.

⁵Amah in a nuntakna pia ngamin Filistia-pa that a, TOPA in Israel-te khempeuh a dingin gualzawhna lianpi piangsak hi. Nangmah in hih thu na mu a, na lung a dam hi. Tua ahih ciangin bang hangin thu om lopi-in David thahna tawh a mawhbaang lo mipa tungah khial ding na hi hiam?” a ci hi.

⁶Saul in Jonathan’ thu mang hi. Saul kiciam a, “TOPA a nungta ahih mah bangin amah kithat lo ding hi,” a ci hi.

⁷Tua ciangin Jonathan in David samin, Jonathan in hih thute khempeuh ama tungah lak hi. Jonathan in Saul kiangah David paipih a, a nidanga mah bangin ama sepna ngei-ah a sem hi.

⁸Tua ciangin gal hong omkik hi. David kuankhia-in Filistia-te tawh kido a, amaute tampi tak that a, ama mai-ah amaute a tai uh hi.

⁹Tua ciangin a khut sungah a teipi tawi-in a inn sungah a tut laitakin TOPA’ sawl kha gilo Saul’ tungah hong tung hi. David in a laiza lasakna tum hi.

¹⁰Saul in a teipi-in kawm tawh David khawhcip dingin khawh a, ahih hangin amah in na pelh a, kawm tungah a teipi kiphut hi. Tua ciangin David tai-in a suakta hi.

¹¹A zingsang ciangin amah a thahtheih nadingin tua zanin Saul in amah a vil dingin David’ inn-ah mi sawl hi. Ahih hangin David’ zi Mikhal in ama kiangah, “Tuzanin na nuntakna na suahtak kei leh, zing ciangin nang hong kithat ding hi,” a ci hi.

¹²Tua ahih ciangin Mikhal in tawlet-ah David khiasuk hi. Amah taikhia-in suakta hi.

¹³Mikhal in milim khat la-in lupna tungah koih a, keelmul lukham khat a lu-ah koihin puan silhsak hi.

¹⁴Saul in David a man dingin mi a paisak ciangin amah in, “Amah a ci na hi,” na ci hi.

¹⁵Tua ciangin Saul in David a en dingin mi sawl a, “Amah ka thahtheih nadingin a lupna tawh kei kiangah amah hong puato un,” a ci hi.

¹⁶A mi sawlte hong tun ciangin, keelmul lukham a lu sanah omin lupna tungah a milim na om hi.

¹⁷Saul in Mikhal kiangah, “Bang hangin tua bangin kei hong khem a, amah a suahtak nadingin ka gal pa khah na hi hiam?” a ci hi. Mikhal in Saul dawngin, “Amah in kei kiangah, ‘Hong paisak in; bang hangin nang hong that ding ka hi hiam?’ hong ci hi,” a ci hi.

¹⁸Tu-in David tai-in suakta a, Ramah-ah Samuel kiangah pai-in, ama tungah Saul’ hihna teng a gen hi. Tua ciangin amah le Samuel pai-in Naioth-ah om uh hi.

¹⁹Tua ciangin Saul kiangah, “En in, Ramah khuasung Naioth vengah David om hi,” kici hi.

²⁰Tua ciangin David a man dingin Saul in mi sawl hi. Amaute in kamsang honte laamin awngin omin, amaute a makai-in Samuel a ding a muh uh ciangin, Saul’ sawltakte tungah Pasian’ kha hong tung a, amaute zong laamin a awng uh hi.

²¹Hih thu Saul kiangah a kigen ciangin, amah in midang sawl leuleu a, amaute zong laamin awng leuleu uh hi. Tua ciangin Saul in mi a thum veina sawl a, amaute zong tua bangmah hi veve uh hi.

²²Tua ciangin amahmah Ramah-ah pai a, Seku-a om tuikhuk lianpi tung hi. Amah in, “Samuel le David koi-ah om ahi hiam?” ci-in a dong hi. Mi khat in, “En in, Ramah khuasung Naioth vengah om uh hi,” a ci hi.

²³Tua lai panin Ramah khuasung Naioth vengah amah pai hi. Ama tungah zong Pasian’ kha hong tung a, Ramah khuasung Naioth veng a tun mateng a paikawmin laamin awng hi.

²⁴Amah in zong a puante suahkhia-in Samuel’ mai-ah laamin awng a, tua sun tawntung le tua zan tawntung a guaktangin a om hi. Tua hun a kipanin, “Saul zong kamsang suak khin ahi hiam?” kici hi.